মণিপুরী লোল-ময়েক চাওখৎহন্নবা লুপা কোতি ১৮ খাক্তুনা থমখ্রে
ইম্ফাল, আগস্ত ১৯ : মণিপুরী লোল অমসুং ময়েক চাওখৎহন্নবগীদমক সেন্তরনা লুপা কোতি ১৮ অহানবা ইনস্তোলমেন্তকীদমক খাক্তুনা থমখ্রে। মসিগীদমক মণিপুরগী চীফ মিনিস্তর এন বীরেন সিংহনা প্রাইম মিনিস্তর নরেন্দ্র মোদিবু থাগৎপা ফোঙদোকখ্রে হায়রি।
মণিপুরগী রাজ্য সভাগী এম পি মহারাজা সনাজাওবা লৈশেম্বনা মহাক্কী ‘এক্স’ তা থাগৎলকপা ৱাফম অমদা হায়, য়ুনিয়ন গবর্নমেন্তনা মণিপুরী লোল অমসুং ময়েকপু শকখঙবীদুনা মসিবু চাওখৎহন্নবগীদমক অহানাবা ইনস্তোলমেন্তকী শেনফম ওইনা লুপা কোতি ১৮ খাক্তুনা থমখ্রে।
মসিমক হৌখিবা চহী ২০০০ হেন্না লমদম অসিগী মহৈরোনদগী শীজিন্নরক্লবা লোল অসিবু ইকায়খুম্নবনি। পূম্নমক অসিগী মথক্তা স্তেত অসিগী লোল অসি অতেনবা মতমগী মনুংদা ক্লাসিকেল স্তেতস ফংনবা লম্বীদা চঙশিল্লক্লগনি।
সেন্তরনা মণিপুরী লোল অমদি ময়েক চাওখৎহন্নবগীদমক লুপা কোতি ১৮ গী শেনফম খাক্তুনা থম্লে হায়বগা মরী লৈননা মণিপুরগী চীফ মিনিস্তর এন বীরেন সিংহনা মণিপুরগী রাজ্য সভাগী এমপি ওইরিবা মহারাজা লৈশেম্বা সনাজাওববু থাগৎপা ফোঙদোকখি। লৈশেম্বা সনাজাওবনা মণিপুরী লোলবু ক্লাসিকেল লেংগ্বেজ অমা ওইনবগীদমক চোকথবা নাইদনা হোৎনদুনা লাক্লি।
চীফ মিনিস্তরনা সোসিয়েল মিদিয়াদা ফোঙদোকখিবা ৱাফমদা, স্তেত গবর্নমেন্তনা মণিপুরী লোল চাওখৎহন্নবা হোৎনবগী মথক্তা স্তেত অসিগী ত্রাইবেল দাইলেক্তশিং চাওখৎহন্নবগীদমক তোঙান তোঙানবা কোর্স, এক্তিবিতি অমদি প্রোগ্রাম কয়া পাঙথোক্লি হায়রি।
পনবা য়াবদি, মণিপুরী লোল অসি ঙল্লিঙৈ মতমদগী ঙাঙনরক্লবা মৈতৈলোনদগী শেমগৎলকপনি। লোল অসি আসামগী ওইনসু ওফিসিয়েল লেংগ্বেজ অমা ওইরিবনি। মণিপুরী লোল অসি ইন্দিয়াগী ওইনা ২২ শুবা সেদ্যুল লোল অমসু ওইরিবনি।
সোর্স: পোক্নফম
0 কমেন্ট:
কমেন্ট তৌবিয়ু