তোংব্রম অমরজিৎকী ‘ইমাগী কৈথেল’ ফোঙখ্রে
ইম্ফাল, দিসেম্বর ২৪ : নহা ওইরিবা অইবা তোংব্রম অমরজিৎ সিংহনা ইবা ‘ইমাগী কৈথেল’ মিংথোনবা শৈরেং লাইরিক অমা ফোঙখ্রে। সাথৌলূপ (সাহিত্য থৌপাং লূপ) না শীন্দুনা মণিপুর প্রেস ক্লাবতা ঙসি পাঙথোকখিবা লাইরিক ফোঙবগী থৌরম অদুদা মণিপুর সাহিত্য পরিষদকী প্রেসিদেন্ট লোংজম জয়চন্দ্র সিংহনা চীফ গেস্ত, সাহিত্য একাদেমি এৱার্দি শরতচান্দ থিয়ামনা প্রেসিদেন্ত অমসুং সাহিত্য একাদেমি এৱার্দি অরাম্বম মেমচৌবী দেবীনা গেস্ত ওব ওনার ওইখি।
মণিপুর য়ুনিভার্সিতিগী মণিপুরী দিপার্টমেন্তকী এসোসিয়েত প্রোফেসার দাঃ চিরোম রাজকেতন সিংহনা ঙসি ফোঙখিবা শৈরেং লাইরিক অদুগী মশক তাকপা ওইনা শরুক য়াখি।
থৌরম অদুদা সাহিত্য একাদেমি এৱার্দি শরতচান্দ থিয়ামনা হায়খি, মণিপুরগী হৌজিক ওইরিবা ফীবম অসিদা মরু ওইরিবসি মরৈবাক মরমদম নুংশিবা হায়বসিনি। মরৈবাক নুংশিবগী ৱাখল্লোন অসি অইবা-অইবীশিংনা মখোয়গী কলমদগী থোরক্লিবশিং অদুনা অপাবশিংদা পীরি।
অমরজিৎকী শৈরৈংশিং অসিনা মণিপুরদা মীকপ থোকহনবা অমসুং মরৈবাক নুংশিবগী ঈনোৎ অমা পীরি। হান্না লৈরম্বা মরৈবাক নুংশিবগী ৱাখল্লোন অদু অদুম্মক লৈরি হায়বগী ঈনোৎ অমসু পীরি হায়না শরতচান্দ থিয়ামনা ফোঙদোকখি।
পনবা য়াই, তোংব্রম অমরজিৎ মহাক্কী শৈরেং লাইরিক ‘লৌবুক্কী মনম’ দা সাহিত্য একাদেমি যুব পুরস্কার (২০১৮) ফংখ্রবা নহা ওইরিবা অইবনি।
সোর্স: পোক্নফম
0 কমেন্ট:
কমেন্ট তৌবিয়ু