ত্রিপুরা মণিপুরী খুন্নাইগী অহল এস নবকুমার লৈখিদবগী অভয়নগরদা শোকসভা পালন
আগরতলা, জুন ১১ : তখেনগী মণিপুরী খুন্নাইবু মশক মুন্না খঙবা আগরতলা ম্যুনিসিপাল কর্পোরেশন্না কোল্লিবা মৈতৈ লৈকাইদা খ্বাইদগী চহী চৎলবা অহল শক্নাইরবা সমাজ সেবক শিক্ষাবিদ হেড মাষ্টারসু ওইবিরম্বা সাপম নবকুমার সিংহনা লৈখিদবগী পুথিবা ৱেলফেয়ার এ্যন্ড কলচারেল সোসাইটি অমসুং মণিপুরী লিটরেরী এ্যন্ড কালচারেল ফোরম অমসুং লন্নাই মীওই কয়ানা অৱাবা অমদি নুঙাইতবা ফোঙদোকখ্রে। মরূপ পাউচেগী ইডিটর আরকে তরুনজিৎনা থম্মোয় শোক্না অৱাবা ফোঙদোকখি। লাক্লিবা থাংজা (জুন ১৩) নুমিৎ লৈখিদ্রবা অহল সাপম নবকুমারগী অস্থি সঞ্চয় অভয়নগরদা পাঙথোক্কনি হায়রি। পনবা য়াবদি চৎখিবা জুন ৮ নুমিদাং অথেংবা পুং ১২.৪০ তাবা মতমদা অভয়নগর ময়ুমদা লৈখিদবনি। মশা গী চহী ৯৮ শুখ্রবা মহাক্না লৈখিদবা মতমদা লোইনবী সনাহনবী (নমিতা) অমসুং মরিমতা কয়া থম্বীরম্মী। হয়েং ইরাই নুমিৎ পুথিবা ৱেলফেয়ারনা শীন্দুনা অয়ুক্তা শোকসভা অমা পুথিবা শঙলেন্দা পাঙথোক্কদৌরি।
সাপম নবকুমার সিংহ, ইং ১৯২৮ গী (অগ্রাহায়নদা) দা ছেছুড়িয়া মৈতৈ খুঙ্গংদা পোকখি। বামুটিয়া পরগনা মনুং চনবা ছেছুড়িয়াদা খুন্নাইগী য়াইফনবা অমদি সাংস্কৃতিগী লমদা মহাক্কী থৌদাং কয়াবু ঙসিসু ময়াম্না শোন্নরি। খুন্নাইগী চৎন-কাঙলোন, হৌন লোনচৎ মশক মুন্না খঙবগা লোয়ননা খুন্নাইদা অহোংবা পুরক্নবগী পান্দমদা থবক তৌরম্বা মীশক অমনি।
বীরটিকেন্দ্রজিৎ সংঘ লিংখতুনা অথৌববু মশক খঙহন্নবগী থৌদাং লোয়ননা লীলাসু শান্নহল্লম্মী। মহাক মশক নাইবা অইবা অমসু ওইরম্মী। ইং ২০০৬-০৭ অদুৱাইদা মরূপ পাউচেগী চাং নায়না কলম্নিষ্ট ওইনা থৌদাং লৌরম্মী।
মচা-মশু লৈজদ্রবা মহাক্বা ইং ১৯৯৭ জুলাইদা পোক্নফম ছেছুড়িয়া থাদোতুনা আগরতলাগী অভয়নগর লৈকাইদা খুন্দানা লৈবা হৌখি। ইং ২০০৯ দা অভয়নগরদা পুথিবা লাই হরাওবা কমিটিগী অহানবা চেয়ারম্যান ওইদুনা লমদম অসিদা মৈতৈগী চৎনবী ঙাক্তুনা অভয়নগরদা চাং নায়না লাই হরাওবা থৌরম পাঙথোকহনবগী থৌদাং লৌদুনা লাকখি। খুন্নাইবু মশক মুন্না খঙবিরম্বা গার্জিয়ানসু ওইবীরম্বা মহাক্না অসুম্না লৈখিদবসি খুন্নাইগীদি অচৌবা মাঙজবা হায়বদু ওইরবনি হায়না অভয়নগরগী খুঞ্জাশিংনা হায়রি। জুন ২১দা লৈখিদ্রবা মহাক্কী অপাম্বা মতুং ইন্না শ্রাদ্ধ কর্ম নবদ্বীপতা পাঙথোক্কনি হায়না ৱেলফেয়ার সোসাইটিগী থৌবুরেন অমনা হায়রি।
সোর্স - মরূপ
0 কমেন্ট:
কমেন্ট তৌবিয়ু