আপডেট:
image

ইম্ফাল, আগরতলাদগী ম্যানমার, বাংলাদেশ ফ্লাইট লৈরগনি

নিউ দিল্লী, নভেম্বর ২৮ : অৱাং নোংপোক লমদমদা নোংথক্কি লম্বীশিংনা অতোপ্পা মফমশিংগা শম্নহনবগী লৌখৎলক্লিবা খোঙথাংগী শরুক অমা ওইনা অৱাং নোংপোক লমদমগী ষ্টেট অনীদগী অথুবা মতমদা ম্যানমার অমসুং বাংলাদেশকা শম্নবা ফ্লাইটশিং লৈরগনি।

অরুনাচল প্রদেশকি ইটানগরদগী কোলকতা ফাওরগা মুম্বাই য়ৌবা ফ্লাইট ঙসি সিভিল এভিয়েশনগী য়ুনিয়ন মিনিষ্টার জ্যোতিরাদিত্য সিন্দিয়ানা হৌদোকখি। অরুনাচল প্রদেশকি হোল্লোঙ্গি এয়ারপোর্টতগী কোলকাতা ফাওরগা মুম্বাই য়ৌবা ফ্লাইট অসি ইন্দিগোনা ওপারেট তৌবনি। অৱাং নোংপোক লমদমদা ইন্দিগোগী সার্ভিস হেনগৎহন্নবা থৌরাংসু লৈরে।

অৱাং নোংপোক লমদমদা নোংথক্কি লম্বীনা অতোপ্পা মফমশিংগা শম্নহনবগী চাং হান্নদগী য়াম্না হেনগৎলে হায়না পল্লদুনা অৱাং নোংপোক লমদমদা অহেনবা ফ্লাইটশিং মখা তানা হাপচিন্নবসু থৌরাং তৌরি হায়না সিন্দিয়ানা ফোঙদোকখি। মালেমগী লৈবাকশিংগা অৱাং নোংপোক লমদমগী ষ্টেটশিংগা নোংথক্কি লম্বীদা শম্নহনবগী থবকশিং খোঙজেন য়াঙনা লৌখৎলি হায়বা ৱাফম থম্লদুনা সিন্দিয়ানা হায়, অথুবা মতমদা ইম্ফালদগী মান্দালে অমসুং আগরতলাদগী চিটাগাং তান্না পাইবা ফ্লাইটশিং লৈহন্নবা হোৎনরি।

ইম্ফাল মণিপুরদা লৈবনি, মান্দালে ম্যানমারদা লৈবনি, আগরতলা ত্রিপুরা লৈবনি অমদি চিটাগাংনা বাংলাদেশতা লৈবনি। হৌখিবা চহি ২০১৩-১৪ দা অৱাং নোংপোক লমদমদা এয়ারপোর্ট ১৮ লৈরম্বদগী হৌজিক্তি এয়ারপোর্ট ১৬ লৈরে। অৱাং নোংপোক লমদমবু লৈবাক অসিগী গ্রোথ ইঞ্জিন ওইহন্নবা কন্না হোৎনরি হায়বা ৱাফম থম্লদুনা মিনিষ্টারনা হায়, চৎলিবা চহি অসিগী নভেম্বর ১৯ দা প্রাইম মিনিষ্টার নরেন্দ্র মোদিনা ইটানগরগী হোল্লেঙ্গিদা লৈবা দোনয়ি পোলো এয়ারপোর্ট হাংদোকখিবনি।

য়ুনিয়ন মিনিষ্টার সিন্দিয়ানা হৌখিবা চহি ২০১৩-১৪ গী মমাঙদা লৈবাক অসিদা লৈরম্বা য়ুপিএ গভর্ণমেন্টতা য়ৈরদুনা মতম অদুফাওবদা অৱাং নোংপোক লমদমদা করিগী অনৌবা এয়ারপোর্টশিং শেমগত্তনা মাপনখক্তা লৈহল্লম্বনো হায়না হংখি। হৌখিবা চহি নিপাল্লোম অসিনা অনৌবা এয়ারপোর্ট তরেৎ নৌনা শেমগত্তুনা হৌজিক্তি ১৬ শুরে হায়বা ৱাফম মহাক্না থমখি।

লৈবাক অসিগী ষ্টেট পুম্নমক নোংথক্কিলম্বীনা শম্নবা হায়বসি লৈঙাক অসিগী মিসন অমনি হায়বা ৱাফম থম্লদুনা লৈবাক অসিদা লৈরিবা এয়ারপোর্ট পূম্নমক নোংথক্কি লম্বীনা শম্নহন্দ্রিফাওবা মিসন অসি মখা চত্থগনি হায়নসু ফোঙদোকখি। ইন্দিয়ান নেসনেল কংগ্রেসকি ভারত জোড়ো যাত্রাগী ৱাফমদা থোইদোক্না পন্দনা তশেংনমক ভারতপু শম্নহনবা হায়বা তারবদি রেল লম্বী অমসুং নোংথক্কি লম্বীনা অৱাং নোংপোক লমদমগা লৈবাক অসিগী অতৈ মফমশিংগা শম্নহনবা অদুনি হায়বা ৱাফম সিন্দিয়ানা থমখি। ইন্দিয়ান নেসনেল কংগ্রেসকি লুচিংবা রাহুল গান্ধিনা হৌখিবা নুমিৎ ১৫০ নি খোঙনা চৎপা ভারত জোড়ো যাত্রা অম চত্তুনা লৈরিবনি। কন্যাকুমারিদগী হৌরকখিবা খোঙচৎ অসি হৌজিক মধ্য প্রদেশতা লৈরি।

অমারোমদা, হন্দক ইটানগরগী এয়ারপোর্ট হাংদোকখিবদগী ইম্ফাল অমসুং ইটানগরগী মরক্তা ফ্লাইট সার্ভিস লৈখিবগা লোয়ননা মতম শাংনা লেপ্তুনা লৈরক্লবা ইম্ফাল শিলচর ফ্লাইটস অমুক সার্ভিস হৌরবনি। ইম্ফালগী বির টিকেন্দ্রজিৎ ইন্টারনেসনেল এয়ারপোর্ট হেন্না চাওখৎনা অমদি অনৌবা মওংদা শেমগৎপগী থবক হৌজিক কন্না চত্থরিবগা লোয়ননা চীফ মিনিষ্টার এন বিরেন্না অথুবা মতমদা ইম্ফালদগী ম্যানমারগী মান্দালে অমদি থাইলেন্দগী বেঙ্কোক য়ৌবা ফ্লাইট সার্ভিস অথুবা মতমদা হৌনবা থৌরাং তৌরিবনি হায়না ফোঙদোকখিবনি।

পনবা য়াবদি হৌখিবা চহিশিংদা সঙাই ফেষ্টিভেল পাঙথোকপা মতমদা ইম্ফাল অমদি মান্দালেগী মরক্তা ইন্টারনেসনেল ফ্লাইটশিং সার্ভিস তৌখিবনি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: