ব্রাজিলনা সুইজারলেন্দ থোইদুনা প্রি কোয়াটার ফাইনেল চঙখ্রে
কাতার, নভেম্বর ২৮ : ৯৭৪ ষ্টেডিয়ামদা ঙসি নুমিদাং শান্নখিবা গ্রুপ জি গী মেটচ অমদা ব্রাজিলনা সুইজারলেন্দবু ১-০দা মায়থীবা পীদুনা লাষ্ট ১৬ ক্বালিফাই ওইবা ঙমখ্রে। ব্রাজিলনা মেটচ অনী শান্নবদা পোয়েন্ট ৬ ফংলগা গ্রুপকী মকোক্তা লৈরি। অদুগা সুইজারলেন্দনা পোইন্ট ৩ ফংদুনা অনীশুবদা লৈরি। কেসিমিরোনা নোর্মেল টাইম লোইগদবা মিনিট ৭ ৱাৎলিঙৈ ব্রাজিলগী মায় পাকপগী মরুওইবা গোল চনবা ঙমখি।
মেটচ অসিদা ভিনিসিয়াসনা অনীশুবা হাফ হৌরকপা কুইদ্রিঙৈ শান্নবগী ৬৪ শুবা মিনিটতা ব্রাজিলগী গোল চনখি। অদুবা গোল অদু ওফসাইড তারম্বদগী অরেম্বা তাখি। ভিনিসিয়াসনা অহানাব হাফকী শান্নবগী ২৭ শুবা মিনিটতা গোল চনবা য়াবা শোট অমা সুইজারলেন্দগী গোলকিপার সোম্মারনা নীংথিনা ফাদুনা অরেম্বা তাহনখিবনি। মেটচ অসিদা ব্রাজিলগী গোল চনবা য়াবা তাঞ্জা কয়া ফংলবসু গোল ওন্থোকপা ঙমদনা লাকখিবনি। ব্রাজিলগী মখোয়গী অরোইবা মেটচতা কেমেরুনগা থাংজ নুমিৎতা শান্নরগনি। নুমিৎ অসিমক্তদা সুইজারলেন্দনা সার্বিয়াগা থেংনরগনি।
অতোপ্পা আল জানোব ষ্টেদিয়ামদা শান্নখিবা গ্রুপ ঐচকী মেটচ অমদা কেমেরুননা সার্বিয়াগী গোল ২ মাংজিল থানা চৎলম্বা হন্দোক্তুনা ৩-৩দা দ্রো ওইদুনা পোইন্ট অমমম য়েন্নখ্রে। অমরোমদা, অল বেইট ষ্টেদিয়ামদা নোংমাইজিং নুমিৎকী নোংয়অই মতুংদা শান্নখিবা গ্রুপ ঈগী মেটচ অমদা জার্মানিনা স্পেনগা ১-১ দা দ্রো ওইদুনা লাষ্ট ১৬ য়ৌবগী মংলানা অমুকা হন্না হিঙ্গৎহনখ্রে। স্পেননা মেটচ অনী শান্নখিবদা পোইন্ট ৪ ফংলগা গ্রুপকী অহানবা অদুগা জার্মানিনা পোইন্ট ১ ফংলগা ইরোই লোইবদা লৈরি।
অতোপ্পা ঙসি নুমিদাংৱাইরম এদুকেসন সিটি ষ্টেদিয়ামদা শান্নখিবা গ্রুপ ঐচকী মেটচ অমদা ঘানান সাউথ কোরিয়াবু ৩-২ দা মায়থীবা পীখ্রে। মোহম্মদ সালিসুনা শান্নবগী ২৪ শুবা মিনিটতা ঘানাগী অহানবা গোল চনবা ঙমখি। মোহাম্মদ কুদুছনা শান্নবগী ৩৪ শুবা মিনিটতা ঘানাগী অনীশুবা গোল চনখি। মহাক্না মখা তানা অনীশুবা হাফকী শান্নবগী ৬৮ শুবা মিনিটতা মায় পাকপগী অহুম শুবা গোল চনবা ঙমখিবনি। সাউথ কোরিয়াগী গোল অনী অদুনা চো গুই-সুংনা শান্নবগী ৫৮ অমদি ৬১ শুবা মিনিটতা চনবা ঙমখি।
সোর্স : হুইয়েন লানপাউ
0 কমেন্ট:
কমেন্ট তৌবিয়ু