ইম্ফাল, জুলাই ১ : হৌখিবা মে ৩দগী হৌরকখিবা খুৎলায় পায়বা কুকি মিলিটেন্ট অমসুং মীতৈ মীচম অনীগী মরক্তা থোক্লিবা ঈরাংনা মরম ওইদুনা মণিপুরগী তম্পাক্লমদা হাংলিবা তোঙান তোঙানবা রিলিফ কেম্প অমসুং লান্সঙশিংদা রিজনেল ইন্দিজিনাস ফোরাম ফোর পিছফুল কো-একজিস্তেন্স মণিপুরগী খূত্থাংদা অমসুং ফোরামগা খূৎশম্নদুনা লুপা লাক্ষ ৭ হেনবগী মতেঙ পীখ্রে হায়রি।

অহানবদা আসামগী ব্রহ্মপুত্র তম্পাক্তা লৈবা হোজাই, লঙ্কা অমসুং জুগিজান্দা লৈবা মণিপুরীশিংদগী লাকপা শেনফম লুপা লীশীং ৩০ অদুগা অপূনবা নুপী খুন্নাই হোজাইদগী লুপা লীশীং ৫গী শেনফমশিং মোইরাং মায়কৈদা হাংবা রিলিফ কেম্প খরা অমসুং খুন্দাকপম কেন্দ্রগী রিলিফ কেম্প খরদা মতেঙ পীখি।  

অনীশুবা ওইনা বরাক ম্যুজিয়াম এন্দ লাইব্রেরি বনতরাপুর, আসামদগী শিন্নরকখিবা লুপা ১০,৫০০ না হৌখিবা মে ১৬ অমসুং জুন ৭ তা সুগনু অমসুং ফয়েংগী লানফমদা শিনিংচিত্তা হিং হৌরবা মীওই অনীদা মখোয়গী থৌনাবু ইকায়খুম্নবা ওইনা খুদোল তমখি হায়রি।

অহুমশুবা ওইনা, বরাক তম্পাক্কী মশক নাইরবা লূপ অমমম ওইরিবা মীতৈ পুক্কৈ লূপ অমসুং অথৌবা নীংশিং লূপ অনীগী প্রেসিদেন্ত, সেক্রেটারি অমসুং এদভাইজর য়াওবা মীহুৎ মরিনা শাবা তিম অমা ইম্ফালদা লাক্তুনা ফোরাম অসিগী মীহুৎশিংগা লোয়ননা জুন ১৪ দগী ১৬ ফাওবদা ঈরাং অসিনা কা হেন্না শোকহল্লবা অকক্নবা মফম খরা খনগৎতুনা খুল ঙাক্লিবা ভলুন্তিয়রশিংগী লান্সঙদা চত্তুনা মতম পীখি।

মফমশিং অদুদি সুগনু, তাংজেং, মোইরাং লমখায়, অকাম্পাৎ, কংলাতোংবী বাজার বোর্দ মন্ত্রিবন লৈকায়দা হাংবা লান্সঙ, সেকমাইদা হাংবা লান্সঙ. লৈমখোং চীংমাং, সেঞ্জর চিরাং, ফয়ৈং অমসুং সিংদা কদাংবন্দ-১ নচিংবনি হায়রি।

সোর্স: পোক্নফম