আপডেট:
image

রামান্দি ধর্ম্মবু মৈদিংঙু পামহৈবনা করিগী পাম্লিবনো -- -চোংথাম তোম্বা সিংহ

   ১৭২০ ইং শান্তদাস গোসাই য়াওনা মী ১১ চঙলকই। শান্তদাস গোসাই হায়রিবা অসিদি রামান্দি সম্প্রদায় চৎপা রাম ভক্ত অমনি। মৈদিংঙু অসি অহানবদা শান্তদাস গোসাইনা পুরকপা রামান্দি ধর্ম্মবু য়াম্ন য়ারমদে। কয়ামুক য়াম্না রামান্দি ধর্ম্মবু তাথিবগে হায়রবদি ধর্ম্ম অসিবু পামজদুনা চৎচবিশিংবু দন্দি তৌই। ১৭৩৩ ইংদা মনাও ইবুংঙো মানশাই সেনাপতি অমসুং মচাইবুংঙো শ্যামশাই খুরাইরাকপবু রামান্দি ধর্ম্ম লৌবগী দমক্তা মফম লৌথোকপদা নত্তনা লোই থাখি। অদুবু শান্তদাসনা মণিপুরদা লাকপা মতুং কোন্নথংদা, লাংপোকলাকপম মোইরাম্বগী কুম ১৬৬১ (১৭৩৯ ইং) গী ইঙা থাদা মৈদিংঙুনা শান্তদাসতগী রামান্দি ধর্ম্ম লৌই।


তুবী চরাইরোংবনা শাৎপম চনু নোংথিন চাইবী পাম্নদুনা ১৬৯০ ইংগী পোইনু ২২ নি পানবা থাংজা নুমিত্তা মৈদিংঙু পামহৈবা পোকই। চৈথারোল কুম্বাবগী মতুং ইন্না মশাগী চহী ২০ শুরকপা, ইং ১৭০৯ গী থৱান ২৩ নি য়ুমশাকৈসানা পামহৈবনা ফম্বাল কায়। চহী নৌনা ফম্বাল তোংই হায়দুনা গোপাল কোই হায়নৈ। চহী ৩৯ চুপ্না ফম্বালদা তোংদুনা মণিপুরবু অচৌবা লৈবাক অমা ওইনবা হোৎনবা য়াবা হোৎনবীরম্মী। মৈদিংঙু অসিনা ইবেম্মা ১০ পাম্নদুনা মজাইবুংঙো ১৮ থনম্মী হায়না শঙ্গাই ফম্মাংদা পল্লি। অদুবু বিজয় পাঞ্চালিদদি রাণী ১৬ পান্নদুনা মচাইবুংঙো ১৯গা মচাইবেম্মা ১৮ গা পোকই হায়না ইরি। মৈদিংঙুসি মশাগী চহী ৬১ শুরকপা ইং ১৭৫১ গী পোইনু ২৬ নি পানবদা নোঙ্গাখি। শা-লান্দা হৈ-শিংবা, মথৌনা লৈবা, মপাঙ্গন্দা মপা লৈতবা মৈদিংঙু পামহৈবনি। মহাক্কী লীরুং তৈনগী শক্তি অসি অসুক্কী মতিক কল্লি। মদুদি অমুক্কী খুকাপ্তা তেঞ্জৈ অমনা লফু পাম্বী মাপল ফাওদুনা চৎখ্রগা তরাশুবা লফু পাম্বীদা য়ুংই হায়না বিজয় পাঞ্জালীদা অসুম্না ইরম্মী।

মৈদিংঙু অসিগী মতমদা মমিং চৎপা অখঙ-অহৈ মাইচৌ অমসুং লান্দা থৌবা লান্মী কয়ানা মশিং থিঙমদনা লৈরম্মী। খুদম খরদং পঞ্জরবদা, মাইচৌদা লৌরেম্বম খোংনাং থাবা, গনক থেংগ্রা, নিংঙোম্বা অকোং, লাঙ্গোন লুখোং, য়াম্বেম ফৌগাক, মোইরাং ললহাবা, থোংবম হি মাইবা, ৱাঙ্গোই লীকশাংথেম খোনা, শামুরৌ চিঙ্গোই, ৱাংঙু বাসি, কমেং ফদিবা, অঙোম গোপী, শান্তদাস গোসাই অসিনচিংবনি। মখোয়শিং অসি লৈবনা মহাক্না তুংগী পোরম কয়া উবা ঙম্লিবনি হায়বদা লাল্লোই।

অমরোমদা মথৌনা লৈবা লাঞ্জিংলেন কয়া অমসু মহাক্না শেমগৎলম্মী। মদুনা মরম ওইদুনা মহাক্না লৈবাক কয়াবু জয় তৌবা ঙমখিবনি, অৱা অমসুং তখেলবু মতম অমুক্তদা লান শোক্নদুনা মায়থিবা পীবা ঙমখিবনি। মসি মৈদিংঙু অসিনা মহাক্কী প্রজাবু য়োকখৎপগী ময়েক লারবা খুদমনি। অশেংবা লুচিংবা হায়বসিদি মহাক মশাগুম্বা লুচিংবা কয়া পুথোকপা অদুনি, মতুং ইনবা মী য়ামহনবা অদু নত্তে।

মৈদিংঙু অসিদা মৈতৈ লান্মীবু কাঙলুপ অহুম থোক্না খায়দোক্লম্মী। মখোয়শিং অদুদি, ১) খোঙ লান্মী, ২) শগোল লান্মী, ৩) হিগী লান্মী অসিনি। মখল অহুমসিগী মনুঙদা অনীশুবা মখলগী লান্মী অসিনা খ্বাইদগী মরু ওইরিবসি অমসুং অতোপ্পা লৈবাক্কী লান্মীশিংনা খ্বাইদগী কিনবসু লাম্মী মখল অসিনি। নিংথৌরোল লম্বুবনা ইরম্বদা মৈদিংঙু অসিনা লানফম কয়া থেংনখি অমসুং লানফমশিং অদু ঙম্লকখিবগী দমক্তা লানফমশিং অদুগা মরী লৈননা মহাকপু মিংথোল কয়ানা লৈতেংখি। পনবা য়াবা মিংথোল খরদি, তখেল (ত্রিপুরা) ঙম্বগী ‘তখেলঙম্বা’ অৱা ঙম্বগী ‘অৱাঙম্বা’ সমজোক ঙম্মী হায়দুনা ‘সমাজোকঙম্বা’ ময়াং ঙম্মী হায়বগী ‘ময়াংঙম্বা’ অৱাগী তোংদোই নিংথৌবু ঙম্মী হায়বগী অৱা তোংদোই লানথাবা অসিনচিংবনি।

মৈদিংঙু অসিনা মণিপুরবু মপাঙ্গল কল্লবা লৈবাক অমা ওইনবা লৈবাক কয়াবু মতম অদুগী চৎনবী ওইনা লান তৌদুনা লমখৈ চাওথোকহনখি। মসিগী মথক্তা য়ুমথংনবা লৈবাকশিংগা মরী চেৎনা লৈনবগীদমক্তা মখল কয়াগী থৌরাং তোই। খুদম ওইনা, রাণী হাওবম চনু সত্যভামানা পোকচবী মজাইবেম্মা অতোনবী প্রজাবতীবু কাছাড় লৈবাক্কী নিংথৌদা লূহোংদুনা য়ুমথংনবা লৈবাক্কা মরী ফনা থম্মী।

মৈদিংঙু অসি লৈবাক প্রজাগী ৱা তাবা, মীয়ামগী য়াইফনবা খনবা নিংথৌনি। অৱা অমসুং তখেলনা মতম অমুক্তদা মণিপুরদা লান্দারকপা মতমদা মহাক্না প্রজা মীয়ামগী মোত লৌরগা লান তৌখি। মতম অমুক্তদা লৈবাক অনীগা থেংনবা লান অনীমক ঙমখি। মহাক্না লম্বী থোং কয়া শেম্লম্মী, কৈথেল কয়া শারম্মী, থুনখোং কয়া হুক্লম্মী। মণিপুরদা খ্বাইদগী চাওবা পুখ্রীনি হায়রিবা ৱাংখৈদা লৈবা নিংথেম পুখ্রী অসি মহাক্কী মতমদা (১৭২৫ ইং) তৌখিবনি। ৱায়েনশঙ লিংদুনা লৈবাক্কী ৱায়েনবসু হৌদোক্লম্মী। পোৎশেম যাদুগী থবক মহাক্না থিংলম্মী। পোৎশেম্বশিং ফাদুনা চৈরাক পীরম্মী। য়ুম্লক খুল্লক্তা ওক য়েন লোইবা থিংদুনা অনা লায়চৎতগী প্রজাশিংবু কন্নবা থবক পায়খৎলম্মী।

হাইস্নাম লাইবগী কুম ১৬৩৯ (১৭১৭ ইং) গী মেরা থাগী থাচিন্দা মৈদিংঙু পামহৈবনা বৈষ্ণব ধর্ম্মদা গুরু গোপাল দাসতগী লাইমিং লৌই। ১৭২০ ইং শান্তদাস গোসাই য়াওনা মী ১১ চঙলকই। শান্তদাস গোসাই হায়রিবা অসিদি রামান্দি সম্প্রদায় চৎপা রাম ভক্ত অমনি। মৈদিংঙু অসি অহানবদা শান্তদাস গোসাইনা পুরকপা রামান্দি ধর্ম্মবু য়াম্ন য়ারমদে। কয়ামুক য়াম্না রামান্দি ধর্ম্মবু তাথিবগে হায়রবদি ধর্ম্ম অসিবু পামজদুনা চৎচবিশিংবু দন্দি তৌই। ১৭৩৩ ইংদা মনাও ইবুংঙো মানশাই সেনাপতি অমসুং মচাইবুংঙো শ্যামশাই খুরাইরাকপবু রামান্দি ধর্ম্ম লৌবগী দমক্তা মফম লৌথোকপদা নত্তনা লোই থাখি। অদুবু শান্তদাসনা মণিপুরদা লাকপা মতুং কোন্নথংদা, লাংপোকলাকপম মোইরাম্বগী কুম ১৬৬১ (১৭৩৯ ইং) গী ইঙা থাদা মৈদিংঙুনা শান্তদাসতগী রামান্দি ধর্ম্ম লৌই।

অসুম্না রামান্দি ধর্ম্মবু য়াম্না তাথিরম্বা মৈদিংঙু অসিনা রামান্দি ধর্ম্মদা পুক্নিং ওনশিল্লক্তুনা ধর্ম্ম অসিদা লাইমিং লৌবতা নত্তনা মহাক্কী প্রজা মীয়ামসু ধর্ম্ম অসি লৌনবা য়াথং তৌখি। কনাগুম্বা য়ানিংদবা প্রজা য়াওরবসু চৈরাক পীদুনা লৌহন্নবা হোৎনখি। মৈদিংঙু অসিগী অচৌবা অহোংবা অমা লাকখিবসিগী মরম অসি নৈনবা য়াম্না তঙাইফদবনি খল্লি।

মতাং অসিদা পনবা য়াবদি রামান্দি ধর্ম্ম পুরক্লিবা শান্তদাসকা পুন্দুনা থবক কয়া তৌমিন্নরকপদগী মৈদিংঙুনা রামায়নগী ৱারী তারমগনি। রামায়ণদা রামনা মপা দশরথকী ৱাশক ঙাক্নবা সিংহাসন কাগদবা হয়েংদা ঙাইরবদা, সিংহাসনবু করিসু খন্দনা, চহী ১৪ বনদা চৎখিবা, মপাগীদমক মচানা কত্থোকপা, মসিগী মথক্তা ভরতনা ময়াম্বদা উৎলিবা লমচৎ ব্যবহার, মচিন মনাওগী নুংশি মরী, ফম্বালবু করিসু লৈতনা খন্নবা, ফম্বালদগী মচিন মনাওগী মরীনা য়াম্না হেন্না লুম্না লৌনবা কয়া অসি তারমগনি।

অসিগুম্বা ধর্ম্ম, অসিগুম্বা লিচৎ অসিবু লৈরিবনি হায়বা ৱাখল অমা মৈদিংঙু অসিগী ৱাখলদা ফাওরক্লম্বা য়াই। অদুনা মরম ওইরগা অদুগুম্বা ধর্ম্ম অদু চৎতুনা মহাক্কী লৈবাক অসিসু ফম্বালগীদমক লাল তৌনদবা লৈবাক অমা ওইহল্লমগে হায়না খল্লম্বা য়াই অমসুং মীপুম খুদিং অসিগুম্বা ৱাখল অসিনা ওইরমগদ্রা খঞ্জৈ মৈদিংঙু অসিনা মমা মপানা মচাবু অফবা লম্বেলদা পুনবা হোৎনবগুম্না মহাক্কী প্রজাশিংবু রামান্দি ধর্ম্ম লৌহন্নবা হোৎনরম্নিবসি। লাইবক থীবদি মৈদিংঙু অসিনা পামজরম্বা রামান্দি ধর্ম্ম অদু মীয়াম্না পামখিদবনা খাংঙুথক্তা মণিপুরগী লৈমায়দগী মুৎখি। রামায়নগী ফজবা নুংগী ৱাখল্লোন অদু চুশিল্লম্লবদি মণিপুরদা নিংথৌ মচাশিং ফম্বালগীদমক্তা ঈ তান্নরমদবা য়াই।

অমরোমদা, মহাক্কী মতমদা মণিপুরদা তন্ত্রদা খমথেংনা থাজনবা অমসুং তন্ত্রগী লমদা সিদ্ধি ফংলবা মীওই কয়া লৈরম্বগী খুদম লৈরম্মী। মখল কয়াগী শক্তি লৈনরম্মী। তন্ত্রগী চৎনবী থাজনবীনা মরম ওইদুনা মৈদিংঙুবু মমাগী পুক্নুংদগী তাইবঙদা থোরকত্রিঙৈদা হাৎনবা য়াথং পীখি। অসিগুম্বা অসি মহাক্না খঙলকপা মতমদা তন্ত্রগী চৎনবী অদু পাম্লম্লোই। মরম অদুনা অসিগুম্বা তন্ত্রগী ঈরাৎ থৌনি পাঙথোক্নরিবা অসি মহাক্না মুথৎপা পাম্লমগনি খল্লি। তন্ত্র য়াওদবা অতোপ্পা ধর্ম্ম অমা থীরকপদা রামান্দি ধর্ম্মদা তাখিবা ওইরম্বা য়াই।

সোর্স: মরূপ   

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু