ত্রিপুরাদা ঙাংনরিবা মৈতৈ লোন --তোলেন সানা
থংনবা বাংলাদেশ লৈপাক্না মাইকৈ অহুম কোইশিন্না লৈরিবা ত্রিপুরাগুম্বা পীকখ্রবা রাজ্য অমদা মশীং অয়াম্বা বেঙ্গলীগী মরক্তা মণিপুরীশিং অদুদি পুখ্রীগী ঈশিংগী বিন্দু অমগুম্নি। অসুক্কী মতিক লমদম অসিদা লিক্না তারিবা মণিপুরীশিংনা মৈতৈ লোল কাওখ্রে, ইমালোল ঙাংদ্রে, মীতৈৗ তম্বদা বেঙ্গলী ওনখ্রে হায়না মণিপুরগী ইচিল ইনাও কয়ানা মতম অমা করেম কথাইনা ৱাচেপ ঙাংবা-ইবা কয়াসু থেংনজখি।
মসিদা মৈতৈশিংনা করিসু ঙকলমদে। ইকাইবসু লৈরমদে। মরমদি মতম অদুগী মৈতৈগী ফীভমসু অদুম্মক ওইরম্মী। মৈতৈ লোল ঙাংলগা বেঙ্গলীশিংনা নোক্নৈ, ‘থুরোই থুরোং ফাইদে..’ হায়না করেম্নৈ। তশেংনসু মৈতৈশিং মৈতৈ লোল ঙাংবদা মলৈ লোল্লম্মী, মৈতৈ লোল ঙাংবদা শেংফাত্তে। বাংলা লোল য়াল্লি (লোনয়ান), মৈতৈ ইমুং কয়া মৈতৈ লোল ঙাংগন্দে, বাংলানা মপুং ওইনা ঙাংনৈ। মতম অদুগী ইপা-ইপু, অহল লম্মনশিং অদুনা ইমুং-মপান মৈতৈলোল শীজন্নরবসু মতম অদুগী ফীভমদা মচা-মশুশিং লাইরিক লাইশু (বেঙ্গলী মিডিয়াম) তম্বা, বাংলানা রাজভাষা (হৌজিকসু) ওইরম্বা অসিনচিংবা মরম কয়ানা মৈতৈ লোল শেংনা ঙাংবা ঙমদে।
অদুবু মতম হোংলে, মতম অসিদদি ইমালোল খক্তা নত্তনা অতৈ লোলসু খঙগদবনি তমগদবনি হায়বসিনি। অদুবু ইমালোলবুদি খক মীরাইরোইদবনি। ইং ১৯৬৩ গী ডিসেম্বর তাং ২৩ দা ত্রিপুরাদা অহানবা লেংবিরকখিবা মণিপুরী সাহিত্য পরিষদ, ইম্ফালগী জেনারেল সেক্রেটারী সিজ গুরুময়ুম দ্বীজমিন শর্ম্মানা বামুটিয়া পরগনা মনুং চনবা চিংঙারম (ছেছুড়িয়া) মৈতৈ খুঙ্গংদা খুঞ্জাশিংগা ৱারী শান্নখিবা মৈতৈ লোল অদু ঙাংবা তাবদা খুঞ্জাশিংনা পুমঙক ঙক্না তাখি। মরমদি অসুম্না মৈতৈ লোল য়াম্না শেংনা ঙাংবা মমাংঙৈ খক তাখিদবনি।
মহাক্না লেংবিরকখিবগী মরু ওইবা পান্দম অদুসু মণিপুরী লোল ঙাংহনবা ইহনবা চাওখৎহনবা অসিনি। পান্দম অসিবু মাঙদা থম্লগা ইং ১৯৬৩ গী ডিসেম্বর তাং ২৫ দা ত্রিপুরাদা মণিপুরী সাহিত্য পরিষদ, ইম্ফালগী ব্রাঞ্চ অমা হাংখি। সাহিত্য পরিষদ লিংখৎখিবা মতুং দগী ত্রিপুরাদা লোলগী ঈহৌ শাগৎপা হৌখি অমসুং ইং ১৯৬৯ দা ‘মরূপ’ উইকলি ফোঙবা হৌখি, ত্রিপুরাদা নহারোলগী অহানবা লুপ অমা ওইনা ওল ত্রিপুরা মণিপুরী য়ুথ এসোসিয়েশন (আত্মা) লিংখৎতুনা মণিপুরী মপারীশিংবু মীকপ থোকহনবগী থৌদাং লৌবা হৌরকখি। ত্রিপুরাদা মণিপুরী লোলগী ফাউন্ডেশন অসুম্না হৌগাৎখিবসিনি। মণিপুরী লোল, সংস্কৃতি সাহিত্যঘী খোঙচৎকী মহয়না ঙসি লৈঙাক্নসু মণিপুরী লোলবু মশক খঙবা ঙমলে।
সোর্স: মরূপ
0 কমেন্ট:
কমেন্ট তৌবিয়ু