আগরতলা, জুন ৩০: তাবুনুংদগী চিংথোক্লগা ত্রিপুরাগী মৈতৈগী পুৱারীবু মশক থোক্না ময়ামদা খঙহনবদা চাওনা থৌদাং লৌবিরম্বা তখেনগী স্নাখ্যা রাজকুমার কমলজিৎ সিংহনা লৈখিদবগী চহী ২০ শুবা নীংশিং কুমওনগী থৌরমদা শ্রদ্ধাঞ্জলি কৎখ্রে।

চৎখিবা জুন ২৪, থাংজা নুমিৎ মরূপ পাউচেগী মঠচৌমুহনী শঙ্গায়দা পাঙথোকখিবা অচম্বা থৌরম অদু পাউচে অসিগী এডিটর আরকে কল্যানজিৎনা থৌরম মপু ওইরগা অভয়নগর পুথিবা লাই হরাওবা কমিটিগী চেয়ারম্যান এন নিরঞ্জন দত্তনা চীফ গেষ্ট অদুগা মণিপুর সাহিত্য পরিষদ, ত্রিপুরাগী ভাইস প্রেসিডন্টে এস খেলামোহন সেননা গেষ্ট অব ওনার ওইখি। স্নাখ্যাগী ফটো শক্তমদা হৈকৎ-লৈকৎ তম্বগা লোয়ননা মিনিট অমা তুমিন্না লেপ্তুনা লৈখিদ্রবা মহাক্কী আত্মা শান্তিগীদমক থৌনিজখি।

থৌরম অদু পাউচে অসিগী জয়েন্ট ইডিটর আরকে তরুনজিৎনা ওক্না-ৱারোল পীখি। থৌরম অদুদা স্নাখ্যাবু স্মৃতিচারণ তৌদুনা মহাক্কী সেবক ওয়াংখেম বীরমঙ্গল অমসুং এন নিরঞ্জন দত্তনা মরু ওইনা ৱা ঙাংখি। থৌরমদা এস খেলামোহন, ৱাই চন্দ্রকীর্তি, টি যোগেন্দ্র দত্ত অমসুং মণিপুর থৌবালগী অসেম লবঙ্গবু ৱা ঙাংখি। থৌরম অসিগা মরী লৈননা এস খেলামোহননা মোডেরেটর ওইরগা শৈরেং শৈদিন্নবা থৌরম অমদা স্নাখ্যাবু শৈথারগা এন নিরঞ্জন দত্ত, সনসম ওংবী উমা, তোপসুবম যোগেন্দ্র দত্ত অমসুং সিজা মলিনানা তোঙান তোঙানবা শৈরেং পাথোকখি।

সোর্স: মরূপ