• 181
• ৯ই মার্চ ২০২৬ ইং
• Share on:

বঙ্কিমচন্দ্রগী অঙকপা ৱায়েল -- মাইবম তোলেন

ভারতকী অহানবা নীংতম লাল সিপাহী লালহৌ খৃস্ত কুম ১৮৫৭ কী মথংগী চহী খৃ. কুম ১৮৫৮ দা বাঙ্গালী মরক্তগী মীওই অনীখত্তা অহানবা ওইনা গ্রেজুয়েসন পাস তৌখি মখোয় অদুদি-বঙ্কিমচন্দ্র চট্টোপাধ্যায় অমসুং যদুনাথ বসুনি। বঙ্কিমচন্দ্রদি চহী অদুমক্কী জুলাই থাদা দিপুতি মেজিস্ত্রেত ওইনা চঙখি। মহাক্না বরাসত মহকুমাদা দিপু্তি মেজিস্ত্রেত ওইরিঙৈ মতমদা থোকখিবা অশেংবা থৌদোক্নি।

নোংচুপ বঙ্গগী অরাপ্পা খুঙ্গং রহিমগঞ্জদগী হরিনাথ ভট্টাচার্যনা কোলকাতাদা লাইরিক তম্লিবা মচানুপা নাবগী পাউ তাদুনা নোংজুগী নুমিৎ অমদা খোঙশান্দুনা লাকখি। কোলকাতা য়ৌবা ঙমদদুনা বরাসত সহরগী লম্বী মনাক্তা লৈবা মান্দপ অমগী লাইপুদুগী অয়াবা লৌরগা অহীং অমা য়ারেক্নবা মান্দপগী কাচিন অমদা ফক অমা থারগা নুমিদাংদু লেন্নবা হীপ্তুনা লৈখি। মহাক তুম্বা য়ারমদে মচাগীদমক খনবদা। অহীং নোংয়াই মতুংদা মীওই অমা প্রপ-প্রপ চঙলক্লগা লাইশগঙগী থোঙ হাংলগা উপুমচা অমা পুথোরক্তুনা নাকন্দা য়েপ্লগা নাশোন পীক্লা প্রপ-প্রপ চৎখি। হরিনাথ ফুক হৌগৎলগা নুপাদু তান্নরগা উপু মচাদু মুন্নবগীদমক নুপাদু লাক্ন-ফানবা হৌখি। হুরানবদু হরিনাথগী মখুৎতগী নান্থোকপা গুমদ্রে। হরিনাথনা 'হুরানবা ফারে, হুরানবা ফারে' হায়দুনা লাউবা হৌখি। নুপা অদুসু উপু'দু মনাত্তা থাদরগা মহাকসু 'হুরানবনি হুরানবনি' হায়না লাউবা হৌখি। লাউনবা তাবদগী অহীংদুদা লৈকায়গী মীয়াম থোরুরক্তুনা ওমশিন্নরক্লে। হরিনাথনা হায়- নুপা'সিনা লাইশঙগী শেলগী উপুসি হুরাল্লগা পুথোরকপা উবদগী মহাক্লা তান্নরগা ফাবনি। অতোপ্পা নুপা'দুনা হায় ঐহাক পুলিস ওইবনি, অহীংসিদা মহাক্লা মথৌ পাঙথোক্লিঙৈদা নুপাসিনা উপু অসি পুরগা চেনবা উবদগী ফাবনি। মখোয় অনীগী ৱারোল তারবা মতুৎদা মীয়ান্না অশেংবদু খঙদোক্নবা মখোয় অনীমক পুলিসকী মখুৎতা শিন্নখি।

                               বঙ্কিমচন্দ্র চট্টোপাধ্যায়

ফারবা মখোয় অদুদি-শ্রীহরিনাথ ভট্টাচার্য, চহী ৪৮, অপোকপা লৈখিদ্রবা বিনয় ভট্টাচার্য, লৈফম হরিমগঞ্জ, মহকুমা-বরাসত, নোংচুপ বঙ্গ, অদুগা অতোপ্পা অদুনা মোঃ জোৱান আলী, চহী ৪৬, অপোকপা রহমত আলী, লৈফম-বিশালগ্রাম, মেদিনীপুর, নোংচুপ বঙ্গ। মখোয়দা পাল্লিবা মরাল অদুনা, আই পি সিগী সেক্সন ৩৭৮ নি।

পুলিসনা ৱায়েল চৈরাপ্তা মখোয় অনীবু পুখৎলে। চৈরাপ অদুগী চীফ জুদিসিয়েল মেজিস্ত্রেতনা বঙ্কিমচন্দ্র চট্টোপাধ্যায়নি। ৱায়েল লোয়শঙনা মখোয় অনীগী পাউখুম তারবা মতুংদা চয়োল অমা ফাজীদুনা থম্নবা য়াথং পীখি। নুমিৎ নিপালশুবদা মখোয়বু ৱায়েলগীদমক চৈরাপ লোয়শঙদা অমুক পুখৎলকখি। চৈরক' সিদা জোৱান আলীনা মহাক্কী মায়কৈদা সাক্ষী অনী পুথোরক্তুনা মহাক মরাল লৈতবা, অফবা, পূকচেল শেংনা মথৌ পাঙথোকপা পুলিস অমনি হায়বদো উৎনবা হোৎনরকখি। মায়কৈ অমরোমদা অরাপ্পা খুঙ্গংগী হরিনাথকী মায়কৈদা ৱাহৈ অমত্তা ঙাঙবিনবা মীওই অমা ফাওবা লৈখিদে। নুমিৎ অদুদা ৱায়েল লোয়শঙনা অচুম্বা ৱায়েল হায়দোকপদা অরুবা ওইবনা মথংগী চয়োলদা অমুক য়ৈথোকপা তাখি।

জজ বঙ্কিমচন্দ্র মপুক্নিং লৈতাবা ফংখিদ্রে। লাইরিক ইবা থবক চপ লেপখিবা চয়োল অনী ফারক্লে। করম্না অচুম্বা ৱায়েল পীগনি খনবদা অৱাবা ওইখি। মথংগী নুমিৎতা ৱায়েল হায়দোকপগী নোংমা ৱাৎলিঙৈ মমাঙদা হীদাকফুন্দা তোংজৈ ফান্দুনা করম তৌসিগে খনবদগী থৌশীল অমগী পোরম য়াৎপা হৌখি। খুদক্তা মহাক্কী লোয়শঙগী পেশকার ওইবা ব্রজলালবু মশাগী ময়ূমদা কৌরগা ৱায়েলগা মরী লৈনবা লীলাগুম্বা পোরম শেমদুনা ব্রজলালনা মথং-মথং পাঙথোক্কদবা মথৌদাং পূম্নমক তাকপী-তম্বিদুনা নীংথিনা ৱাখল তাহনখি।

ৱায়েল লাউথোক্কদবা অদু চৈরাপ লোয়শঙদা কনানা অচুম্বনো- কনানা হুরানবনো খঙনীংবগীদমক মী য়াম্না তিনখি। জজ বঙ্কিমচন্দ্র লোয়শঙদা চঙলদুনা ৱায়েল মপুগী তাঙবন্দা ফম্লরে। মরাললৈরবা মীওই অনীমক উচন খাজীল্লবা পাউ হংফমদা কৌখৎতুনা লৈহনখি। তাঞ্জা'দুদা ৱায়েল লোয়শঙগী চম্প্রাসী অমা হোবে-হোবে চেনশিল্লক্তুনা স্বর থবেৎ-থবেৎ হোন্না মথুৎ অনী লোন্দুনা হায়রকথি-
ধর্মাবতার, ঐখোয় লোয়শঙগী পেশকার ব্রজলাল অধিকারী লম্বীদা শিদুনা তারগা লৈহৌরে।

 - কদায়দনো?
 - অসিদগী পুংখায়মুক চৎলগা বশিরহাত লম্বীগী পুখ্রী মপান্দনি।
 - অদুদি ঙাইখো, পুলিসতা পাউ পীদ্রিঙৈ মমাঙদা অশিবদু অসিদা হান্না পূরক্নবা তৌসি।
- অদুদি করম্না পুরক্কনি হুজুর? অশিবা পুবা দোমগী মীওইশিংসু থিবা ফংলোই।

জজ ঙাইহাক ৱাখল তৌই- হায়রকই, অসুম তৌরসি- ঙসিগী ৱায়েল চৎথরিবা মখোয় অনীমক পুরগা চৎলো, মখোয় অনীনা অশিবা হকচাংদু পুরুক্লবা মতুং মখোয়গী অরোইবা ৱায়েল লাউথোক্লনি। চম্প্রাসীনা হরিনাথ অমসুং জোৱান আলী পুরগা চৎখি। কোর্তকী পুলিস অনীদা মখোয়বু লাপ্তক্না শেন্নবগী য়াথং তৌখি।

পূং অমরোম লৈরগা ব্রজলালগী অশিবা হকচাংদু অথাবা ফিনা য়োম্লগা মদুদা খুদূপ নিপাল্লোম ৱা অমদা পাবোৎ শেম্লগা জোৱান আলী অমসুং হরিনাথ মখোয় অনীগী মরেঙবান্দা খাউত্রুক শানা পুরক্তুনা ৱায়েলশঙদা থুংলরে। জজনা হৌগৎতুনা য়েংখি, অশিবদু লেঙলি-লেঙলি তৌরক্লগা ফুক হৌগৎলগা লেপ্লকখি- মথংদা চুমদ্রিং চঙলক্তুনা উচন্না খাজীল্লবা সাক্ষী পীফমদা লেপ্তুনা লৈখি। মীয়াম পূন্নমক পুমঙক ঙকখি উনমুক চীকই।
জজনা ৱায়েল চৎথবা থৌদা পাঙথোকপা হৌখি। ব্রজলালনা হায়রকই- ধর্মবতার, হরিনাথ ভট্টাচার্য হুরানবা নত্তে, অশেংবা হুরানবদি জোৱান আলীনি-ঐহাক্লা হুজুরগী পাউতাক মতুং ইন্না মরাল লৈবা মীশক খঙদোক্নবা অচুম্বগী মায়কৈদা লেপ্তুনা অশেংবা ৱাফম ফোঙদোকচগে।

ঐহাক্না অশিবা শাদুনা মখোয় অনীনা পুরকপা মতমদা মখোয়না শানখিবা ৱারীদু পাউদমজগে।
 হরিনাথ- হন্দক্কী মপোকসিদা ঐগী মিংচৎ, জাৎ পূন্নমক লৈখা তাবা হায়বদো ওইরেকো, ব্রাহ্মণ ঐনা মী অশিবগী হকচাং লেংথোংনদুনা পুরবনিকো অঙকপনি, ইরায়বক্তা অসুম থোকউ তম্লম্বোইরে।
 জোৱান আলী- নঙনা ঐবু ফাবা মতম'দুদা উপুদা য়াওরিবা শেনফমসি তঙ্খায় য়েন্নদুনা লৌমিন্নসি হায়রম্লবসু ঐনা য়ারমগনি- ঙসি ঐখোয়না নংলিবা অৱাবসিসু নংলম্মোই- নঙদি মদুম তৌদনা অনম কন্না ঐবু ফাবদগী অসি থোক্লিবা নৎত্রা?
 হরিনাথ- ঐনা নঙবু ফারমদ্রবদি লাইশঙগী শেনফমদু ঐনা হুরানবা তারোইদরা?
 জোৱান আলী- নোংঙান্দ্রিঙৈ নঙ তুমিন্না চেনখ্রগা লোইরে। নঙগী নমিং-নথা-লৈফম কনানসু থিদুনা পুথোকপা ঙম্লোই। য়েংঙোই-  ঐদি পুলিস ওইবনিনা সাক্ষী অনীনা ঐগী ইরাল লৈতে হায়না কোর্ততা জবন পীখ্রবনি- হৌজিক আইন্না ঐগী তুহাউ অমা ফাওবা থদৎপা ঙম্লরোই- অদুগা নঙদি জেলগী হৱাই চাবা নত্তনা করি অমুক তৌফম লৈরিবগে?
 হরিনাথ- লাইবক্তা তম্বা অমদি লৈরমগনি- মদুদগী কনাসু নান্থোকপা ঙম্লোই। খ্বাইগী মথত্তা অচুম-অরানবু উবা ফৎলিবা মপু অমসু লৈরিদনা...।
মখোয়বু শেন্নবা পুলিস অনীনা মনাক য়ৌশিল্লকপদা মখোয়গী ৱারী শানবা লেপখি।

হরিনাথ অমদি জোৱান আলীগী ৱারীদু ব্রজলাল ইংরাজী গ্রামারগী দাইরেক্ত স্পিচতা লীবদু তাবদগী জজ বঙ্কিমচন্দ্রনা জোৱান অলীদা য়েংলকখি। জোৱান আলী মমায় লুকথখি, জজনা হরিনাথপু মরাল লৈতে, অশেংবা হুরানবদি জোৱান আলীনি হায়না লাউথোক্তুনা চহী অহুম কৈশুমশঙদা থম্নবা য়াথং পীখি।

কোর্টেসি- পোক্নফম 

[ বঙ্কিমচন্দ্র চট্টোপাধ্যায়না অঙকপা পাম্বৈ পুথোক্তুনা অচুম্বা ৱায়েল পীখিবা থৌদোকসি বাংলা লোলগী চেফোঙ ভারতী পত্রিকাদা ইং ১৮৯৯ দা সরলা দেবীনা খোরিলাংদুনা ফোঙখ্রবা ৱারীনি। - অইবা ]