ত্রিপুরাদা রাজর্ষি ভাগ্যচন্দ্রগী মপোক কুমওন পাঙথোক্তৌরি
ইম্ফাল, মে ২৯ : রাজর্ষি ভাগ্যচন্দ্র কালচারেল ফাউন্দেসন, মণিপুর অমসুং রাধা মাধব মণিপুরী য়ুঠ সমাজ, ত্রিপুরানা পুন্না শীন্দুনা রাজর্ষি ভাগ্যচন্দ্রগী ২৮২ শুবা মপোক কুমওন থৌরম মথং থাগী ২১ দা ত্রিপুরাগী রাধানগরদা লৈবা রাধ মাধব লাইশঙদা পাঙথোক্লগনি।
ইম্ফালগী সেগা রোদ থৌদা ভাবোক লৈকাইদা লৈবা রাজর্ষি ভাগ্যচন্দ্র কালচারেল ফাউন্দেসন, মণিপুরগী অফিসতা ঙসি নুংথিল পাউগী মীফম অমদা ফাউন্দেসন অসিগী ৱাঙাঙলোই তখেল্লম্বম ইরাবতনা মথক্কী ৱাফম অসি ফোঙদোকখিবনি।
মহাক্না হায়, কুমজা ১৭৮৯ দা রাজর্ষিনা খোংমি লান্মী ৭০০ কা লোয়ননা গঙ্গা চৎপদা মজাইবেম্মা হরিশেশোরিসু লোয়নখি। অমদি ত্রিপুরাদা থুংবদা মতম অদুগী নিংথৌ রাজধারা মনিক্তা মজাইবেম্মা থারমখি। মজাইবেম্মনা হায়জরকপগী মতুংইন্না হৌজিক্কি রাধানগর অসিদা রাধা মাধবকী মীতম খুৎশিন্নরমখি।
মথক্কী ৱারি শিংবুল অসিদা য়ুম্ফম ওইরগা নিংথৌরেল অসিগী ২৮২ শুবা মপোক কুমওন থৌরম রাধানগরদা ওইনা শিনবনি হায়না মহাক্না মখা তারি।
তখেল্লম্বম ইরাবতনা হায়, রাধনগরগী রাধা মাধব লাইশঙ অসি ত্রিপুরা গভর্ণমেন্টনা ঙাক শেন্দুনা থমখ্রে অমদি ঐখোয়না কুশি রাশি তৌবা য়াদ্রে। ত্রিপুরা গভর্নমেন্টকী অথোরিটিদা হায়জদুনা ২৮২ শুবা মপোক কুমওন থৌরম অসিগা লোয়ননা রাজর্ষিগী মীতম অমসু মায়খুম হাংদোক্কনি।
মসিগী মথক্তা মণিপুরদগী দিবোটি অমদি আর্টিষ্ট ১৫০ রোম মফম অদুদা চৎতুনা নট সঙ্কীর্তন, গৌরা লীলা, বাশকনচিংবা কৎপগী মথক্তা থাঙ-তানচিংবা কালচারেল শোশিং উৎকনি হানসু মহাক্না ফোঙদোকখি।
অমরোমদা, রাজর্ষি লৈখিদবগী ২২৪ শুবা কুমওন থৌরমনা চহী অসিগী সেপ্টেম্বর ২৪ দা বাংলাদেশকী মৈতৈ খুঙ্গং ১৪ রোম লৈবা ভানুগাছতা পাঙথোক্কনি।
ভানুগাছতা নুমিৎ নীনি চুপ্না নট সঙ্কীর্তন, গৌর লীলা, বাশক অমদি অতৈ নাৎকী থৌরমশিংগী মথক্তা থাঙ-তা উৎকনি। মফম অদুদগী কিলোমিটার ১৩০ রোম চৎলগা লৈবা সিলেটতনা নোংমা হায়রিবা অসি পাঙথোক্কনি হায়নসু ফাউন্দেসনগী ৱাঙাঙলোই টি ইরাবতনা পনখি।
অমরোমদা, পাঙথোক্কদৌরিবা থৌরমশিং অসিগা মরী লৈননা অর্গানাইজিং কমিটি অমা ফাউন্ডেদসন অসিগী মথাদা শেম্বগা লোয়ননা ক্ষেত্রিগাও এসিগী হান্নগী এম এল এ নহাকপম ইন্দ্রজিৎপু চিয়ারমেন ওইনা খনখ্রে।
অর্গানাইজিং কমিটিগী চিয়ারমেন এন ইন্দ্রজিৎনা হায়, কোবিদ ১৯ লাইচৎনা মরম ওইদুনা রাজর্ষিগী নিংশিং কুমওন থৌরমশিং অসি হৌখিবা চহী অনিরোমদি য়াম্না পাক চাওনা শিনখিদ্রে। অদুবু হন্দক্তি থৌরমশিং অসি য়াম্না ফজবা মওঙদা অমদি পাক চাওনা শিন্নবা থৌরাং তৌরি। মীয়াম্না থৌরমশিং অসি মপুং ফাহনবীয়ু হায়না মহাক্না মখা তাখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু