image

গৱা নেসনেল গেমস-ডে ২

ইম্ফাল, ওক্তোবর ২৬ : গৱানা য়ূম্বু ওইদুনা চত্থরিবা ৩৭ শুবা নেসনেল গেমস ২০২৩ গী ঙসি নীনি চনবা নুমিৎতা মণিপুরনা জিম্নাস্তিক্সতা গোল্ড অনী অমসুং সিলভর অমা লৌখ্রে। মণিপুরগী গোল্ড মেদলশিং অদু নুপীগী এরোবিক ইন্দিভিজুয়েলদা অরিহা পাঙম্বম্না অমা অমসুং নুপীগী ত্রাইওদা অরিহা, মহাক্কী মনাওনুপী অঞ্জুরি পাঙম্বম অমসুং লৈশিলেম্বী চবুংবমগী তিম্না লৌখি।

অরিহানা পোইন্ত ১৭.৬০ স্কোর তৌদুন ইন্দিভিজুয়েলগী গোল্ড অদু লৌখি। ইভেন্ত অদুগী সিলভারনা ওয়েস্ট বেঙ্গলগী  মজিদা খাতুন্না পোইন্ত ১৭.২০ স্কোর তৌদুনা সিলভার লৌখি, অদুগা মহারাস্ত্রগী সক্ষি মকররন্দ দোংনা পোইন্ত ১৬.৯৫ স্কোর তৌদুনা ব্রোঞ্জ লৌখি। নুপীগী ত্রাইও ইভেন্ততা মণিপুরগী অরিহা, অঞ্জুরি অমসুং লৈশিলেম্বী অহুম্না পোইন্ত ১৭.২২ স্কোর তৌদুনা গোল্ড লৌখি। ইভেন্ত অদুগী সিলভারনা মহারাস্ত্রনা অমসুং ব্রোঞ্জনা সার্বিসেসনা লৌখি।

  

                            pic. @Manipuri Sports News  

 

নুপাগী আর্তিস্তিক জিম্নাস্তিক্সকী ফ্লোর এক্সরসাইজদা সনসম রুবন মৈতৈনা সিলভার মেদল লৌখি। মহাক্না পোইন্ট ১২.৯০০ স্কোর তৌদুনা সিলভর মেদল ফংবা ঙমখি। ইভেন্ত অদুগী গোল্ডনা হরিয়ানাগী যোগেশ্বর সিংহনা পোইন্ত ১৩.২০০ স্কোর তৌদুনা লৌখি, অদুগা উত্তর প্রদেশকী সিদ্ধার্থ ভর্মনা পোইন্ত ১২.৭৬৭ স্কোর তৌদুনা ব্রোঞ্জ লৌখি।

মণিপুরগী জিম্নাস্তিক্সকী কোচ য়াংলেম বোনিনা হায়, ঐখোয়গী নুপামচা অমসুং নুপীমচাশিংনা জিম্নাস্তিক্সতা ঊৎলিবা পারফোর্মেন্স অসি য়াম্না পূক্নিং থৌগৎনিংঙাইনি অমসুং মশান্না অসিগী অনৌবা কম্পিতিতিভ এরেনাদা অনৌবা মীরোলগী মরক্তা ইনৌ নৌরবা পাম্নবা অমা ওইরগনি হায়না ঐখোয়না আশা তৌই।

পেনকেক সিলাত : গৱা নেসনেল গেমসতা ঙসিসু মণিপুরনা পেনকেক সিলাত্তা মখা তানা ব্রোঞ্জ মেদল অনী লৌখ্রে। মণিপুরগী শমজেৎশাবম বিদ্যালক্সমিনা নুপীগী তান্দিংগী কেজি ৪৫ গী মখাগীদা ব্রোঞ্জ মেদল লৌখি, অদুগা নুপাগী কেজি ৫০-৫৫গী কাংলূপ্তা মণিপুরগী নাওরেম বোয়নাওনা অতোপ্পা ব্রোঞ্জ অমসু লৌখি।

ফুতবোল : মণিপুরগী নুপী ফুতবোল তিম্না গৱা নেসনেল গেমসতা ঙসি ঝারখন্ডবু ৫-১ দা মায়থীবা পীদুনা মায়পাক্না কেম্পেন হৌদৈকখ্রে। মণিপুরগী নুপীশিংনা মেতচ অদু হৌরকপদগী লাকশিন্না শান্নখি। মেতচ অদু মাঙজিন থানবা হোৎনবদা মিনিত ১০ খক চঙখি। নোংমৈকাপম সিবানি দেবীনা অহানবা গোল চন্দুনা মাঙজিন থানা হৌখি।

মিনিত মঙাগী মতুংদা তিম কেপ্তেন ইরোম প্রমেশ্বরিনা অতোপ্পা গোল অমা হাপবিন্দুনা গোল অনী মাঙজিন থাখি। মেতচকী ১৮ শুবা মিনিত্তা তোইজম থোইবীসনা চনুনা অতোপ্পা গোল অমগা হাপচিন্দুনা হাফটাইমদা মণিপুরনা ৩-০ দা মাঙজিন থাদুনা চৎখি। অনীশুবা হাপতসু মণিপুরনা মখা তানা দোমিনেত তৌদুনা শঅন্নখিবগা লোয়ননা ৬৪ শুবা মিনিত্তা লিশম ববিনা দেবীনা তিমগী মরিশুবা গোল চনখি।

মেতচকী থেংথরকপা শরুক ৮২ শুবা মিনিত্তা ঝারখণ্ডদনা পেনাল্টি অমা ফংখি। তিম অদুগী সুধা অঙ্কিতা তির্কিনা পেনাল্টি অদু গোল ওন্থোক্তুনা গোল অমা হন্থহনখি, অদুবু মণিপুরগী মায়কৈদগী মিনিত মঙাগী মতুংদা মোইরাংথেম অম্বিকা দেবীনা তিমগী অতোপ্পা গোল অমা হাপচিন্দুনা মেতচ অদু ইকোম কোম্না ৫-১ দা মায় পাক্নবগী লম্বী য়ৌখি। মণিপুরনা মথংগী মেতচ ওইনা লাক্লিবা নোংমাইজিং নুমিৎতা ওয়েষ্ট বেঙ্গলগা লম্বা তৌনরগনি। গেমস অদুদা মণিপুরগী নুপা তিম্না মখোয়গী ওপনরদা মেঘালয়গা ওক্তোবর ৩১ দা শান্নদুনা কেম্পেন হৌদোক্নবা শেম শারি।

ওয়েটলিফটিং : গেমস অদুগী ওয়েটলিফটিং মশান্নদা মণিপুরগী পোৎশঙবম উমেশ্বরি দেবীনা নুপীগী কেজি ৭১ কাংলূপ্তা ব্রোঞ্জ লৌখ্রে। উমেশ্বরিনা স্নেত্চতা কেজি ৮৫ অমসুং ক্লিন এন্দ জার্কতা কেজি ১০৪ পূন্না কেজি ১৮৯ থাঙ্গৎতুনা মেদল অদু লৌখি। মহাক্না স্নেতচকী অহানবা এতেম্প কেজি ৭৮ মায় পাক্না থাঙ্গৎখ্রবা মতুং অনীশুবা এতেম্পতা কেজি ৮২ থাঙ্গৎলবা মতুঙদা অহুমশুবা তেম্পতা কেজি ৮৫ মায় পাক্না থাঙ্গৎখি।

অদুমওইনমক, মহাক্না ক্লিন এন্দ জার্কতা অহানবা এতেম্প খক্তমক মায় পাক্না থাঙ্গৎখি। মহাক্না এতেম্প অদুদা কেজি ১০৪ থাঙ্গৎখি। ওয়েট কাংলূপ অদুগী গোল্ডনা পাঞ্জাবকী হরজিন্দর কোরনা অপূনবা কেজি ২০১ থাঙ্গৎতুনা লৌখি, অদুগা মহারাস্ত্রগী ক্রুপ্তিনা অপূনবা কেজি ১৯০ থাঙ্গৎতুনা সিলভার লৌখি।

নুপীগী কেজি ৭৬ কী কাংলূপ্তা মণিপুরগী সঞ্জাবম চাওবা দেবীনা ব্রোঞ্জ অমসু লৌখি। মহাক্না স্নেতচতা অনীশুবা এতেম্প খক মায় পাক্না কেজি ৮৩ থাঙ্গৎখ্রবা মতুংদা ক্লিন এন্দ জার্কতা মহাক্কী এতেম্প আহুম্মক মায় পাক্না থাঙ্গৎখিবগা লোয়ননা অরোইবা অমসুং অহুমশুবা এতম্পতা কেজি ১০৯ থাঙ্গখি। মহাক্না অপূনবা কেজি ১৯২ থাঙ্গতুনা মেদল অদু তানবা ঙমখি।

ওয়েট কাংলূপ অদুগী গোল্ডনা উত্তর প্রদেশকী বন্দনা গুপ্তনা অপূনবা কেজি ২০৭ থাঙ্গৎতুনা লৌখি অমসুং সিলভারনা পঞ্জাবকী হরমনপ্রিৎ কোরনা অপুনবা কেজি ১৯৩ থাঙ্গৎতুনা লৌখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু