image

ত্রিপুরাগী গৌরনগরদা নুপী লানগী মীতম অমা হাংদোকখ্রে

ইম্ফাল, এপ্রিল ৩০ : ওল মণিপুর য়ুনাইটেদ ক্লাবস ওর্গানাইজেসন (অমুকো) অমদি মণিপুরী লিটরেরি এন্দ কালচারেল ফোরাম, ত্রিপুরা অনিনা পুন্না খুৎশম্নদুনা ত্রিপুরাগী মণিপুরী (মৈতৈ) না খ্বাইদগী মশিং য়াম্না খুন্দাবা মফম অমা ওইরিবা খোৱাই দিষ্ট্রিক্টকী গৌরনগরদা ঙসি নুপী লান মীতম (ষ্টেচু) অমা মীয়াম্না লৈ কৎতুনা অমদি থাঙ-তাগী সেল্যুট পীদুনা অমুকোগী প্রেসিডেন্ট ফৈরোইজম নন্দো লুৱাংনা মাইখুম হাংদোকখ্রে হায়রি।

মাইখুম হাংদোকপগী থৌরম অদুদা অমুকোগী এদভাইজর য়াংসোসোং কোইরেং, অমুকোগী সেক্রেটারি ওর্গানাইজেসন কোইজম সন্তোস মৈতৈ অমদি মরু ওইবা থৌমী কয়ামরুমসু শরুক য়াখি। মসিদা মণিপুরী লিটরেরি এন্দ কালচারেল ফোরাম, ত্রিপুরাগী প্রেসিদেন্ট নিঙোম্বম বিরা, ত্রিপুরাদা হপ্তাগী ফোঙবা মণিপুরী পাউচে ‘মরুপ’ কী এদিটর আরকে তরুনজিৎ, নুপী লান ওবজার্বেসন কম্মিটি, ত্রিপুরাগী কনভেনর খোইস্নাম বিরোলা অমদি অতৈ মরু ওইবা মীওই কয়াসু শরুক য়াখি।

অয়ুক পুং ১০.৪০ দা নুপী লানগী মীতম অসি মাইখুম হাংদোকখিবগা লোয়ননা কালচারেল প্রোগ্রাম কয়া য়াওবা মপুং ওইবা থৌরম নুংথিল পুং ৩.৩০ দা পাঙথোকখি। মণিপুরগী ৱাংমদা নুপী লান মীতম খিনবা অসি ঙসি মাইখুম হাংদোক্লিবা ত্রিপুরাগী খোৱাই দিষ্ট্রিক্টকী গৌরনগরদা লৈরিবা নুপী লানগী মীতম অসিনি। নুংথিল পুং ৩.৩০ দগী হৌখিবা কালচারেল প্রোগ্রাম কয়াগা লোয়ননা পাঙথোকখিবা থৌরমসিদা অমুকোগী প্রেসিদেন্ট ফৈরোইজম নন্দো লুৱাংনা অথোইবা মীথুংলেন, নুপী লান ওবজার্বেসন কম্মিটি, ত্রিপুরাগী কনভেনর খোইস্নাম বিরোলানা থৌরম মপু, মণিপুরী লিটরেরি এন্দ কালচারেল ফোরাম, ত্রিপুরাগী প্রেসিদেন্ট নিঙোম্বম বিরা সিংহা অমদি মরুপ উইক্লিগী জোইন্ট এদিটর আরকে তরুনজিৎনা ইকাই খুম্নবা মীথুংলেন ওইনা শরুক য়াখি।

থৌরমসিদা ত্রিপুরাগী মৈতৈ নিঙোল খোইস্নাম মমতা অমদি হিজম অনুসমিতানা থৌগল জগোয় উৎখি। পেত্রিওটিক সোং (লৈবাক নিংবা ঈশৈ) খুমন্থেম লক্ষ্মীনা অদুগা শৈহৌ ঈশৈনা খুমন্থেম অনিমানা শকখি। শিলচরদগী লাকপা ওল আসাম হুয়েল লাংলোং থাঙ-তা এসোসিয়েসনগী আর্টিষ্টশিংনা থাঙপাক চায়নবা, ষ্টিক দান্স, লিক্লি মচেৎ মথক্তা হিপ্পা অমদি মৈ চাবা উৎখি। মসিদা মণিপুরদগী হৈরাংখোংজম বিদ্যালক্ষ্মী দেবীনা সোলো দান্স উৎখি।

থৌরমসিদা অথোইবা মীথুংলেন ওইখিবা অমুকোগী প্রেসিদেন্টনা হায়, মণিপুরদগী হৌখিবা মণিপুরীশিংনা হৌজিক মণিপুরগী ৱাংমদা খুন্দা-লৈতাদুনা লৈখ্রবসু মখোয় মণিপুরী অমা ওইনা চাওথোক্না হিংগদবনি। মরমদি মণিপুর অসি থৌনা ফবগী ৱারী মতিক চানা লৈজবা, ফজরবা কালচার লৈবা অমদি থৌনা ফবা মীয়ামগা লোয়ননা নিঙথৌ কয়ানা লৈঙাক্লকখিবা মণিপুরনি। ঐখোয়গী ইপা-ইপুশিংদু মীথিবোং মীতম্বাল ওইনা খক হিংলক্তে। মীখা পোন্না হিংবসু হৈনরক্তে। মদুমক্না অৱানা চহি ৭ খুন্তাক্তুনা শাথিনা ওৎ-নৈরম্লবসু নিংহন্নবা লৈতনা অমুক লান্মী শেমগৎতুনা অৱা মণিপুরদগী তানখিবনি।

ঐখোয়গী অথৌবা অথৌবী কয়াগী মীতম মণিপুরগী ৱাংমদসু খিনবা অসিনা মফমদুদা খুন্দারিবা মণিপুরীশিংদা শোয়দনা অনৌবা থৌনা কয়া পীগনি অমদি হৌখ্রবা পুৱারীগী তাঙ্কক কয়াদা মণিপুরগী অথৌবশিংনা উৎখিবা থৌনাশিংদুসু নৌহৌননা নীংশিংহনগনি। ত্রিপুরাগী খোৱাই দিষ্ট্রিক্টকী গৌরনগরদা খিল্লিবা নুপী লানগী মীতম অসিনা লাইরিক হৈত্রবা মীওই কয়াদসু নুপী লানগী ৱারী খঙহন্নবগী মচাক অমা ওইগনি।

মরমদি মীতম অমদা মদুগা মরি লৈনরিবা থৌদোক অদু মতম পুম্বগা ৱারী লিরগা লৈরি, মফুরুপকী মীওইশিংদা থৌনাগী ইনোৎ অদুম পীরি। মণিপুরগী ৱাংমদা খুন্দারিবা মণিপুরীশিংনা মখোয় মীরৈবাক্তা লৈরে হায়দুনা হেক্তা পুক্নিং পীকথনা অমদি মীতোপ্তা হায়জ-নোঞ্জদুনা মীকিথি ওইনা হিংগদবা নত্তে। ঐখোয়না ঐখোয়গী হৌরকফম অমদি ইপা-ইপুশিং অদু নীংশিংলবদি ঐখোয় কৈদৌনুংদা নিংহন্নবা পুন্সি মহিং অমদা হিংলোই।

মতম অমদা জার্মানগী নাজি হিটলারনা জিয়ু মচা তুম্নবা হাৎনবগী ফিরেপ লৌদুনা শাথিনা ওৎ-নৈবা, হাৎলকপদা জিয়ুশিংনা মফুরুপ মুথৎপা য়াদে হায়বা ৱাখলদা চৈথেং কয়া ফংলবসু ৱানা খাঙলকখিবনা হৌজক্তি মখোয় মালেমগী মীয়ামদা হৌজিক ওইরিবা মালেমগী অওনবগী শক্তম অসি জিয়ু মচা অহুম (সক্রেটিস, যীশু খৃষ্ট, বিল গেটস) গী খুদোলনি হায়রিবনি।

মণিপুরদা খুন্দারিবা মণিপুরীশিং অসি য়েক্নবনা কোইশিনখ্রবদি অদুগুম্বা মণিপুরগী মণিপুরীশিংবু কোইশিল্লিবা য়েক্নবশিং অদু মণিপুরগী মপান লমদা খুন্দারিবা মণিপুরী ঐখোয়না অমুক কোইশিনগনি হায়বগী থৌনা লৈবীয়ু অমদি ফিরেপ লৌবীয়ু। অদুগা মণিপুরদা লৈরিবা মণিপুরীশিংনসু মণিপুরগী ৱাংমদা খুন্দারিবা মণিপুরীশিংগী অৱাবদা মতেং পাংনবা মতম পুম্বদা শেম শারসি। মণিপুর লৈঙাক্নসু তোঙান-তোঙানবা পোলিসি কয়া পায়খৎতুনা মণিপুরগী মপান লমদা খুন্দারিবা মনিপুরীশিংগী য়াইফ থৌরাং কয়া পায়খৎপীয়ু হায়না অমুকোগী প্রেসিদেন্টনা আপিল তৌখি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু