নৌনা নম্লকপা লৈবাক অসিগী শেলয়েক্তা মণিপুরী লোল য়াওরগনি: এম পি সনাজাওবা
ইম্ফাল, জানুয়ারি ১৫ : নৌনা নম্লকপা লৈবাক অসিগী শেল ময়েকশিংদা মীতৈ ময়েক মণিপুর লোল য়াওরগনি হায়বগী থাজবা পীরক্লে হায়না রাজ্য সভাগী এম পি লৈশেম্বা সনাজাওবনা লাউথোকখ্রে।
ৱাফম অসি মণিপুরী লোন, ময়েক, শখ্তাম ঈনাৎ কন্নবা হোৎনবদা নত্তনা য়েলহৌঙৈদগী খুন্দামিন্নরক্লবা চীং তম অনীগী মরী ফগৎনবা হোৎনবদা অচৌবা থৌদাং লৌরম্বা মীয়ামগী লুচিংপুরেল চিংশুবম অকাবা লৈখিদবগী ১৫ রকশুবা নীংশিং থৌরমদা লাউথোকখিবনি।
ঙসি ৱাকচিংগী ১৩নি পানবা ওজা চিংশুবম অকাবগী লৈখিদবা নীংশিং থৌরমনা লাকপদা লমদম অসিগী য়াম্লবা মীয়াম্না ৱাখ লৈমা চীংদা লৈবা লুচিংপুরেল অকবগী লৈরোল চনফম খুভমদা খিল্লিবা ওজা অকাবা অমদি তাংখুল ফূরুপকী লুচিংবা রুংসুং সুইসাগী মিতমদসু হৈ লৈ কৎতুনা ইকায় খুম্নবা উৎখি।
ৱাখল্লোন মান্নবা অপূনবা (ৱামা) কংলৈপাকনা শীন্দুনা রুপ মহল থিয়েটার পাঙথোকখিবা নীংশিং থৌরমদা এম পি লৈশেম্বা সনাজাওবনা, মণিপুরী লোন অসিবু ক্লাসিকেল লোনগী থাক্তা থম্নবা কুমজা ২০২০ গী সেপ্টেম্বর থাদা পার্লিয়ামেন্টতা পুখৎখ্রবসু মরী লৈনবা দিপার্টমেন্টনা ঙসি ফাওবদা মচং ওইবা চে চাংশিং থাদনা লৈবা অসি লাইবক থীবনি হায়না এমপিনা নুংনাংবা ফোঙদোকখি।
মহাক্না হায়, লৈবাক অসিগী ওইনা ক্লাসিকেল লোন তরুক লৈবগী মথক্তা মণিপুরী লোন চনবা ঙম্লবদি লোন অসিদা য়াওরিবা লোনয়ান ময়েকশিং খন্দোক্তুনা ইশাগী ঈরোল অমদি ময়েকশিং চুমথোকচবগী খুদোংচাবা ফংগনি।
শেলগী ময়েক্তা মীতৈ ময়েক মণিপুরী লোল য়াওহন্নবগী মতাংদা রিজার্ভ বেঙ্ক অব ইন্দিয়ানা থবক পূম্বা লৌখৎপা লোইদুনা ডিজাইন কমিটিদা থাখ্রে। নৌনা নম্লকপা শেল ময়েকশিংদা ঈরমদম অসিগী লোন য়াওরক্লগনি হায়বগী চে লাক্লে।
চহী কয়াগী মমাঙদগী লিংখৎতুনা লাক্লবা মণিপুর য়ুনিভার্সিটি অব কালচার অসিসু সেন্ট্রেল য়ুনিভার্সিটিগী থাক্তা লৌশিনবীনবা পার্লিয়ামেন্টতা তকশিল্লগনি হায়রদুনা ষ্টেটকী মখাদা লৈরিবা কালচারেল য়ুনিভার্সিটি অসিগী লৈফম থোকপা মচাক মথুমশিং ঙসি ফাওবদা চপ চানা লৈতবা অসিনা কালচারগী পূক্কৈদা ইনাক খুল্লিবা লমদম অসি নোংমা নোংমগী শিথরকপগী মচাক অমা ওইরক্লি। ঈরোল ঈয়েক চাওখৎনবা হোৎনরম্বা ওজা অকাবগী নীংশিং থৌরমনা লাকপদা মীয়াম্না হৈ লৈ কৎতুনা নীংশিং থৌরমখক্তমক পাঙথোকপগী মহুৎতা লুচিংপুরেল অসিনা পামজরম্বা ৱাখল্লোনশিং মঙফাওনহন্নবা ঙসিগী মীরোলনা হোৎনমিন্নসি হায়না মহাক্না মখা তানা ফোঙদোকখি।
থৌরম অসিদা, ৱামাগী প্রেসিডেন্ট মোইরাংথেম নাওখম্বা মীতৈ অমদি মণিপুর স্টেট শুমাঙ লীলা কাউন্সিলগী লাইফ টাইম সেক্রেটারি শৌগ্রাকপম হেমন্তসু শরুক য়াখি।
সোর্স: পান্দম
0 কমেন্ট:
কমেন্ট তৌবিয়ু