বাংলাদেশতা খুন্দা লৈতাদুনা লৈরিবা মণিপুরী খুনাইগী ইচিন- ইনাও খুদিংমক্তা কৎথোক্লিবা রওশন আরা বাঁশি খূৎহৈবমগী ‘নীংশিংবগী ঈথক ঈপোম’- মীৎয়েং অমা - তোংব্রম অমরজিৎ
ইমালোন হায়বসিদা য়াওরি ইমালৈবাকপূ নুংশিবা। লমদম তাম্না মীরমদা চৎপদা ইমালোন ঙাংবা মীওইশিং থেংনবদা নুংঙাইবা ফাওই। ইশাগী ফিজেৎ লৈতেং ইনাৎকি ফিজোলদা কনাগুম্বা মশক খঙদবা ওইরবসু অরাপ্পা মীরমদা থেংনবদা পুকনিং থম্মোয়দা নুংশিবা, ৱারী শানিংবা ফাওদবা নত্তে। ইমালোন হায়বসিদা আইদেন্তিতি অমা য়াওদুনা চৎলি। অদুগা ইমালোন হায়বসিদসু খুনাই অমগী পুৱারী, লাইনিং লাইশোল নাৎ, পুন্সি মহিং, কলচরেল মেটরিজমগী মচাক, সোসিয়েল এন্থ্রোপোলোজি ফাওবা য়াওরি। ইমালোননা হৌখ্রবা মীরোল ঙসিগী মীরোলগা তুংদা লাক্কদবা মীরোলগা শম্নহল্লিবা থোং অমা শাদুনা লৈরি। লোন হায়বসিদা নোলেজ পূম্নমক লাচনদুনা থম্লিবনি। মীওইবা খুনাইদা অসিগুম্বা ইমালোনগী মরু ওইবসি হেন্না মশক থোকনা খঙহল্লম্লিবসি বাংলাদেশ লৈবাক্কী চাওরবা খুদোল অমনি হায়না লৌদবা য়ারোই।
লাইরিকী মমিং- নীংশিংবগী ঈথক ঈপোম(২০২৫)
অইবী- রওশন আরা বাঁশি খূৎহৈবম
অফোঙবা- নাজমুল হক নাজু
ঘাস প্রকাশন, মাছুদিঘির পাড়, সিলেট
লাইরিক্কী মখল- শৈরেং
লাইরিক্কী মখূম শিহাব মোস্তাকিম আপন
লাইরিক্কী মমল- লূপা ৩০০/
লমায় মশিং- ১৩৮ মৈতৈ ময়েক য়াওরগা
রওশন আরা বাঁশি খূৎহৈবম ১৯৭১গী ডিসেম্বর ১৪দা মৌলভীবাজার জিলাগী কমলগঞ্জ থানাগী মনুং চন্না লৈবা কোনাগাও খুঙ্গংদা পোকখি। অপোকপগী মীং মরহুম নাছির উদ্দিন অমসুং অপোকপীগী মীং নুরুননেছা বেগম কৌই। অঙাং ওইরিঙৈদগী সাহিত্যদা ঙাওজদুনা লাকই। শৈরেং, ৱারীমচা অমদি ঈশৈ নোংমাইদা থৱায় য়াওজরকই। অইবী অসিগী হৌজীক ফাওবদা বেঙ্গোলি লোনগী শৈরেং লাইরিক মঙা ফোঙখ্রে। বংলাদেশতা লৈবা সাহিত্যগী লূপ কয়াগসু খুৎশম্নদুনা সাহিত্যা অমদি লোনগী থবক থৌরম কয়াদা ইচং থৌনা হোৎনরি। বাংলাদেশ মণিপুরী সাহিত্য সংসদ, পাঙাল সাহিত্য সংসদ অমসুং বিশ্ববাংলা সাহিত্য ও সংস্কৃতিক পরিষদ অসিনচিংবা লূপশিংগা খুৎশম্নদুনা থবক কয়া তৌরি।
ইমালোন হায়বসিদা য়াওরি ইমালৈবাকপূ নুংশিবা। লমদম তাম্না মীরমদা চৎপদা ইমালোন ঙাংবা মীওইশিং থেংনবদা নুংঙাইবা ফাওই। ইশাগী ফিজেৎ লৈতেং ইনাৎকি ফিজোলদা কনাগুম্বা মশক খঙদবা ওইরবসু অরাপ্পা মীরমদা থেংনবদা পুকনিং থম্মোয়দা নুংশিবা, ৱারী শানিংবা ফাওদবা নত্তে। ইমালোন হায়বসিদা আইদেন্তিতি অমা য়াওদুনা চৎলি। অদুগা ইমালোন হায়বসিদসু খুনাই অমগী পুৱারী, লাইনিং লাইশোল নাৎ, পুন্সি মহিং, কলচরেল মেটরিজমগী মচাক, সোসিয়েল এন্থ্রোপোলোজি ফাওবা য়াওরি। ইমালোননা হৌখ্রবা মীরোল ঙসিগী মীরোলগা তুংদা লাক্কদবা মীরোলগা শম্নহল্লিবা থোং অমা শাদুনা লৈরি। লোন হায়বসিদা নোলেজ পূম্নমক লাচনদুনা থম্লিবনি। মীওইবা খুনাইদা অসিগুম্বা ইমালোনগী মরু ওইবসি হেন্না মশক থোকনা খঙহল্লম্লিবসি বাংলাদেশ লৈবাক্কী চাওরবা খুদোল অমনি হায়না লৌদবা য়ারোই। উর্দুনা স্তেত লেঙ্গুএস ওইগদবনি হায়না লাওথোরকপদা ১৯৪৮- ১৯৫৬ ফাওবা ইস্ত পাকিস্তানদা অচৌবা লোনগী ইহৌ অমা লাকখি। পুলিসনা মহৈরোইশিং য়াওনা মীওই মঙা নোংমৈনা কাপখি।মমালোনগীদমক থৱায়না পোন্থা পীখি ১৯৫২গী ফেব্রুৱারি ২১দা। মসিদগী বাংলানা মমালোন ওইজবা ইস্ত পাকিস্তানদা বেঙ্গেলি নেস্নেল আইদেন্তি অমা শাগৎলক্তুনা ১৯৭১গী বাংলাদেশ লৈবাক শেম্লকনবগী মরু হুনখি। ইস্ত পাকিস্তান ওইরম্বদগী বাংলা লোননা অমদি মমালোন নুংশিবগী শিবা কিদ্রবা নেস্নেলিজমগী স্পিরিত্তা বাংলাদেশ পোকখি দিসেম্বের ১৬, ১৯৭১দা। অসিগুম্বা য়াম্না নিংশিংনিঙাই ওইবা মালেমগী মনিং মখা তম্বা লৈবাক পোকলকখিবগী ৱারী মরক্তা অইবী রওশন আরা বাঁশি খূৎহৈবমসু তাইবঙ খোঙদারকখি দিসেম্বর ১৪, ১৯৭১দা। মালেমগী মীয়ামদা ঙসিদি য়ুনেস্কোনা ১৯৯৯দা লাওথোকখিবগী মতুং ইন্না ফেব্রুৱারী ২১বু মালেমগী ইমালোনগী নুমিৎ হায়দুনা মফম কয়াদা নিংশিং নুমিৎ থৌরমশিং পাক শন্না পাঙথোকনরি। মসি বাংলাদেশকী মমল য়াম্লবা খূদোল অমনি।
অইবগী শৈরেং লাইরিক অসিদা পুন্না শৈরেং ৪৬ য়াওরি। শৈরেং অয়াম্বা য়াম্না চংখোন্না ইবা থেংনৈ। লাইরিক অসিদা য়াওবা শৈরেংশিংগী মরক্তা তরেৎসুবা শৈরেং ‘মহাক্তি ঐখোয়গী থৱায়গী মরীনি’ হায়বসি মিংথোলগা কন্তেন অসিগা ওন্থোকনা চাশিন চুশিন্ননা ইরকই। অইবীগী সঙ্গাইদা বাংলেদশকী ফাদর ওফ দি নেসনসু ওইরিবা অদুগা লোলগী ইহৌদা অমদি বাংলাদেশ লৈবাক শেম্লকপদা ফিদম্নিংঙাই ওইবা লুচিংবা অম ওইখিবা সেখ মুজিবুর রহমানগী ফোটো অমা থেৎলগা লৈরম্বদু মহাকনা মীরোল তারকপদগী লৈরম্লে। বাংলাদেশ লৈবাক্কি অপোকপা অদুগা বাংলা মীয়ামগী লূচীংবা, মীচম মীয়াম্বূ মীকপ থোকহল্লম্বা লুচিং পুরেল মহাক্কী মরমদা করম্নদি শৈথাদবা ঙমগনি অইবীনা। অদুনা ইরক্লি, “ মহাক্তি শাজিবুগী ঈমায় চোল্লবা তুরেলনি/ মাগী থম্মোয়দি পূমহাং হাংবা অতিয়ানি,/ মহাক্তি অতোপ্পা কনাসু নত্তে/ ঐখোয়গী থৱায়গী লুচিংবা/ বঙ্গবন্ধু শেখ মুজিবুর রহমাননি।/ তোৎশন্নদুনা লৈরি লমদমসিগা মহৌশাগী মরক্তা,/ নোঙ্গাখ্রবসু মহাক্তি/ অমরনি বাঙ্গালীশিংগী থম্মোয়নুংদা।/ নীংশিংবগী ঈথক ইপোম/ লমদমসিগী কাচিন কোয়া শিনবা থুংনা তাবা ফঙলি/ মাগী থম্মোয়দগী চোংলকপা মিহুলগী খোঞ্জেল।/ বাংলাদেশ ইমানা লৈরিবমখৈ/ লমদমসিগী ঈশিং নুমিত্তা/ অতিয়া খেৎনা পাইদুনা লৈহৌরনি… ” (লাঃ ২১) লৈবাক অমা খুনাই অমা লুচিংলম্বা মঙালগী লম্বেল অমা তাকপীরম্বা মহাক অদুবু ইকায়খুম্নদুনা তর্পন কৎপনি।
য়াম্না নোস্তালজিক ওইবা নুংশিবনা থল্লবা শৈরেংনি ‘ঈদ’। পুন্সি অসিমক নীংশিংবা অমদি নুংশিবনা চেৎনা পুন্দুনা পুরি হায়বসি শৈরেং অসিনা ফোংদোক্লি। নুংশিবা ময়েং তারক্লবা, নীংশিংবা হায়বসিসু লাপ্না তাম্না চৎখিবা মিকুপশিংদদি ৱাহন্থোকসু মচেৎ মচেৎ মাংবগুম তৌরক্তবা নত্তে। অদুনা নিংশিংবা অমসুং নুংশিবা অনীসিমক লাইৱানি, অমৃতনি হায়দবা ঙমদে। কবিনা ঈদপু মহাক্কী চান্নজরবী মতা অমগুম শৈথারকলি, “ ঈদ/ নঙদি ইতানি ঐগী অঙাং ওইরিঙৈগী/ কায়নখ্রবা মতম কুইনা/ অঙাং ওইরিবা ঐখোয়না/ চেন চোংদুনা শান্নখিবা/ হাঙলবা লৌবুক লমহাং চীংয়া তময়া/ নুমিদাং মুশি মুশি চাক্লিবা থাউমৈ/ ঊপাল ৱাপালণা কূপশিল্লবা খাঙপোকশঙ মাঙ্গোল শুমাঙ।/ কুইরবনি ঐনা নঙবু/ ফাজিন্দুনা থম্লিবা থম্মোয়নুংদা/ মচু মচুগী কুরাক্কুম/ কোয়পাই পাইরিবা পূকনিংগী লৈকোলদা ঐগী…” পুন্সিবু ঈদকি নুংঙাইরবা মিকুপশিংদা ফাওরকখিবা অমকপা লৈত্রবা থম্মোয়গী নুংশিবা অঙাং ওইরিঙৈগী মশক অমা হনগৎনা য়েংদুনা ইরকপনি। মসিদা য়াওরি ইচম চম্বা পুন্সিগী য়াম্না নুংশিবা মশক অমা।
মতিক চাওবা মপাঙ্গল লৈরবা মালেমসিদা নু্মিৎ তাবা লৈতে খন্নখিবা বৃতিশ লৈঙাকপূ শিংনখিবা মনিপুরগী অথৌবা যুবরাজ টিকেন্দ্রজিৎকি থৌনা লিংজেল, মজাতি মরমদম নুংশিবা, কত্থোকপা কয়াবূ শৈথারদুনা ইরম্লি কবিনা, “ নুংশিজরবা পোকনফম ইমাগী/ থৌনা ফবা নিংথৌমচা টিকেন্দ্রজিৎ/ নোকনা শগাই কাখিবা/ ফাঁসি কোঙ্গোই হুকখিবা/ নীংশিংলি ঙসি/ আগস্ট তরাহুমদোইনা লাকপসিদা।/…নহাক্কী কত্থোকপগী থৌনাবু/ শৈথাজরি রবিন্দ্রনাথকী শৈশক পরিংদা/ “নহাক্তি লৈরনিদো তুমিন্না/ ঐগী চীক্লবা থম্মোয়নুংদা”/ মীওই পুম্নগী থম্মোয় অতিয়াদা/ অচুম্বগী মঙাল ফুদোক্লবা থৱানমিচাক ওইনা/ লৈরগনি অসুম ঙান্দুনা/ মালেম লৈমনা লৈরিমখৈ।/ হে মীচং মীখায় নাইদবা/ পনখৈ লৈতবা মালংবা/ পুবিয়ুনে পাউজেলসে ঐখোয়গী/ ইরমদম মনিপুর য়ৌনা/ অৱাগী তমথিবা নোংলৈদুনা/ চাইথোকপীরম্লবসু মচোই মচোই/ শুরোল কয়া কয়াদগী/ লাক্লী নীংশিংদুনা/ অথৌবশিংগী নুমিৎসু/ বাংলাদেশ কৌবা লমদমসিদা।” (লাঃ ২৬) লাপ্না তাম্না বাংলাদেশতা খুন্দা লৈতাদুনা লৈরবসু ঈগী হৌরকফম ওইরিবা ইমা লৈবাক মণিপুরবুদি মতম লৈবা খীবিক্তা নিংশিংলি হায়বদু শৈরেং অসিনা লেংদ্রবা খুদম্নি। থম্মোয়গী ওইবা মরি অমা শাগৎলি অমদি ইপা ইপুগী হৌরকফম শাৎফম ওইরিবা লমদম অসিবু কাওথোকপা লৈতে হায়বদু ময়েক শেংনা ইরকপনি অইবীনা।
রওশন আরা বাঁশি খূৎহৈবমনা ইমালোনবু নুংশিনা শৈথারদুনা ইরকপা শৈরেংনি ‘ইমালোন’ মসিসু ফজদে করম্না হায়গনি। অইবগী খুৎই নুংশিবদা য়ুম্ফম থোল্লি অদুনা মহাকনা শিজিন্নরিবা লোনশীং মশানা অদুম য়াম্না থোৎ নৌবা থেংনৈ। অইবীনা ইরক্লি, “ পলেম ইমাবু থম্মোয় শেংনা নুংশিজৈ/ নুংশিজৈ ইমাগী লোন মৈতৈলোনবুসু/ ঐগী অৱা-নুংঙাইগী পোত্থাফম্নি লোনসিনা/ অঙাং ওইরিঙৈ নাওশুম ঈশৈ শক্তুনা/ শুম্বীখিবনি ইমানা ঐবু।/ ঙসিসু নাপদা য়ৈরি নাওশুম ঈশৈগী খোঞ্জেলদো/ লোনসিদা নোকচৈ লোনসিদা কপচৈ/ থম্মোয়গী অপেনবা হরাওবা নুংঙাইবা খূদিং/ পেন্না ফোঙদোকচফম ওইরিবা/ ঐগী পামজরবা ইমালোন হে মণিপুরী লোন…” ইমালোনসে ঙসিদি মীরায়বগুম তৌনরকলিবা ফিভম অসিদা অইবীনা পাউমেল্লক্লি, “ইমালোনবু চেকশিন্না ঙাক শেল্লসি/ থম্মোয়দা ইমালোন নুংশিবগী/ অনৌবা ইনোৎ হাপ্লসি।” (লাঃ ৩১) তশেংবসু ঙসি ঙসিমক হৌরক্লিবা মীরোলশিংনা মীগী লোল য়াম্না ঙাংলগা লাইরিক লাইশু হৈবা, অখঙ-অহৈ ওইনা লৌবা থৌওংশিং অসি লেপ্পা মতমদি ওইরে। নত্রগদি ইমালোন অসি মতমগী মতুং ইন্না শিজিন্নবা মীগী মশিং হন্থরক্লবদি মশানা ইনাকখুললে হায়রম্লগা অদুম্মক ময়েং তারকপা শিথারকপা হৌনশানি। অদুনা অইবীনা মতাং চানা হায়রক্লিবসি পুম্নমক খন্থমিন্নবা য়াম্না মরু ওইরক্লি।
লাইরিক অসিদা অতোপ্পা ফজবা, পাবা য়াবা, ৱাহন্থোক লৈবা শৈরেংশিং, ‘সমুদ্রদা ইবা চিঠি’, ‘খৌরাংনা ঙাইজরম্বা কুমগী নোং’, ‘ঐবু লোই থাবীয়ু’, ‘মহৌশাগুম হৌজিকসু লাই য়েক্লিব্রা’ অসিনচিংবা শৈরেংশিংসু য়াওরি। শিজিন্নরিবা ৱাহৈ ৱাতা, ফোংদোক্কে খনবা থিমশিং মপুং ফানা অদুমক ফোংদোক্তুনা অপাবশিংদা ইথিল পিবা ঙম্মি। মথংগী শৈরেং লাইরিক অমা খৌরাংনা ঙাইজরি। মনিপুর শৈরেংগী পুক্কৈদা অচৌবা খুদোল অমদি ওইরে লাইরিক অসিমক।
0 কমেন্ট:
কমেন্ট তৌবিয়ু