ইম্ফাল, সেপ্টেম্বর ১৮ : হন্দক পার্লিয়ামেন্টকী ষ্টাফশিংগী অনৌবা ফিজোলদা মীতৈগী কোকয়েৎ মখল অমা শীজিন্নগনি হায়বগী মীয়ামদা নুংনাংবা ফাওহল্লিবা অসিগী মতাংদা উত্রা শঙলেন সনা কোনুং অমদি উমংলাই কনবা অপূনবা লূপ (উকল) গা পূন্না খন্নদুনা ৱারেপ অহুম লৌরে হায়রি।

উত্রা শঙলেন সনা কোনুংগী অঙোম নিংথৌনা থোরকপা চেরোল অমদা ইন্দিয়াগুম্বা ফূরুপ লিশীং কয়াগী কোকয়েৎ লিশীং কয়া লৈবা লৈবাক অসিগী পার্লিয়ামেন্টতা মীতৈগী কোকয়েৎ অমবু ষ্টাফশিংগী ফিজোল ওইনা তুরকপদা নুংঙাইবা অমদি চাওথোকচবা ফাওই। তৌবতবু কোকয়েৎ অসি মীতৈগী লৈরিবা কোকয়েৎ ময়াম অসিগী মনুংদা করম্বা কোকয়েৎনো, শীজিন্নবদা অয়া য়াদা অমদি মদুনা ঐখোয়গী ঈনাৎ-শক্তমদা কায়ব্রা নৎত্রগা কায়দব্রা হায়বদু খঙদোকমিন্ননবা মরী লৈনবা পার্লিয়ামেন্টরি এফ্যেরস মিনিষ্ট্রিদা অইবা চেরোল থানবা খন্নরে।

অনীশুবদা লাইথৌতিন্থৌ অমদি লৈবাক নিংথৌনা অঙম অথৌশিংদা মনা ওইনা পীবা মীতৈগী কোকয়েৎ শকলশিংদি ফূরুপ-নাৎকী ওইবা মশক্তা অকায়বা থোরক্কদবা অমত্তা অরানবা মওংদা শীজিন্নদবা হায়বা সনা কোনুংগী অচেৎপা ফিরেপ লৌদুনা লাকখিবদু ঙসিসু অদুমক অহোংবা লৈতে। অহুমশুবদা সলাই কোকয়েৎশিংগী মনুংদা লৈরিবা সলাই কোকয়েৎ মপূম, মচা, ওইদা নম্বী, মতোক পান্দবী অমদি নমথাং খুল্লক হাপ্পা কোকয়েৎশিং অসিগী মনুংদা ‘সলাই কোকয়েৎ মচা’ অসি অরিবা মতমদগী হৌনা সনা কোনুংগী থৌগল্লোই মচাশিংনা শীজিন্নদুনা লাক্লি।

ঙসিমকসু সলাই কোকয়েৎ মচা অসি মণিপুর লেজিসলেটিভ এসেমব্লিদা মার্সেলশিংনা শীজিন্নরি। অসুম্না হায়রিবা কোকয়েৎ মখল অসি ওইনা পার্লিয়ামেন্টকী ষ্টাফশিংনা শীজিন্নবদদি থোইনা অকায়বা লৈগনি থাজদে হায়রি। মরম অসিনা মীতৈগী লৈজরিবা কোকয়েৎ মখলশিং অসিগী শীজিন্নফম অমসুং থাক অসি য়েংবীরগা শীজিন্নফম অমসুং থাক অসি য়েংবীরগা শীজিন্নবীয়ু। থোইনা অকায়বা লৈগনি নীংদে। তৌবতবু কোকয়েৎকী লৈরিবা থাক অসি য়েংদনা পংতৌদা তৌশিনবগী থৌওং অদুবুদি সনা কোনুংনা মতম পূম্নমক্তা অয়াবা পীরোই অমদি তৌফম থোকপদু তৌগনি হায়না লৈবাক মীয়ামদা খঙহঞ্জরি হায়রি।