...ফুরুপ মশেলগী মরক্তা অমনা অমবু মপুংদা মীশিংদা দোমিনেন্ট তৌনবা লাক্নরকপদগী অঙাং মশিং হেন্না পোক্লকপতা নত্তনা লোনা য়াদবা মওংদা মপানগী মাগী-মাগী কাঙলুপ ফুরুপশিংগী মীতোপ কয়া কৌশিন্দুনা ফুরুপকী পৱার শাগৎপগী লমজেল তান্নরকপনা মরম ওইদুনা ষ্টেট অসিদা দেমোগ্রাফিক ইম্বেলেন্স থোকখি।

ইম্ফাল, জুলাই ১০ : অকিবা ফংলবা মীশি-মীনা তুংদা অমুক থোক্লক্তনবা ফুরুপশিংগী মরক্তা মহৌশাগী মীশিংগী প্রপোসন অসি বেলেন্স ওইনা কায়হন্দনা থম্বা য়াম্না মথৌ তাই। মসিগীদমক ষ্টেটকী মশাগী ওইবা য়াম্না ইফেক্টিভ ওইবা পোপ্যুলেসন পোলিসি শেমহৌদ্রগদি দেমোগ্রাফিক ট্রাঞ্জেক্সনগী ৪ শুবা ফেজ লানশিল্লক্তুনা অচৌবা সিভিল ৱার থোক্লক্লগনি হায়না লমদম অসিগী শক্নাইরবা দেমোগ্রাফর প্রো. আর কে নরেন্দ্রনা পাউচে ( হুইয়েন লানপাউ ) অসিদা ফোঙদোরক্লি।

পাউচে অসিনা ৱার্ল্ড পোপ্যুলেসন দেগা মরি লৈননা অখন্ননা উনদুনা ৱারি শান্নরুবদা মহাক্না মখা তানা ফোঙদোরকখি, মণিপুরদা হৌজিক কাংলুপ অনীগী মরক্তা থোক্লিবা কৈনিংচিৎকী পামদবা থৌদোকশিং অসিগী হৌরকফমগী মরম কয়ামরুম লৈ নত্রগা লৈফম থোকই। মরমশিং অদুগী মনুংদগী খ্বাইদগী মরুওইবা মরম অমা হায়রগদি চহী লিশাং শিৎনা মণিপুরদা খুন্দামিন্নরিবা ফুরুপশিংগী মরক্তা লৈফম থোকপা মীশিংগী খল কায়রকপদগী দেমোগ্রাফিক ইম্বেলেন্স থোক্লক্তুনা তমথিরবা ঙসিগী শক্লোন অসি ওইরকপনি।

শুপ্নগী স্কৱার কিমি ২২,৩২৭ লোমতমক পাকচাওবা চীংলৈবাকসিদা মৈতৈ ফুরুপকা শাগোন্ননা, চীংমী ফুরপ মচা ৩৩, মৈতৈ পাঙল ফুরুপকা পুন্না ফুরুপ ৩৫ গী মথক্তা অতোপ-অতোপ্পা লৈবাকশিংগী মনুং অমসুং মপান্দগী চঙলকপা কম্ম্যুনিটিশিংগা পুন্না খুন্দামিন্নদুনা লাক্লি। সেন্সস দেটাগী মতুংইন্না কুমজা ১৯৬১ ফাওবদা চীংমী ফুরুপ ২৮ ওইরম্বদগী ১৯৭১ দা সহটে হাপচিল্লক্তুনা ২৯ শুরকখি, লোয়ননা কুমজা ২০১১ গী দেটাদা পৌমৈ নাগা, তরাউ, খারম অমসুং কুকি ট্রাইব হাপচিল্লক্তুনা এসটি ৩৩ শুখি। মসিগী মথক্তা লৈঙাক্না শকখঙলবা এসটি লিষ্টকী মনুং চন্দবা চীংমী ফুরুপ মচা কয়া অমসু জেনেরিক ট্রাইব হায়না পুনশিল্লি।

মতম কয়াগী মমাংদগী ষ্টেট অসিদা লৈমিন্নরিবা ফুরুপশিংগী অঙাং পোকপগী চাং, ফুরুপশিংগী মনুংদা মীতোপ চঙহন্দবা নত্রগা শাগৈ তিন্নবা মীতোপ খোপচিন্নবগী চাং খেৎনবনা মরম ওইরগা মীশিং হেনগৎলকপগী খোঙজেল অমসুং চাং অসি ফুরুপ অমগা অমগা মান্নদে। মসিনা অচৌবা মরম অমা ওইরগা মহৌশাদগী লৈরকপা ফুরুপশিংগী মতাংদা কা হেন্না খেৎনরকপদগী মরুওইবা দেমোগ্রাফিক কম্পোনেন্টশিংদা অহোংবা কয়া লাক্তুনা লমদম অসিদা দেমোগ্রাফিক ইম্বেলেন্স থোক্লিবনি হায়খি।

পাউচে অসিদা মহাক্না মখা তারদুনা হায়খি, ঙসি থোক্লক্লিবা দেমোগ্রাফিক ইম্বেলেন্স অসি নোংমদা ওইরকখিবা নত্তে। মতম কয়া চংনা ফুরুপ মশেলগী মরক্তা অতম্ননা মাগী-মাগী ফুরুপনা পৱার পায়নবা, দোমিনেট তৌনবা লাক্নরকপদগী থোক্লকপা মুক্নবগী অকিবা ফংলবা শকওং অদুনি ঐখোয়না ঙসি উরিবা অসি। অদুবু ঙসিসু ঐখোয়না চেকশিনহৌদ্রবদি মসিদগী হেন্না শাথিবা থৌওং শোয়দনা থোক্লক্কনি। মণিপুরগী ওইনা দেমোগ্রাফিক ট্রাঞ্জেক্সনগী প্রোসেস অসি তাঙ্কক কয়া থোক্না নৈনবা য়াই।

মতমগী মতুংইন্না য়েলহৌমী ফুরুপশিংগী মশিংদা অনেম-অৱাং কয়া লৈজরবসু মণিপুরনা ইন্দিয়াদা তিন্দ্রিঙৈগী কুমজা ১৯৪৭ কী মমাং ফাওবসি দেমোগ্রাফিক ট্রাঞ্জেক্সনগী অহানাবা ফেজনি হায়না লৌবা য়াই। হায়রিবা মতমসি ফাওবদা মীশিংগী শাফুনা ষ্টেট অসিগী থৌওং অমত্তদা (শেনমিৎলোনদা, লৈঙাক সাসনদা, কাঙলুপ মশেলগী মরক্তা, ঙাকশেলগী লমদা, লম তকশিন্নবগী ৱাহৌদা) অকায়বা থোকখিদবা মতমনি। অদুবু মদুগী মতুংদগীদি অনিশুবা পেজ লানশিল্লক্তুনা মীতোপ হুপচিল্লকপদগী ষ্টেট অসিগী মহৌশাগী দেমোগ্রাফিক স্ট্রাকচার অহোংবা কয়া লাকখি।

ফুরুপ মশেলগী মরক্তা অমনা অমবু মপুংদা মীশিংদা দোমিনেন্ট তৌনবা লাক্নরকপদগী অঙাং মশিং হেন্না পোক্লকপতা নত্তনা লোনা য়াদবা মওংদা মপানগী মাগী-মাগী কাঙলুপ ফুরুপশিংগী মীতোপ কয়া কৌশিন্দুনা ফুরুপকী পৱার শাগৎপগী লমজেল তান্নরকপনা মরম ওইদুনা ষ্টেট অসিদা দেমোগ্রাফিক ইম্বেলেন্স থোকখি।

মসিনা মরম ওইরগা মহৌশাগী লৈরকপা মীশিংগী খলদা চাওনা অহোংবা লাকপদগী য়েলহৌমীশিংগী লোল, চৎনবি, লাইনিং লাইশোনদা, লৈঙাক সাসনদা, কাঙলুপ মশেলগী মরক্তা, লম মুন্নবগী, ঙাকশেলগী লমদা চৈথেং পীখি। কুমজা ১৯৯০ গী অদুৱাইদগী দেমোগ্রাফিক ট্রাঞ্জেক্সনগী অহুমশুবা ফেজ হৌরক্তুনা ফুরুপ মশেলগী মরক্তা দেমোগ্রাফিক ইম্বেলেন্সকী চৈথেং ফংবা হৌরকখি।

ফুরুপ মশেলগী মরক্তা পৱার উৎথোক্নরকপা, হীরম খুদিংমক্তা ফুরুপ অমনা অমবু দোমিনেন্ট তৌনবা লাক্নরকপা অসিনি। মতাং অসিদা হায়জনিংবা ৱাফমদি এরিয়া দোমিনেন্ট তৌনবা লাক্নরকপা, পোলিটিকেল স্পেস পায়শিন্নবা হোৎনরকপদা নত্তনা লৈবাক অমগী মশক তাক্লিবা লোল  চৎনবি অমসুং লাইনিং-লাইশোন্দা মাগী-মাগী ফুরুপতা এসিমিলেট তৌশিল্লক্নবা লাক্নরকপশিং অসিনি।

মসিনা মরম ওইরগা কাঙলুপ ফুরুপ মশেলগী মরক্তা থাজনদবা, থরুম তৌনরকপা হেনগৎলকপদগী লমদম অসিদা তংদু লৈতাদবা ফীভম অমদা লাক্তুনা দেমোগ্রাফিক্কী মায়োল অমা নত্রগা ফুরুপ মশেলগী মরক্তা চাওনা মুক্নবা কয়া থোকখ্রে। খুদম ওইনা কুমজা ১৯৯৩ গী মে ৩দা মৈতৈ-মৈতৈ পাঙলগী ৱাথোক; কুমজা ১৯৯২-১৯৯৩ দা নাগা কুকিগী ৱাথোক; কুমজা ১৯৯৭-১৯৯৮ দা কুকি পাইতেগী ৱাথোক অদুগা হৌজিক-হৌজিক্না মৈতৈ-কুকিগী ৱাথোক অসিনি।

মতুংদসু ফুরুপ মশেলগী মরক্তা ৱাথোক অমগী মথংদা মরম অমা নত্রগা অমগী ৱাথোক অদুমক মথং মথং শমথরকখিগনি। হৌজিক থোক্লিবা য়াম্না তমথিবা লানগী মশক অসিমক দেমোগ্রাফিক ট্রাঞ্জেক্সনগী অহুমশুবা ফেজগী অয়ৌবি তাঙ্ককনি হায়না লৌবা য়াই। হৌজিক্কী ফীভম অসি মরম চানা তুং কোয়না চৎনগদবা মওংদা থিংহৌদ্রবদি দেমোগ্রাফিক ট্রাঞ্জেক্সনগী মরিশুবা পেজ লানশিল্লক্তুনা সিভিল ৱার অমসু শোয়দনা থোক্লক্কনি।

মরম অদুনা পামদবা থৌদোকশিং অসি থোক্তনবা ফুরুপশিং অসি থোক্তনবা ফুরুপশিংগী মরক্তা মহৌশাগী মীশিংগী প্রপোসন অসি বেলেন্স ওইনা কায়হন্দনা থম্বা চঙই। মসিগীদমক ষ্টেট অসিগী মশাগী ওইবা য়াম্না ইফেক্টিভ ওইবা অথুবা মতমদা পোপ্যুলেসন পোলিসি অমা শেমদুনা চৎনহনবগী তঙাইফদবা লৈরে হায়নসু মহাক্না মখা তাখি।

সোর্স: হুইয়েন লানপাউ