ইম্ফাল, ওক্টোবর ২৫ : অনৌবা নেসনেল রেকোর্দ থমখিবগা লোয়ননা লোয়ননা ফমদোম রানীবালানা নুপীগী ওয়েটলিফতিংগী কেজি ৫৫গী কাংলূপ্তা গোল্ড লৌদুনা গৱানা য়ূম্বু ওইরিবা ৩৭ শুবা নেসনেল গেমসতা মণিপুরগী মেদল মশীং থীবা হৌখ্রৈ।

রানীবালানা স্তেত অসিগী অহানবা মেদল ওইনা গোল্ড অদু লৌনবা হোৎনবদা স্নেতচতা কেজি ৯০ থাঙ্গৎতুনা নুপীগী কেজি ৫৫গী কাংলূপকী অনৌবা নেসনেল রেকোর্দ অমা থম্বা ঙমখি। মহাক্কী স্তেতমেত ওলিম্পিক সিলভর মেদলিস্ত মিরাবাই চনুনা চহী অসিগী মার্চ থাদা মহাক্কী ওয়েট কেজি ৪৯দগী কেজি ৫৫দা কাখৎতুনা নেসনেল চেম্পিয়নশিপ্তা কম্পিত তৌদুনা কেজি ৮৬ থাঙ্গৎতুনা থমখিবগা নেসনেল রেকোর্দ অদুদগী হেন্না ফনা রানীবালানা থাঙ্গৎখি।

স্নেত্চতা মহাক্না দোমিনেত তৌখিবগা লোয়ননা অনৌবা নেসনেল রেকোর্দা থমখ্রবা মতুংদা রানীবালানা মহাক্কী ক্লিন এন্দ জার্কতা কেজি ১০৬, অপূনবা কেজি ১৯৬ থাঙ্গতুনা গোল্ড মেদল অদু লৌখি। ওয়েস্ট বেঙ্গলগী শ্রাবনি দাসনা স্নেত্চতা কেজি ৮১ অমসুং ক্লিন এন্দ জার্কদা কেজি ১০৬ অপূনবা কেজি ১৮৭ থাঙ্গতুনা সিলভার লৌখি, অদুগা ওড়িশাগী স্নেহা সোরেন্না স্নেত্চতা কেজি ৮০ অমসুং ক্লিন এন্দ জার্কতা কেজি ১০৬ থাঙ্গৎতুনা ব্রোঞ্জ লৌখি।

লিলোং অরাপ্তিদগী ফমদোম কুঞ্জো সিংহ অমসুং রোবা দেবী অনীগী মচানুপী রানীবালাগী ওইনা হন্দক্কী অসিনা নেসনেল গেমসকী অনীশুবা গোল্ড ওইখি। মমাঙ চহী ইং ২০২২ গুজরাট নেসনেল গেম্সতা চপ মান্নবা ওয়েট কাং লূপ্তা গোল্ড লৌখি। মহাক্না গান্ধিনগরদা অপূনবা কেজি ১৮৮ থাঙ্গৎতুনা গোল্ড লৌখিবা অদুদগী হন্দক্কী অসিনা য়াম্না হেন্না ফীবম ফগৎনা পারফোর্মেন্স ঊৎখি।

মশাগী চহী ২৫ শুরবী মণিপুরগী নুপী ওয়েটলিফ্টর রানীবালানা টেলিফোনগী খূত্থাংদা পোক্নফমদা হায়, ঐহাক্না গৱাগী নেসনেল গেমস অসিদা মণিপুরগী অহানবা মেদল ওইনা গোল্ড লৌখিবদা অদুক্কী মতীক নুংঙাই। মসি ঐগী ইমুং মনুঙ, ওজাশিং অমসুং স্তেত এসোসিয়েসনগী মতেঙনা লৌবা ঙম্বনি।

মহাক্কী স্তেতকী ওইরিবা ফীবম অদুগী মতাঙদা পল্লদুনা রানীবালানা হায়, মণিপুরদা অচৌবা ঈরাং অমা মায়োক্নরিবনা গেমস অসিগীদমক শেম শাবদা খুদোংচাদবা ফীবম খরদি মায়োক্নখি। অদুবু শীংনবা খুদীংমক তুংওইনরম্লগা ঙসিগী মায় পাকপা অসি ফংবদা নুংঙাই অমসুং ঐহাক্কী মায় পাকপা অসিনা পূক্নিং লৈতাবা খঙদ্রবা ঐগী স্তেতকী মীয়াম্না মিকুপ অমত্তা ওইরবসু হরাও তয়ামদুনা চাউথোকচবা পোক্লমগনি। ঐহাক্কী তুংদা মীয়াম্না লেপ্পিদুনা ঙসিগী ঐগী মায় পাকপা অসি তানবা ঙম্বনি। মসিগীদমক তৌবীমল খঙবা উৎচরি।

নেসনেল গেমসকী দবল গোল্ড মেদলিস্ত অমা ওইনা স্তেত গভর্নমেন্তদগী নহাক্কীদমক করি তৌহন্নিংঙি হায়না হংখিবদা ওয়েটলিফ্টার অদুনা হায়, ঐহাক্না হেন্না ৱাংবা থাক অমদা লৈবাক অসিগী অমসুং মণিপুরগীদমক মখা তানা মিংচৎ তান্নিংলি। মসি মায় পাক্নবা চঙশিনবা হায়বসি স্তেত গবর্নমেন্তগী অচৌবা মতেঙ অমা মথৌ তাগনি খল্লি স্তেত গবর্নমেন্তনা ঐহাক্কী এদজুকেসন ক্বালিফিকেসনগা চূনবা থবক অমা পীহন্নিংঙি। মসি ওইরগদি ফাইনান্সিয়েল সাউন্দ ওইরগনি অমসুং মখা তানা ঐহাক্কী ত্রেনিংদো অহেনবা পূক্নিং চঙদুনা ইন্টারনেসনেল কম্পিতিসনশিংদা মায় পাকপা ঙমগনি হায়বসি ঐহাক্কী অচেৎপা থাজবনি।

হৌজিক রানীবালানা মথংগী টার্গেত হায়বা তারবদি লাক্কদৌরিবা ইন্টারনেসনেল কম্পিতিসনশিংদা শরুক য়াদুনা মেদলশিং লৌনবা হোৎনবা হায়বসিনা ওইরি। মহাক্না হায়, ঐগী ওয়েট কাংলূপ অসি পেরিস গেমসকী নুপীগী ওয়েট কাংলূপশিংগী মরক্তা য়াওদবনা পেরিসতা চৎনবগী উপায়দি লৈতে। ঐহাক্কী ওইনসু ওয়েট হোংদোক্তুনা ওলিম্পিক্সতা চঙনবগী থৌরাং হৌজিকমক্কীদি লৈতে। অদুমওইনমক, হৌজিক ঐহাক্না ইন্দিয়া কেম্পতা য়াওদুনা ইন্টারনেসনেল কম্পিতিসনশিংদা শরুক য়ানবা পান্দম থম্লি।

পনবা য়াবদি, ৩৭ শুবা নেসনেল গেমসকী কম্পিতিসন অসি ঙসিদগী হৌরবসু ওফিসিয়েল ওইনা গেমস হৌদোকপগী থৌরমদী হয়েং পাঙথোক্কদবনি।

সোর্স: পোক্নফম