মণিপুরী য়ুথ ফ্রন্ত ওব আসামনা পেন্দবা ঊৎলক্লি
ইম্ফাল, দিসেম্বর ২৪ : থা অসিগী ১৭ তা মণিপুরগী চীফ মিনিস্তর এন বীরেন সিংহনা সিলচরদা লাক্তুনা মণিপুরী অমসুং বিষ্ণুপ্রিয়া ঙসিদগী পূনবা য়ানরে হায়রিবা ৱাফম অসিবু মণিপুরী য়ুথস্ ফ্রন্ত ওব আসাম (মাইফা) না থম্মোয় শোক্না পেন্দবা ফোঙদোরক্লি।
ফ্রন্ট অসিগী প্রেসিদেন্ত থাংজম ব্রোজেনগী চেরোল অমদা, মণিপুরগী চীফ মিনিস্তারনা আসামদা খুন্দারিবা মণিপুরীশিংগী ইহুল খঙদনা হেক্তা লাউথোকপীরম্বসি ঐখোয়গী লাইবক থিবনি। মণিপুরগী চীফ মিনিস্তরনা মশাগী ইরৈবাক ফাওবা কাংখোং চায়দুনা লৈরিঙৈ চৈরক্তা আসামগী মণিপুরীশিংদা অমুক কাংখোং চায়নবা, ফুরুপ মশেলগী মরক্তা ঈরাং থোক্নবা হোৎনরম্বসি আসামদা চোইনা খুন্দারিবা মণিপুরীশিংনা অকনবা মওংদা পেন্দবা ফোঙদোক্লি।
মণিপুরদা লৈরিবা বিষ্ণুপ্রিয়াশিংদি মশানা মশাবু বিষ্ণুপ্রিয়ানি হায়খিদ্রে অদুগা আসাম, ত্রিপুরা, বাংলাদেশতা লৈরিবশিংদি বিষ্ণুপ্রিয়া হায়না হৌজিকসু খঙনরি। অদুনা সি এম বীরেননা খঙজিনবা ফৈ, মদুদি বিষ্ণুপ্রিয়া হায়বা কাঙলূপ অসি কৈদৌনুংদসু মণিপুরী ঐখোয়গা পূনশিনবা য়ারোইদবা কাঙলূপ অমনি, অদুগা মখা তানা আসামদা চোইনা খুন্দারিবা মণিপুরীশিংবু আসামিজ মণিপুরী হায়না মিংথোল অমা ঐখোয়দা থোল্লম্লিবসি মণিপুরগী সি এম অমা ওইবগী য়াম্না চান্নদবা ৱাফম্নি। মণিপুরদা লৈরিবা ফুরুপশিং অসিদা মণিপুরী নাগা, মণিপুরী কুকি মণিপুরী তাংখুল হায়না শকখঙবা য়াগদ্রা হায়বসি হান্না খন্থবীয়ু। ঐখোয় আসামদা লৈরিবা মণিপুরীশিংসি আসামগী য়েলহৌমীনি মণিপুরী (মীতৈ) ওইনা অদুম লৈজগে হায়রি।
মণিপুর অসি আসামদা খুন্দারিবা মণিপুরীশিং লৈরমদ্রবদি ঙসিগী মণিপুর লৈরমদবসু য়াই, চহী তরেৎ খুন্তাকঙৈদা ঐখোয়না লান্মী ওইরগা মণিপুর অমুক নিংতমখিবনি অদুগা করিগুম্বা অমা ঙাঙদ্রিঙৈদা খরা খরা খন্থরগা ঙাঙবীবনা ফগনি। মণিপুরগী সি এম বু মালেমদা লৈরিবা মণিপুরী খুদীংমক্না ইকায়খুম্নজরিবনি অদুগী ইকায়খুম্নবদু মাংহনবীগনু হায়রি।
সোর্স: পোক্নফম
0 কমেন্ট:
কমেন্ট তৌবিয়ু