টিকেন্দ্রজিৎ, পাওনা, জাদোনাং অমসুং রানী গাইদিনলিয়ুবু আসামগী ফ্রীদম ফাইতরনি হায়রি
ইম্ফাল, নভেম্বর ১৮ : মহাত্মা গান্ধীবু নীংশিংবা ওইনা গুৱাহাতিগী উলুবারীদা লৈবা সরানিয়া চীংদোন্দা শারগা থম্লিবা ‘গান্ধী মান্দপ’ হায়রিবা ম্যুজিয়িম অসিদা বৃটিশকী মায়োক্তা নীংতম ঈহৌ চঙশিন্দুনা থৌনা লৈনা থেংনখিবা লমদম অসিগী ফ্রীদম ফাইতর মরি বী টিকেন্দ্রজিৎ, পাওনা ব্রজবাসি, হাইপৌ জাদোনাং অমসুং রানী গাইদিনলিয়ুবু মতম অমদা আসাম স্তেত অসি কায়দ্রিঙৈগী মমাঙদা লৈরম্বা ফ্রীদম ফাইতরশিংনি হায়না ফোটো থেত্তুনা মণিপুর অসি আসামদগী তোখায়না খাদোক্লকখিবা স্তেত অমগুম্না উহল্লিবা অসিনা মণিপুরগী পুৱারীবু লান্না লমজিংলব্রা হায়বা ৱাফম অমা লাক্লি।
গুৱাহাতিগী উলুবারীগী সরানিয়া হিলসকী মতোন্দা শারিবা ম্যুজিয়ম গান্ধী মান্দপ অসি মহাত্মা গান্ধীনা ইং ১৯২১ অমসুং ইং ১৯৪৬ তা সরানিয়া চীংদা লাকখিবা অদুবু নীংশিংদুনা মহাক্কী মমিং দা শাখিবনি। গান্ধী মান্দপ অসি ইং ১৯৭০ দা লৈবাক অসিগী প্রাইম মিনিস্তর ওইরম্বী ইন্দিরা গান্ধী অমসুং আসামগী মতম অদুগী চীফ মিনিস্তর বিষ্ণুরাম মেধিনা শঙ্গাখিবনি। গান্ধী মান্দপ অসিদা পুৱারীগা মরী লৈনবা কয়াবু য়োক্তুনা থম্লি।
ম্যুজিয়ম অসিদা মহাত্মা গান্ধীগী পুন্সি ৱারী অমদি মহাক্না আসামদা লাক্তুনা সরানিয়া হিলসতা লাক্লম্বগী ৱাফমশিং কয়া অমসু ইদুনা থম্লি। গান্ধী মান্দপ অসি হৌজিক তুরিজমগী য়াম্না মরুওইবা মফম অমসু ওইরি। সরানিয়া চীংথক্তগী গুৱাহাতিগীমফম কয়া অমা উবা ফংলিবা অসিনসু মান্দপ অসি য়াম্না মরু ওইবা মফম ওইনা লমকোইবশিংনা য়েংনরি।
হন্দক্তা ইম্ফালদগী মী অমনা গান্ধী মান্দপতা চত্তুনা য়েংলূবদা য়াম্না অঙকপা মওংদা মণিপুরগী ফ্রীদম ফাইতরশিং বীর টিকেন্দ্রজিৎ, পাওনা ব্রজবাসী হাইপৌ জাদোনাং অমসুং রানী গাইদিনলিয়ুগী ফোটোশিং ম্যুজিয়াম অদুগী মনুংদা দিসপ্লে বোর্দশিংদা থেত্তুনা মতম অমদা আসাম স্তেত খায়দোক্নদ্রিঙৈদা লৈরম্বা ফ্রীদম ফাইতরশিংনি হায়না য়াওরম্বদু থেংনরকখিবনি।
মফম অদুদা ফোতোশিং অদু তোঙান তোঙানবা দিসপ্লে বোর্দ অনীদা থেৎলমখি। ফ্রীদম ফাইতরশিংগী ফোটোশিং অদুগী মরক্তা গোপিনাথ বোর্দোলোই, হেলেন লেপচা, কিরনবালা বোরো, ত্রিলোচান্দ পোখ্রেল, রেবতি লাহোন, মীনা অগ্রৱাল, মোজি রিবা, কেংকি মেগু, কনকলতা রারুৱা, কুশল কোনৱার, মণিরাম দেৱান, য়ু কিয়াং নোংবাহনচিংবা য়াওরি হায়রি।
হৌজিক লাক্লিবা ৱাফমদি মণিপুর অসি ইন্দিয়াদা তিন্দ্রিঙৈদা নিংথৌ পানবা মনীংতম্বা লৈবাক অমা ওইনা লৈরম্মি হায়বসি হিস্ত্রিদা য়াওরগা লৈরিবনি। লৈবাক অসিনা বৃতিশকী মখূৎতগী নীঙতমদ্রিঙৈ নোংমা হান্না মণিপুরনা বৃতিশকী মখূৎতগী নীংতম্বা ফংখিবনি। অসুম্না লৈবাক অসিদা লৈরিবা স্তেত অমত্তদা পূল্লমদবা মণিপুরবু আসামদগী খায়দোক্লকখিবা স্তেত অমা ওইনা উহনবা মওংদা স্তেত অসিগী ফ্রীদম ফাইতর মরিগী ফোটোশিংবু গান্ধী মান্দপ ম্যুজিয়িমদা থেৎচিন্দুনা থম্বা অসিনা পুৱারীবু লান্না লমজিংবা ওইনা থোক্লে হায়না মফম অদুবু য়েংলুবা নুপা অদুনা ফোঙদোক্লি।
পনবা য়াই, অৱাং নোংপোক্কী স্তেতশিং মেঘালয়, নাগালেন্দ, অরুনাচল প্রদেশ মিজোরাম অসি আসাম স্তেততা পূন্না য়াওরম্বদগী খায়দোক্লকখিবনি। আসাম স্তেতনা অতৈ স্তেতশিং খায়দোক্ত্রিঙৈদা স্তেত অসিগী কোনং হৌজিক্না মেঘালয়গী কেপিতেল ওইরিবা শিল্লোংদা ওইরমখি। মদুগী মতুং ইং ১৯৭২ দা দিস্পুরদা হোৎদোক্লকখিবনি।
সোর্স: পোক্নফম
0 কমেন্ট:
কমেন্ট তৌবিয়ু