মণিপুরগী ঈরাংঃ ৱার্ল্ড মীতৈ কাউন্সিলনা প্রাইম মিনিস্তরদা অথুবদা খূৎ থিংজিন্নবা দিমান্দ তৌরি
আগরতলা, আগস্ত ১৮ : ঈরাং থোক্লিবা অৱাং নোংপোক স্তেত অমা ওইরিবা মণিপুর অসি ইন্দিয়াগী শরুক অমনি অমসুং চহী অমা হেন্না ভাইওলেন্স মায়োক্নরিবা নেসনেলগী ওইবা কন্সর্ন অমনি। মরম অদুনা হৌজিক মণিপুরদা থোক্লিবা ইথনিক ক্রাইসিন অসি খুদক্তা লেপহন্নবা প্রাইম মিনিস্তর নরেন্দ্র মোদিনা থবক পায়খৎপীয়ু হায়না ৱার্ল্ড মীতৈ কাউন্সিলনা দিমান্দ তৌরি।
ত্রিপুরাগী আগরতলাদা পাঙথোকপা থৌরম অমদা, ৱার্ল্ড মীতৈ কাউন্সিল ত্রিপুরা য়ুনিতকী প্রেসিদেন্ত ঐচ বঙ্কিম সিংহনা, মণিপুরগী ঈরাং অসি থা ১৫ হেন্না চত্থরক্তুনা মীওইবগী পুন্সি ২৫৫ হেন্না মাংহনখ্রে অমসুং মীওই লীশীং কয়া ময়ুম মকৈ থাদোক্তুনা লাঞ্জেন্নরি।
মণিপুরদা থোক্লিবা ঈরাং অসি স্তেত অসিগী পুৱারীদা খ্বাইদগী হেন্না ইকায়নিংঙাই ওইবা তাঙ্কক অমনি। কাঙলূপ অমনা অতোপ্পা কাঙলূপ অমগী য়ূম-কৈ অমসুং লন-থুম মৈ থাদুন মাংহনবা উবদা থম্মোয় য়াম্না শোকই। অঙাংশিংগী তুংগী লম্বী তম্বা ঙমদ্রে, মখোয়গী লাইরিক লাইশু তম্বদা চাউনা শাফু, মীয়ামসু মশাগী মরমদমদা রিফ্যুজি অমগুম নমদুনা হিংহল্লে। মীওই লীশীং কয়া মখোয়গী শেন্থোক লম্বী মাংখ্রে, মী খরদি ৱাবা হেল্লকপদা মশা মতোমতা শিজবা ফাওবা য়াওরে হায়না পাউমীশিংদা ফোঙদোকখি।
ঐচ বঙ্কিম সিংহনা হায়খি, মণিপুরদা অথুবা মতমদা শান্তি হঞ্জিল্লক্নবগী মপূং ওইবা দায়িত্ব অসি প্রাইম মিনিস্তরগীনি। মণিপুর অসি ইন্দিয়াগী শরুক অমনি। করিগুম্বা মীওইবা অমগী হকচাংগী শরুক অমদা মৈ চাক্লবদি মশা পূম্বদা মদুগী চৈনা অদু ফাওই। প্রাইমা মিনিস্তরনা মসিগী অনাবা অসি লৈবাক পূম্বদা চৈনা ফাওদ্রিঙৈদা লায়েংনবা খোংথাংজিনবা হৌগদবনি।
মণিপুরী গবর্নমেন্তপু চৈরদুনা, বঙ্কিমনা হায়খি, এন বীরেন সিংহনা লুচিংবা গবর্নমেন্ত অসিনা হৌজিক ফাওবা তংদু লৈতাবা ফীবমদা পুরকপা ঙমদনা লৈরি। লোকেল অথোরিতিশিংনা শান্তি পুরক্নবা থবক পায়খৎকদবনি লোয়ননা নিংথৌ অমগুম শক্তি লৈরবা প্রাই মিনিস্তরনা স্তেত অসিদা তংদু লৈতাবা লৈহনগদবনি। থা ১৫ হেন্না কাঙলূপকী ঈরাং থোকপা অসিদা মণিপুরগী মিংচৎ থিহনবদা নত্তনা কাঙলুপশিং অমসুং লৈবাক পূম্বদা ফত্তবা ফীবম অমা ওইহল্লে। করিগীদমক ওইরিবা ফীবম অসি লাকশিন্দ্রিবনো।
ঙসি পাঙথোকখিবা থৌরম অদু গ্লোবেল মীতৈ ফাউন্সেনগী ৱার্ল্ড মীতৈ কাউন্সিল ত্রিপুরা স্তেত য়ুনিতনা শীন্দুনা ত্রিপুরাগী সেকেন্দরি অমসুং হায়ার সেকেন্দরি বোর্দ একজামদা মার্ক ৱাংনা ফংদুনা মায় পাক্লবা মহৈরোয়শিংবু পূক্নিং থৌগৎখি। থ
থৌরম অদুগী ৱাঙাঙলোইশিংনসু মণিপুরদা অথুবা মতমদা শান্তি অমসুং তংদু লৈতাবা অথুবা মতমদা হঞ্জিনহনবা তঙাইফদে হায়না ফোঙদোক্নখি। মণিপুরগী ৱাংমদা, হৌখিবা দিকেদ কয়াদগী মণিপুরী কয়া খুন্দা লৈতাদুনা লৈরি। ত্রিপুরাদা মণিপুরী লীশীং ৩০ গী মথক্তা, আসামদা লাক্ষ মরি হেনবা অমসুং অতৈ নোর্থ ইস্ত স্তে কয়াদসু মণিপুরীশিং খুন্দারি। মণিপুরী খরসু য়ূমথংনরিবা লৈবাক বাংলাদেশতা খুন্দারি।
সোর্স: পোক্নফম
0 কমেন্ট:
কমেন্ট তৌবিয়ু