আপডেট:
image

মণিপুরগী পোনি কন্ননবগী মতাঙদা খন্ন-নৈনবা মীফম পাঙথোকখ্রে

ইম্ফাল, মে ২১: দিরেক্তরেত ওব ভেতরিনরি এন্দ এনিমেল হজবেন্দরি সার্বিসেস মণিপুরনা মণিপুর পোনি সোসাইতিগা খূৎশম্নদুনা স্তেতস ওন সস্তেনেবল এন্দ প্রিজার্বেসন ওব মণিপুর পোনি হায়বা হীরম অসিদা নোংমগী ওইবা কন্সলতেসন মীতিং অমা সঞ্জেন্থোংদা লৈবা ভেতরিনরি কমপ্লেক্সকী ফার্মরস ত্রেনিং হোরদা ঙসি পাঙথোকখ্রে।

থৌরম অদুদা চীফ গেস্তকী ৱারোল পীরদুনা মণিপুর পোনি সোসাইতিগী প্রেসিদেন্ত প্রোফেসার সি ঐচ প্রিয়োরঞ্জননা হায়, মৈতৈ শগোল অসি ১১০০ ফাওবা ফাজিল্লক্ত্রে। কোভিদকী মতুঙদগী শগোলগী তুর্নামেন্তশিং তৌবা ঙম্লক্ত্রে। পোলো শান্নরক্তবা, শগোলগী চাক্তাফম লৈরক্তবা অমদি খুঙ্গংশিংদা পোলো গ্রাউন্দ লৈরক্তবদগী পোনি অসি ইন্দেঞ্জর ওইরে হায়বসে ময়েক শেংলক্লে।

মহাক্না হায়খি, পোনিগী য়াইফনবা অমদি মখোয়বু য়োকখৎনবগীদমক ২০১৬ তা মণিপুর পোনি কঞ্জার্বেসন এন্দ দিবেলপমেন্ত পোলিসি শেমখি। পোলিসি অসি কয়া য়াম্না ইমপ্লিমেন্ত তৌবা ঙম্লে হায়বসি হনগৎনা য়েংবা মথৌ তাই। মণিপুরগী পোনি অসি গবর্নমেন্তনা কনগদবা নত্তে, মণিপুর মীয়াম্না কনগদবনি। মসিদা হেন্না মরও ওইরিবদি পোলো ক্লব অমদি শগোল শান্নরোয়শিংগী অহেনবা থৌদাং অসিনি।

মহাক্না মখা তানা হায়, মতমগী মতুং ইন্না হৌজিক্তি শেল পায়বা মীশিং থোক্লক্তুনা পোলো ক্লবশিংদা য়াওশিনবা অমদি শগোল লোইবা হৌরে। গবর্নমেন্ততা করি করম্বা খোঙথাং লৌখৎহনসিগে হায়বসি ক্লব অমদি শগোল শান্নরোয়শিংনা লমজিং লমতাকপীয়ু। খুঙ্গংদা শগোলগী কলচর শাগৎপদা গবর্নমেন্তনা মতেঙ পাংবীয়ু। চহী ৩-৪ অসিদা শগোলগী মশীঙ হন্থরিবা অসিগীদি হেনগৎহনবা অরাইবনি। লুরিবদি তুং কোইনা চত্থনবা হোৎনবা অসিনি।

মরম অদুনা অপূনবগী ৱাখল্লোন্দা পোনি অসি করম হায়না কনগনি হায়বসি খন্ননবা ঙসি ফম্লিবা মীফম অসিনা মচা খায়না খন্নদুনা পোনি পোলিসিদা য়াওরিবা সি এমনা প্রেসিদেন্ত ওইবা পোনি দিবেলপমেন্ত বোর্দতা পায়খৎহনগদবা থবকশিং অদু ৱারেপ অমা লৌদুনা পীশিনবগা লোয়ননা বোর্দ অসিদা তাস্ক ফোর্স অমা শেমদুনা থবক পায়খৎহনসি হায়না প্রিয়োরঞ্জননা ফোঙদোকখি।

প্রেসিদেন্তকী ৱারোল পীরদুনা ভেতরিনরি এন্দ এনিমেল হজবেন্দরি সার্বিসেসকী দিরেক্তর দাঃ আর কে খোগেন্দ্রজিৎনা হায়, পোনি পোলিসিগী মতুং ইন্না মতমগা চানবা মওংদা পোনি কন্ননবা প্রেক্তিকেল ওইবা ৱারেপ লৌদুনা মাঙলোমদা চঙশিন্নবগীদমক ঙসিগী মীফম অসি পাঙথোকপনি।

মহাক্না হায়, আই সি এ আরগী মখাদা লৈবা নেসনেল ব্যুরো ওব এনিমেল জেনেতিক্স রিসোর্ছ অসি লৈবাক্কী ওইবা নোদলইন্তিত্যুসননি। এনিমেল রিসোর্ছ অমদি জেনেতিক রিসোর্ছশিং অসি গাইদলাইনগী মখাদা মখোয়দা রেজিস্তার তৌই। শগোলগী ব্রিদশিংগী মনুংদা মণিপুর পোনি অসিসু রিকগনাইজ তৌই। মসিদা নত্তনা কাওনয়েনসু মণিপুরদগী হৌরকপা ব্রিদনি হায়না শকখঙলিবা অসি চাউথোকচনিংঙাইনি।

মহাক্না হায়খি, লাইবস্তোক দাতাগী সেন্সসকী মতুংইন্না ২০০৩দা মণিপুরগী শগোলগী মশীং অসি ১৮৯৩ ওইরম্বদগী ২০১৯ গী সেন্সসতনা ১০৮৯ লৈরিবা অসি মিপাইনিংঙাই ওই। পোনি মশীং হন্থরক্লিবা অসি ওয়েটলেন্দ লৈরক্তবা, চাক্তাফম লৈরক্তবা, অর্বানাইজেসন, এনক্রোচমেন্তনচিংবা ফেক্তর অসি ওইবা য়াই। মসিনা মরম ওইদুনা মখোয়গী নেচরেল হেবিত অসি কায়রকপনি। মসিদা নত্তনা মতম অমদগী পোনি অসি তোঙান-তোঙানবা হীরম কয়াদা শীজিন্নদুনা হিংনবগী মচাক অমসু ওইরম্বা অদু ঙসিদি লেপখ্রে।

পোনি কন্ননবা হোৎনবদা মখোয়গী শীজিন্নফম অসিসু নৈনদবা য়াদবা হীরম অমা ওইরি। পোনি লোইরগা মপু অদুদা ফাইনান্সিয়েল বর্দন খক ওইহনবা য়াবা নত্তে। মতমগী মতুংইন্না লাক্লিবা অহোংবা অসিগা লোয়ননা পোনি অসি করম হায়না কঞ্জার্ব অমদি প্রিজার্ব তৌগদগে হায়বসি নৈনবা চঙই।

কঞ্জার্বেসন অমসুং প্রিজার্বেসন পোলিসিদা নৈনদুনা চঙশিল্লবদি পান্দম অসি থুনা ফংবা ঙমগনি হায়বা থাজৈ। পোনি শীজিন্নবগী মওং অসি হেনগৎহনবা অমা চঙই। তুরিস্ত স্পোর্তশিংদা পোনি থমদুনা শেন্দান লম্বী ওইহনবা অসিদসু মীৎয়েং থম্বা য়াগনি খল্লি। মণিপুরগা চানগদবা মওংদা পোনি অসি শীজিন্নবা য়ানবগী মতাঙদসু ঙসিগী মীফম অসিনা ৱারেপ লৌবীয়ু হায়না দাঃ আর কে খোগেন্দ্রজিৎনা ফোঙদোকখি। থৌরম অদুদা মণিপুর ইক্কেস্ত্রিয়ান এসোসিয়েসনগী চেয়ারমেন এন বেদজিৎনা গেস্ত ওব ওনর ওইনা শরুক য়াখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: