পুয়া মৈ থাখিবগী চহী ২৯৪ শুবা নিংশিং কুমওন থৌরম পাঙথোক্লগনি
ইম্ফাল, জানুয়ারি ৭ : পুয়া মৈ থাখিবগী চহী ২৯৪ শুবা নিংশিং কুমওন চহী খুদিংগী পাঙথোক্তুনা লাকপগুম হন্দকসু ইন্টারনেসনেল ওবজার্বেসন কম্মিটি ওন পুয়া মৈ থাবা (সিওপি) না শিন্দুনা লাক্লিবা ৱাকচিংগী ২৩ না শিন্দুনা লাক্লিবা ৱাকচিংগী ২৩নি পানবা জানুয়ারি ১৫, ২০২৩ নোংমাইজিং নুমিৎতা ইরৈপাক্কী অরিবা কোনুং কংলা অমদি ককচিং ডিষ্ট্রিক্টক্কী মনুং চনবা এলাংখানপোকপীনা পাঙথোক্লগনি হায়না কম্মিটি অসিগী চিয়ারমেন আরভি মিংথিংনা ফোঙদোকখ্রে।
ঙসি পেলেস কম্পাউন্দদা লৈবা ইবোয়াইমা শুমাঙ লীলা শঙলেন্দা পাঙথোকখিবা পাউমীশিংগা উনবা অদুদা আরভি মিংথিংনা মীপুম খুদিংনা থৌরম অসিদা শরুক য়াবীয়ু হায়খি।
কম্মিটি অসিগী কনভেনর মোইরাংথেম নাওখোম্বা মীতৈনা ফোঙদোরকখিবদা থৌরম অসিদা লমদম অসিগী অপুনবগী শক্তম শাগৎনবা হোৎনবদা অচৌবা থৌদাং কয়া লৌখিবা অমসুং য়েলহৌঙৈদগী লমদম অসিদা নুংশি চান্ননা লৈমিন্নরক্লবা চীংবুরোই তম্বুরোই অসিগী মরক্তা হেন্না অচেৎপা মরী পুরক্নবা হোৎনবদা শিংথানিংঙাই ওইবা থবক থৌরম কয়া তৌখিবা শক্নাইরবা মীওইশিংদা চহী খুদিংগী খুদোল তমদুনা লাকপা মাইচৌ নিংশিং মনা অমদি চীংমী তম্মী নুংশি লীপুন মনা খুদোল তমগনি।
ইকায়খুম্নবগী মনা অসি হন্দক চহীগী ওইনা মাইচৌ নিংশিং মনা অসি এলাংখানপোকপী অৱাং লৈকাইদা লৈবা লৈখিদ্রবা এলাংবম তোম্পোক মীতৈদা পীবগা লোয়ননা চীংমী তম্মী নুংশি লীপুন মনানা উখ্রুলদা লৈবা আর দোমিনিক ওহাওদা পীরগনি। মনা অসিদা শেল ওইনা লুপা লীশিং ১০, সাইটেসন, লেংয়াননচিংবা য়াওরি হায়রি।
মহাক্না মখা তানা ফোঙদোকখিবদা মপুং ওইবা থৌরম অসিগী মাঙওইননা লাক্লিবা জানুয়ারি ১৩দা পুয়া মৈ থাখিবগী থৌদোক অদুবু অৱাবা ফোঙদোকপা ওইনা ইম্ফাল ইষ্টকী মনুং চনবা সেক্তাদা লৈবা ইটর্নেল স্প্রিং স্কুলদা ব্লেক দে ওবজার্বেসন পাঙথোক্কনি।
থৌরমগী মনুং চন্না মহৈরোয়শিংদা অমুবা বেজ থেৎতুনা অমদি মচু তরেৎকী ফিরাল তঙ্খাই চীংথদুনা জানুয়ারি চৈচৎ ১৫ ফাওবা নুমিৎ হুম্নি চুপ্না অৱাবা ফোঙদোক্কনি হায়রি। লোয়ননা মপুং ওইবা থৌরম নুমিৎকী অয়ুক পুং ৭ তাবা মতমদা কংলা উত্রা মমাঙদা পুয়া মীকৌবগী থৌরম পাঙথোক্লবা তুংদা অয়ুক পুং ১১ তাবা মতমদগী মপুং ওইবা থৌরম ককচিং ডিষ্ট্রিক্টকী মনুংচনবা এলাংখানপোকপীদা পাঙথোক্কনি হায়খি।
পুয়া মৈ থাখিবগী নিংশিং থৌরম অসি মীতৈ নেসনেল ফ্রন্টনা ইং ১৯৭৮ দগী চহী খুদিংগী লেপ্তনা পাঙথোক্তুনা লাকপনি অদুবু ইং ২০১১ দগী হৌনা মপান লৈবাক্কী মীহুৎশিং অমদি লমদম অসিগী লুপ কয়া পুনশিন্দুনা ইন্টারনেসনেল ওবজার্বেসন কম্মিটি ওন পুয়া মৈ থাবা (আইসিওপি) শেমদুনা পাঙথোকপা হৌখ্রে। হন্দকসু আইসিওপিগী লুপ্লোই কয়াগা পুন্দুনা থৌরম অসি ৪৪ শুবা থৌরম ওইনা শিন্নবা শেম শারে। মসিনা মরম ওইরগা ইরৈপাক্কী অরিবা কোনুং কংলা অমদি ককচিং ডিষ্ট্রিক্টকী মনুং চনবা এলাংখানপোকপীদা পাঙথোকপা অসিদা কংলৈচা পুম্নমক শরুক য়াবীয়ু হায়বা ৱাফম থম্লক্লি।
লোয়ননা পুয়া মৈ থাখিবগা মরী লৈননা পুথোকপা শুমাঙ কুহ্মৈ কংলৈপাক্তা ১৭০৯ সু থৌরম অসিদা উৎকনি হায়খি। পাঙমীশিংগা উনবা অদুদা আইসিওপিগী ভাইস চিয়ারমেন অমদি মীতৈ নেসনেল ফ্রন্ট (এমএনএফ) কী এদভাইজর এন নাওদালেনখোম্বা, লুপ অসিগী কো কনভেনর এম ইন্দ্রজিৎ মীতৈ, মীলালগী প্রেসিদেন্ট কেঐচ ইঙোচা মীতৈ, ওল মণিপুর রিকগনাইজ প্রাইভেট স্কুল ওয়েলফিয়ার এসোসিয়েসনগী প্রেসিদেন্ট দোরেন খা ঙানবা, মণিপুর ষ্টেট শুমাঙ লীলা কাউন্সিলগী প্রেসিদেন্ট এম পুর্ণিমাসি, য়ুনাইটেদ মণিপুর মুসলিম উইমেন ডিবলপমেন্ট ওর্গানাইজেসনগী প্রেসিদেন্ট অনৱারি নুর জাহান অমদি লাইনিংহল ফুলো চেরিটেবল ট্রাষ্টকী প্রেসিদেন্ট এন চাওবা মীতৈনা শরুক য়াখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু