মণিপুরীশিংনা আসামদা অচৌবা শান্তিগী রেল্লি অমা চৎতুনা পিএম দা মেমোরেন্দম থাখ্রে
গুৱাহাতি, মে ২৬ : ওল আসাম য়ুথ এসোসিয়েসন্না শীন্দুনা ঙসি আসামগী কাছার দিষ্ট্রিক্ততা অচৌবা শান্তিগী রেল্লি অমা পাঙথোক্লবা মতুংদা প্রাইম মিনিষ্টার নরেন্দ্র মোদিদা মেমোরেন্দম থাদুনা মণিপুরদা এন আর সিগী থবক পাঙথোকপীয়ু হায়না দিমান্দ তৌখ্রে।
আসামগী কাছার দিষ্ট্রিক্ততা পাঙথোকখিবা রেল্লি অদুদা মৈতৈ অমসুং কুকিগী মরক্তা থোক্লিবা ভাইওলেন্সকী থৌদোক অসিনা মরম ওইরগা মণিপুরগী তেরিতোরিয়েল ইন্ত্রিগ্রিতিদা অকায়বা পীরকপা য়ারোয় হায়বা ৱাফম প্রাইম মিনিস্তরগী মফমদা থমখ্রে হায়রি।
ওল আসাম মণিপুরী য়ুথ এসোসিয়েসন্না দি সিগী খূত্থাংদা পীখিবা প্রাইম মিনিস্তার নরেন্দ্র মোদিদা পীখিবা মেমোরেন্দম অদুদা পল্লিবা ৱাফমদি, মণিপুরদা ম্যান্মাদগী আইন্না য়াদবা মী কয়া চঙলক্তুনা খুন্দাশিল্লিব অসি খঙদোক্নবগীদমক এন আর সি (নেসনেল রেজিষ্টার ওব সিটিজেন্স) গী থবক খুদক্তা পাঙথোকপীয়ু।
মণিপুরদা থোক্লিবা ঈরাং অসিগী মতাঙদা চপ চানা থিজিন্দুনা মরাল লৈবশিং মতিক চাবা দন্দি পীগদবনি। লোয়ননা স্তেত অসিদা শান্তি পুরক্নবা হোৎনগদবনি। মসিনা শান্তি পুরক্নবা অচৌবা লম্বী অমা ওইগনি। প্রোতেস্তরশিং অসিনা ফোঙদোকপা মতুংইন্না, ইন্দিয়া গবর্ণমেন্তনা কুকি লালহৌলূপশিংগা তৌরিবা সাস্পেন্সন ওব ওপারেসন অসি তোক্কদবনি।
লালহৌলূপশিং অসিনা হৌজিক থোক্লিবা থৌদোকশিং অসিদা চাউনা মতেঙ পাংশিল্লি হায়রি। ইন্দিয়া গবর্ণমেন্তনা মণিপুরদা আইন্না য়াদবা মওং দা রিজার্ব ফোরেস্তকী লমশিংদা খুন্দাশিল্ললকপা মীশিং চপ চানা চেক তৌগদবনি। মণিপুরদা উমং কোকথোকপগী থৌওং অসিনা মণিপুর খক্তা নত্তনা ইন্দিয়াগী তোঙান তোঙানবা স্তেতশিংদা শোকহনগনি। মসিনা লমদম অসিগী মহৌশাগী খূলদা চাউনা অকায়বা পীরি।
হায়রিবা থৌওং অসিনা আসামগী তুরেলশিংগী ঈচেলদসু য়াম্না চাউনা অকায়বা পীরি হায়রি। ঙসি পাঙথোকখিবা রেল্লি অদুদা নিখিল বিষ্ণুপ্রিয়া মণিপুর মহা সভা, ওল আসাম মণিপুরী উইমেন মৈরা পায়বী কোর্দিনেসন কমিটি অমসুং ওল আসাম মণিপুরী ষ্টুডেন্টস ওর্গানাইজেসনসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু