ত্রিপুরাদা নুপী লানগী মীতম খীন্নবা উরেপ উয়ুং তমখ্রে
ইম্ফাল, দিসেম্বর ১২: ত্রিপুরাগী কোনুং আগরতলাগী নলগরিয়া রাধা মাধব দেবতা বারি কমপ্লেক্সতা মণিপুর লিতরেরি এন্দ কালচারেল ফোরাম, ত্রিপুরা অমদি ওল মণিপুর য়ুনাইতেদ ক্লাবস ওর্গানাইজেসন (অমুকো) খুৎশম্নদুনা নুপীলানগী মীতম অমা শানবগীদমক ঙসি অয়ূক পূং ৯দা দ সাউর্দান মণিপুর আর্তস এন্দ কালচার প্রমোসন সেন্টারগী আর্তিস্তশিংনা থাঙগী লৈতেং খুদোল তমদুনা উরেপ উয়ুং তমখ্রে।
নুপী লান মীতম খীনগদৌরিবা মফম অসি ত্রিপুরাগী নিংথৌদা ময়ূম পান্দুনা মহারানি ওইখিবী থোঙাম তুলসিবতিনা কৎলম্বা লাইশঙগী কমপ্লেক্সতনি। ত্রিপুরাদা ইহান হানবা ওইগদবা নুপীলানগী মীতম অসি অমুকোগী প্রেসিদেন্ত ফৈরোইজম নন্দো লুৱাংনা উরেপ উয়ুং তমখিবা অসিদা নলগরিয়া রাধা মাধব দেবতা বারিগী সেক্রেটারি কোন্থৌজম দিলিপ সিংহ, মণিপুর লিতরেরি এন্দ কালচারেল ফোরামগী এদভাইজর আর কে তরুনজিৎ কনভেনর খোইস্নাম ওংবী বিরালা, ভাইস প্রেসিদেন্ট থোংগ্রাতাবম গৌর কিশোর শর্ম্মা অমদি নিঙোম্বম বির সিংহসু য়াওখি।
নুপীলানগী মীতম খীন্নবা উরেপ উয়ুং তমখিবগা লোয়ননা নুপী লান নীংশিং থৌরম পাঙথোকপগী অমদি মীতম শাবা হৌনবগীদমক অহানবগী ওইনা অমুকোনা লুপা লাক্ষ ৩ মণিপুরী লিতরেচর এন্দ কালচারেল ফোরাম ত্রিপুরাদা মতেঙ পাংখ্রে। উরেপ উয়ুং তম্বগী থৌরম অদুদা ফিল্ম মেকার ও সি মৈরা, ফিলম মেকার আজিৎ য়ুম্নাম, মোইরাংথেম রাজেন, সাহিত্য একাদেমি এৱার্দি অমদি ফিলম এক্টর অশোক কুমারসু লাক্তুনা পুক্নিং থৌগৎখি।
থৌরম অদুগা মরী লৈননা অমুকোগী প্রেসিদেন্ট ফৈরোইজম নন্দো লুৱাংনা হায়খি, মণিপুর অমদি মপানলমদা খুন্দারিবা মণিপুরী নুপীশিংনা অদুঙৈ ১৯০৪ গী জুলাই ৬ অমদি ১৯৩৯ গী দিসেম্বর ১২গী নুপীলানগী থৌদোকশিং অদুদা উৎখিবা মথৌনা মরিংজেল অদুগীদমক য়াম্না চাউথোক্না হিংলি। অদুবু অদুগুম্বা থৌনা ফবী ইমা ইবেলশিংগী মীতম খীনবগী চাং অসি মণিপুর অমদি মণিপুরীশিংনা খুন্দারিবা মাপনলমদা নেমলি। মণিপুরগী অথৌবা কয়াগী মীতমদি মণিপুর অমদি মণিপুরগী ৱাংমদা মণিপুরীশিংনা খুন্দারিবা মফম কয়াদা ময়াম অমা খীল্লি। মণিপুরী নুপীশিংগী মথৌনা মরিংজেলদু মালেম পুম্বদা শন্দোক্নবা হোৎনবদা মফম কয়াদা নুপীলানগী মীতম খীনবা হায়বসি অদুক্কীমতিক মথৌ তাই।
ত্রিপুরা মতম অমদা তখেল হায়না খঙনরম্বা মফম অসিগী নিংথৌদা মৈতৈ নুপী ১৪ না ময়ুম পানখিবনা মফম অসি মণিপুরগা হীরম কয়াদা মরী লৈনরকপা মফম অমনি। মরম অদুনা অমুকোনা মণিপুরী লিতরেরি এন্দ কালচারেল ফোরাম, ত্রিপুরাগা খুৎশম্নরগা নুপীলালগী মীতম অসি খীন্নবা থবক পায়খৎপা হৌবনি। য়ারিবমখৈ থুনা লোইশিন্নবা পান্দম থম্লি।
লৈবাক মীয়ামগী য়াম্না মরুওইবা থৌদোক অমগা মরী লৈনবামীতম অমনা মতম চুপ্পদা থৌদোক্তুগী ৱারী লিরগা লৈবতা নত্তনা ঙসিগী অমদি তুংগী মীরোল কয়াদা থৌনাগী ইনোৎ অমা পীরিবনি। লাইরিক্তা য়াওবা থৌদোক অমগী ৱারী অদুনা পীরিবা মহাও অদুগা মীতম অমনা পীরিবা মহাও অদুগা অনীদু য়াম্না খেননৈ। থৌদোক অমগী মরমদা পারুবা অমদি উরিবা অনীদুদগী পুক্নিংদা ফাওরকপা ইথিলদু তোঙান তোঙাল্লি। মীতম অমা উরুবদা হৌখ্রবা মতমগী থৌদোক্তুগী শমলপ্পা শক্তম অমা নীংশিংদুনা পুক্নিংদা থুক লাউবা ফাওবা অমদি হেন্না হেন্না খঙনিংবগী লোয়ননা হংনিংবা ফাওহল্লি। লাইরিক্তা য়াওরিবা ৱারী হায়বসিদি লারিক্তুবু পাবা ঙম্বা মীশিংনা মহাও ফংবা নৎত্রগা খঙবনি। অদুবু মীতম হায়বসিদি পীক্লিবা অঙাংশিংনা ময়ূমগী অহল লমনশিং অমদি অতোপ্পা মথক থোংবশিংদা মসি করিনো, কনানো হংবগী খঙবা ঙম্লিবনি। নুপীলাল মীতম অসি খীল্লবা মতুংদা মফমসিগী মণিপুরী মীয়ামদা অচৌবা থৌনা লিংজেল অমা পীবা ওইরসনু।
অমরোমদা নুপীলাল মীতম খীনবগী উরেপ উয়ুং তমখ্রবা মতুংদা বামজতিয়া কম্মুনিতি হোল, বেরিমুরা, ত্রিপুরা (ওয়েষ্টা) ৮৩ শুবা স্তেত লেবেল নুপীলানগী নীংশিং থৌরম মণিপুরী লিতরেরি এন্দ কালচারেল ফোরাম, ত্রিপুরা অমদি অমুকো না খুৎশম্নদুনা পাঙথোকখ্রে। থৌরম অদুদা ত্রিপুরা লেজিসলেটিব এসেমব্লিগী এম এল এ কৃষ্ণধন দাসনা ইনোগুরেত্তর ওইখবগা লোয়ননা অমুকোগী প্রেসিদেন্ট ফৈরোইজম নন্দো লুৱাংনা চীফ গেস্ত, নোংমাইথেম রিনা নিউ্জ এদিতর দি দি কে আগরতলানা স্পিসিয়েল গেস্ত অমদি নিঙোম্বম বিরা সিংহনা গেস্তশিং ওইখিবগা লোয়ননা ৮৩ শুবা নুপীলাল মেমোরিয়েল দে ওবজার্বেসনগী কনভেনর খোইস্নাম ওংবী বীরোলানা প্রেসিদেন্ট ওইনা শরুক য়াখি। অমুকোগী এদভাইজর আর য়াংশো কোইরেং, ভাইস প্রেসিদেন্ত এম এম থম্বৌ অমদি এসিস্তেন্ত সেক্রেটারি নিংথৌজম লোকেন্দ্র মঙাংসু থৌরমদুদা য়াওখি।
সোর্স: পোক্নফম
0 কমেন্ট:
কমেন্ট তৌবিয়ু