কোভিদ অমসুং ঐগী ৱারী – হামোম প্রমোদ
কোভিদ অমসুং ঐগী ৱারী
[ কোভিদ-১৯ লায়না'গা লান্থেংনরবা মতুংদা হকচাং অমসুং ৱাখল না খরা চোক্থনা লৈবা মতমদা ইখিবা ৱারেং-শৈরেংনি। অহান্বদা চাংয়েং ওইনা ঐনা ফেসবুকতা খুদক খুদক্তা ইথোকলগা ময়ামদা শেয়ার তৌজখিবনি। মতমদুদা ইথোকখিবা ৱাহৈ পরেং অমদি শিজন্নখিবা স্টাইল অদু খজিক্তং শেমদোকচরগা অমুক অপাবাশিংদা লান্থোকচবনি। ময়াম পাবিয়ু, নৈনবিয়ু।– হামোম প্রমোদ ]
হামোম প্রমোদ
কোভিদ অমসুং ঐগী ৱারী - ০১
নহানদো, মৌ অতোম্বীনা মেসেজ থারকই। ইমানা ৱারী শান্ননিংই। উনিংই। য়েংনিংই। মেসেঞ্জারদা। ফেসবুকতা। ঐঙোন্দা।
ঐ না হোসপিটালদা, ইদোমতা। কা অমদা, ইদোমতা। ফমুং অমদা, ইদোমতা। খুৎতা হিদাক কাপলি, ইদোমতা। নাতোনদা ওক্সিজেনগী পাইপ, ইদোমতা। থবাকতা মখন মথেনগা মেশিনগী মরি মরাংগা, ইদোমতা। ইদোমতা, ঐ'তা।
ইদোমতা।
ঐ ৱায়, শাথিনা ৱায়। ৱারী শানিংদে, ৱা ঙাংনিংদে। করিমতা হৈনিংদে, করিমতা য়েংনিংদে। অদুবু ইমানি, ঐগী অপংবী (ঐতনা খঞ্জবনি) ইমানি; নাপংবী ইম! চহী অহুম্মুক ফারে উন্নদবা, ৱারী শান্নদবা, শক মায় উন্নদবা।
করম্না?
নুমিৎ অনিতং, ফরে হাইয়ু, হকচাং নুঙাইরে হাইয়ু... হয়েং তৌরক্কে -- মেসেজ থাখি। মোবাইলদগী, ফেসবুক মেসেঞ্জরদগী।
ইমাদো ঙায়রী ঐবু, য়েংনিংবনা, উনিংবনা; অসোমদনা ঐনা ৱা ঙাংনিংদে, ঙমদে, উহন্নিংদে, ঐগি শোল্লবা খোঞ্জেল, তাহন্নিংদে।
ওহ! ওহ! শ্বোর ফুল্লে O O2 O O2 ওক্সিজেন! ওক্সিজেন! ... খজিক্তংগা, কোলিং বেল নম্মী, কৌই, নার্স! নার্স! O O2 O O2 ওক্সিজেন ... শ্বোর হোন্বা ঙমদ্রে, ৱারে। ঐ ৱারে, শ্বোর হোন্বা ...। শ্বোর হোন্বা, শ্বোর হোন্বা ৱারে, ৱারে ...।
ইমা! ইমা! ইমা!
নার্স! নার্স! নার্স! ...
আহ! আহ! আহ! আহ!
ঐ ৱারে, ইমা!
ইমা না হায়, নংসে, হন্দকসে দশা ফত্তেনে...
ঐ না হায়গে তৌই, ঐগীতা নত্তে দশা ফত্তবা, মালেম পুম্বগী দশা ফত্তবনি ইমা, মালেম পুম্বগী, দশা ফত্তে, দশা ফত্তে ...।
- য়ুম লাই খুরমই ঙরাং, সিধা থীন্দোকখ্রবনি নহান, অহন খরসু চাক পিজৈ, ভোগ কৎলি লায়দা, কৈসু তৌরোইদা, ঐ লৈরী , ইমা লৈরী, লাই খুরম্মু, ইশ্বর খুরম্মু, য়ুম লাই খুরম্মু, হৌগৎলকপগা গুরু ... ইশ্বরগী মীং লৌ ... কৈসু তৌরোই, ঐ লৈরি, নখোয় ময়ামগী ঐ লৈরী। নচা চাওদ্রি, ফরক্কনি দা, ঐ লৈরী... ইমা লৈরী, নচা পিক্লি, ৱাখন শোন্দগনু; ঐ লৈরী , ইমা লৈরী...
- করি হায়রি মো? মানা হায়রিসে ঐ তাদ্রেনে -- ইমানা মৌ অতোম্বীদা হায়। ঐ নাকোংসিনগা ... নংগী মোবাইল ... করি হাইরিমো - মদোমতা মুরুম মুরুম শোল্লি।
হৌগৎনা ফম্বা ঙম্মে... খল্লুনু, ফরনিদা --ঐনা হায়জৈ; ইমাদো তাদে, তাদে ঐগী অপংবী, নাপংবী ইমা দো; তাদে...।
অতৈসু হায়নিংখি, ফরক্কনি, মালেম পুম্বগী দশা কোকখিনি। খরনিতনি, ফরক্কনি। মালেম পুম্বা লায়চৎ অমনা কৈসু তৌবা ঙম্মোয়। দশানি! খরনিগি দশানি। ঐখোয় মীওইবনা শোয়বননি। ঐখোয়না শোয়বনি, ইশ্বরগী নত্তে। মপুগী নত্তে, ঐখোয়গী দশানি। ফরক্কনিদা, খরনিতনি ইমা ...।
ঐখোয় মীওইবা ...
ওহ! ওহ! আহ! আহ! নার্স! নার্স! ওক্সিজেন! ওক্সিজেন! ... খজিক্তংগা...
কোলিং বেল নম্মী।
কৌখি, নার্স! নার্স! ওক্সিজেন! ... শ্বোর হোন্বা ঙমদ্রে, ৱারে, ঐ ৱারে, শ্বোর হোন্বা ...
ইমা! ইমা! নার্স! ... নার্স! ...
আহ! আহ! ঐ ৱারে, ইমা...!
মোবাইল মুথৎখি।
ইদোমতা, কা অমদা ইদোমতা। ফমুং অমদা, ইদোমতা। খুৎতা হিদাক কাপলি, ইদোমতা। নাতোনদা ওক্সিজেনগী পাইপ, ইদোমতা। থবাকতা মখন মথেনগা মেশিনগী মরি মরাংগা, ইদোমতা।
ইদোমতা, ঐ'তা।
ইদোমতা।
কোভিদ অমসুং ঐগী ৱারী -০২
মাংখিবা মীওইদুদি ফংবসু য়াই, চেনখিবা মহাকপুদি করম্না ফংগদগে, কদাইদবু থীরুদোরিবনো। লমহুকনখিবা মাবুদি লমজিংবিবা য়াই, মীচেন নংবুদি করম্না... চেনগনু, পোত্থাও, ঙহাক লেপ্পু, অদুবু থেংনগদবনি, ইশিংদা, কংফালদা, চীংদোনদা, মোংশোংদা, মীরক্তা, উরক্তা, অমম্বদা, অঙান্বদা। মীয়াম মরক্তসু, ইদোমতাসু থেংনগদবনি। থেংনগদবনি, খংহৌদবা মীকুপ্তা মাংখিবা, চ্যোকশিনদবা ক্ষেনফমদা লমহুকনখিবা য়াই। অদুবা চেনগনু, মীচেন ওইগনু। চেনগনু, থেংনগদবনি। মীয়াম মরক্তসু, ইদোমতা ওইরসু, থেংনগদবনি।
হে রা ...।
নুমীৎ মঙানিমুক ফারে, অরুম কন্না হৌরি, অমুক ঈং, অমুক শা, হুমাংনা পুমচোৎ হেক চোৎলি। খরা শোন্থরে। অদুুবু হৌগৎপা ঙম্মী, তোয়লেততা ইদোমতা চৎপা ঙম্মী। খরদি ৱাই। ৱাই। হৌগৎলগা, চৎলুরগা ৱাই। শ্বোর হোন্বা খরা খরা ৱাবা হৌগৎলে। অদুবু অরুম হৌবা লোয়বগা, হুমাং কাংবগা হকচাং নুংঙাই, করিসু তৌরোই খল্লি। ফজখ্রনিদা।
নুংতিগী ডাক্তরনা ফোন তৌরকই, পাবলিক হেল্থতগী পুং খর খর লৈরগা আপডেট লৌরি।
করিসু তৌরোইদা। খরনিতনি। অরুম খক্তনি। নো প্রোব্লেম।
-কোফিং?
- নো।
-এনি পেইন?
- নো।
-হেদেক?
- নো।
-ও কে। শোর্তনেস ওফ ব্রেথ?
- নো, নোত ইয়েত।
-ও, ও কে, দেন ।
ঐ সু হায়, ও কে । থেঙ্ক ইয়্যু।
-করিসু তৌরোইদা। তেক কেয়ার। ফোন থমখি।
ঙরাংরা, নহানলা, মার্চ ২০, ঐখোয়গী পুন্সী লৈপুন নুমীৎনি। কাউখিবদি নত্তে, থৌশাখিদবনি। ইশাগী ওইবা থৌরম পুম্নমক্তা ঐ সে খরা থৌশানিংদে, শেন থুমদা চেকশেনদে, ইশাগী হকচাংদা চেকশনদে, ইমুং মনুং থবক থৌরমদা থৌশাদে, খরা পংজবা হায়দুনি। ঐ, ঐতগী খল্লুদে নোংমা ফাওবা, অদুনা থৌশাদে, কাউশন্নৈ, ইপোক নুমিৎসু, নুপীগী মপোক নুমীৎসু। ঐ খংঙি, মহাক নুঙাইতে, শাউনিংলি হাইবা। অদুবু পেন্দবদি তৌদে, ৱারৌবদি তৌদে। করিগুম্বা অমা, করিনো অমা ... , অহাওববু ওইরে, পোৎ চৈ অমবু ওইরে... ঐতনা হৈনজদবনী। থৌশাদবনী। মপান থোকপা ঙমদবগা, গাড়ীসু থৌবা ঙমদ্রবনিনা ওনলাইনদা ওইনা ওর্ডার তৌরে, অচা অথক, ঙমোক হৈমোক, অহাও অথুম।
ফরেদা, মহাক্নসু হায়রকলে। নংসু হকচাং ঙমদবনি না, খরা য়াম্না পুরকলো।
ক্রেডিত কার্ড পুথোকই। ওর্ডার তৌই।
নুঙাল্লকপদা থুংলরে, দিং দোং, দিং দোং, দিং দোং, দিং দোং ...
ইচানিপা অতোম্বদুনা কৌরকই, মমা! মমা! ... কাম! কাম ...।
নোংমা। কৈশাম লৈকায়দাগী পুং মাংগং কন্না য়ৈরদুনা ময়াম চীং লোমদা চংখি। মামো তোম্বাগী মচানিপা অহলদো, লোকেশ্বর ..., তা লোকেশ্বর মাংখ্রে হাইয়ে। হল্লকত্রে হাইয়ে। লৌ শুবা চৎখিবনি হায়ব্রা। শিং চন্বা চৎখিবনি হায়ব্রা, ষন ইরোই পুথোকখিবনি হাইব্রা, কাউখ্রে। ঐসু অঙাং ওইরি, খুঙ্গংগী স্কুলদা ক্লাশ অনি অহুমদা তম্লিমানে। নিংশীংবা হাইববু, য়ুমদা হল্লকত্রে, মাংখ্রে, থীবা ফংদ্রে, অসুম হল্লকখিদ্রে।
ঙসিফাওবা অসুম হল্লকখিদে। মরক মরক্তা ঐ মাংখ্রবা তা'লোকেশ্বরবু নিংশীংহল্লি, করিগীনো খংদে। অঙাং ওইরিঙৈদা থৌদোক কয়া থোকখি, নুঙাইবা, হরাওবা, পেন্দবা, অৱাবা। অয়াম্বনা কাওথোকখি। অদুবু তা'লোকেশ্বরনা মাংখিবা ঐ কাওবা ঙমখিদে, মহাক্না য়ুমদা হল্লকতবা ঙসিসু খলহল্লি, মাংখিবরা, নত্রগা চেনখিনরা। ঐ খংদে, তশেংনা খংদে। ঐনা খংবা হায়ববু, নিংশীংবা হায়ববু, মমা অতোম্বীনা য়োকপনি, পোকচবা মমা লৈখিদবদগী। লাইরিক য়াম্না ফৈ। খরা মীঙমদে। কনা কনা গুম্বনসু হায়নৈ, মাগী নুপী অমা য়ানবা লৈরম্মী, মাঙোন্দসু হাইরমদে হাইয়ে, কায়নখ্রে হায়ব্রা করিনো, খংদে, ঐ তশেংনা খংদে। ঐখোয় খুঙ্গংদো খরনি পুমলাং লাংই। নুংতিগী পুং মাংগং তৌনা চীংদোন খুদিংগী থীবা চৎলি, চীংদোন অমদগী চীংদোন অমদা। মোংশোং অমদগী মোংশোং অমদা। পুং মাংগং তৌনা ময়াম চংলি, খুঙ্গংগী নিপা পুম্নমক, শাগৈগী নিপা পুম্নমক, মরী মতাগী নিপা পুম্নমক, মখুৎ মখুৎতা থাং তেন, তা, লাংশোই, মখন মথেনগী খুৎশু খুৎলাই, লাথীগা লাথীগা। পাখং মচা অমা থিবা, মমা অতোম্বী না কপ্পী, ময়াম্না করেম্বি। মপ্বাদুনা কপ্পী, ময়াম্না কোনশনবী। মপাদি, ময়াই চল্লবা অহল অদো, ৱাজৈ, হোৎনজৈ। মায়বা অমমুক কৌরক, অমমুক কৌরক, মাইবীমুক পুরক, অথাপ অথাপ্পদগী সাধু, বাতী চালান তৌবা কাংবু, মাংখ্রবা মী পুথোক্পা ঙম্বা মাইবা, মাইচৌ, অঙম্বা মথং মথং পুরকতুনা য়েংই, তৌজৈ মীয়াম্না হায়বা পুম্নমক। হেলোয়না ফারিবনি হাইয়ে, আ! আ! চীং অমদা হীপ্তুনা লৈরে হাইয়ে হেলোয় অমগা...।
অসুম থীবা ফংদ্রে। ময়ামসু অসুম কাউনখি। হামোমখুলদা লোকেশ্বর কৌবা অমা, নহা অমা, পাখং মচা অমা লৈরম্মী হায়বা কাউনখি। ঐতনা কাউজদবনি। করিগীনো খংদে। কাউবা ঙমদে।
নিংশীংহল্লী মরক মরকতা, ইদোমতা। কনাদসু হংলুদে, নোংমতসু। তশেংবনি, কনাদসু হংলুদে। মাগী মপাবুং মামোদা, মমা অতোম্বী ইনেদুদা, হংলুদে কৈরোয় লৈকায়গী কনাদসু । হংলুদে। ঐ হংলুদে। হংসু হংনিংদে। করিগীনো খংদে। হংনিংলুদে।
-নং হৌগৎলনু। পারী মপা, নং হৌগৎলনু। অসিদা অসুম তৌরো। ঐ হৈদোক্কে। নশাদো শোল্লে। তোয়লেত তা চৎলুরনু।
ঐসু য়ারে। ফরে হায়না, হৌগৎত্রে।
ফমুংদা অসুম ...। হকচাংসে খরা শোন্থরে। ৱারে। অদুবু, নুঙাইজদে। ঙমগনি খল্লি তোয়লেত তান্না চৎপা। ঙমগনিদা। অশোমদা, নাহে নিংলে, ওই! ওই! হায়রগা নুঙাইরে, শ্বোর কন্না হোল্লী, থবেৎ - থবেৎ। চোইরোনসু খরা ঙাংলে, অদুবা ভাব তায়। ৱাখন চোয়দে, অদুবু তুমিন্না লৈবা ঙমদে। চীনদগি হায়দোকখি, অহনশিনা তরামরী, অতোম্বসিনা মাপন। নাইন, নাইন, নাইন, ফোরটিন ফোরটিন, ফোরটিন। আই এম ও কে, ও কে। ও কে। চাবদি অসুম য়াই, চানিংদবা কয়া তৌদে। অদুবু হকচাংদি অসুম শোনথৈ।
তোয়লেত চৎত্রবা য়াদে। কৌদে, কনাবুসু কৌরুদে। ঐ ঙমগনিদা। ঙম্মিদা। তপ্না তপ্না হৌগৎলি। উচিন নাচিন তোয়লেততা ফম্বা ঙম্মী। ৱারে, শ্বোর হোন্বা ৱারে। হকচাংসে নোম্বগা, হৌগৎ কাখৎপগা ৱাই। ঐগী মখোন তাবদা ইচা অহলদুসু, মমাদুসু তোয়লেততা লাকএ। হকচাংসে কোনশিনবী। ইচানিপা অহনদুনা লাপতক্না, মমাসু পোজিটিব। নহান টেষ্ট তৌবদা খংহনলকখি। অদুনা ইনাক্ত। কোনশিনবী। শ্বোর হোন্বা ৱারে, ঙহাক পোত্থাই তোয়লেততা । ফমদুনা লৈথোকই। ৱারে। তপ্না তপ্না কা দা চংশিল্লি। ফমুংদা হিপথৈ। ওহ, ৱারে, ঐ য়াম্না ৱারে। ঙহাক পোত্থারে, ফমুংদা। ইচানিপা অহনদুনা মমাদা হোসপিটাল চৎপনা ফনি হায়বগুম তাখি, ঐসু খঞ্জা মাঞ্জানৈ। ইদোমতদি খনলি, ঙমগনিদা। হোসপিটালদা ইদোমতা লৈনিংখিদে। য়ারিঙৈগী য়ুমদা লৈগে খনবা। য়ারোইদোরি। ৱাবনা অসুম হেঞ্জনলকপা। শ্বোর হোন্বসু ৱারে, ঙম্মকত্রে।
কোল তৌই, 9 1 1, নাইন, ৱান, ৱান ।
তপ্না তপ্না ঐনা হাইরে, শ্বোর হোন্বা ৱারে, নিড এমবুলেন্স। রাইট দি ওয়ে।
-করিমতা চারুনু। থোং পুম্নমক হাংদোকয়ু, থোংনাউ পুম্নমকসু।
ৱারে, শ্বোর হোন্বা ৱারে। মমাসু তৌফম খংদে। ব্যাগ খোমজিল্লি, পোৎচৈ হাপচল্লি। করিসু তৌরোইদা, ঐ না হায়জৈ। অসোমদা ৱারে, শ্বোর হোন্বা ৱারে। ও! ও! শ্বোর ফুল্লে, O O2 O O2 ওক্সিজেন! ওক্সিজেন! এমবুলেন্স লাকখ্রে।
গ্রোক গ্রাক
গ্রোক গ্রাক
গ্রোক গ্রাক
গ্রোক গ্রাক
আহ! আহ! আহ!
আই নিদ ওক্সিজেন, আই নিদ ওক্সিজেন, ওক্সিজেন! ...
অহান্বদা পাইপ মচা, নোট এনাফ, নো! আহ! মোর মোর...
আহ! ও! ও! O O2 O O2 ওক্সিজেন! ওক্সিজেন! আহ!
মথং মথং এমবুলেন্স, হিপথরে, পুথোক পুশিন, নোমথোক নোমশিন, ওই, য়েৎ। ঐ ৱারে। ৱারে।
ভাব তারকপদা হোসপিটাল দা লৈরম্মী।
ইদোমতা।
কা অমদা, ইদোমতা। ফমুং অমদা, ইদোমতা। খুৎতা হিদাক কাপলি, ইদোমতা। নাতোনদা ওক্সিজেনগী পাইপ, ইদোমতা। থবাকতা মখন মথেনগা মেশিনগী মরি মরাংগা, ইদোমতা।
ইদোমতা!
ইদোমতা।
[পাবিয়ু, হাইবিয়ু O O2 O O2 = ও ওটু ওটু ওক্সিজেন ]
কোভিদ অমসুং ঐগী ৱারী - ০৩
নুংশিবা!
নুংশিবগীসু মনম লৈবনি। মচু লৈবনি। অশংবা, অঙাংবা, হিগোক, শালুঙাং। মচু পুম্নমক্কিসু মনম অমমম লৈবনি। ঐখোয়না খংদবনি। হিগোক মচুগী থুমহৎলবা মনমদা ঙাওদবা কনাবু য়াওবগে, শালুঙাং মচুগী নুংশিবদুনি ঐনা কোয়তান তান্নখিবা। নুংশিবগী মচু পুম্নমক ঐনা খঙনিংখী। মচু পুম্নমক্কী মনম খঙনিংখী। করম্বা নুংশিবগী মচু, করম্বা মচুগী মনমনো খ্বায়দগী খোয়থুমনবা। থৱাই থাদোকপদসু পাম্মুদ্রিবা লৈরিবসি করম্বা নুংশিবগী মচুদনো? করম্বা মচুগী নুংশিবনো? করম্বা মচুগী মনমদনো? ঐনা নুংশিবগী মচু পুম্নমক য়েংনিংখি, মচু পুম্নমক্কি মনমসু। পুন্সিগী মচু পুম্নমক য়েংনিংখি, নুংশিবগী মনম পুম্নমক। পুম্নমক।
নুংশিবা!
- ওহ! মিস্টার! ইয়্যু আর লাকি।
- ইয়েস দোক্তর! -- ঐনা হায় ।
-হোয়াই সো লেট? ইটস ওকে নাউ …, ইয়্যু আর ইন আই সি ইউ। ইটস ওকে, কভিদ নিউমুনিয়া, লাঞ্চ, লিভার, ব্লাড ক্লোথ ... ।
করি করিনো হায়রি, লাপতক্না লেপ্তুনা লৈরি। ঐগী ডাক্তর, চহী ময়াই চল্লবা নিপা অমা। ঐ ৱায়, করি হাইরিবা য়াম্না তাশনলুদে। হায়বা পুম্নমক ঙকতমক থুই। ঐ ৱায়, ৱা ঙাংনিংদে। তুমিন্না লৈ। ঐ ৱায়, শাথীনা ৱায়, ৱারী শানিংদে, ৱা ঙাংনিংদে, করিমতা হৈনিংদে, করিমতা য়েংনিংদে ।
নার্সনা হিদাক কাপ্পি, খুদাংদা আই ভি। পাম্বোম অমদগী ঈ লৌরি, পাম্বোম অমদা হিদাক কাপলি। নাতোনদা ওক্সিজেনগী মরী। খুদোম্বীদা ওক্সিমিটার। ইদোমতা। কা অমদা, ইদোমতা। ফমুং অমদা, ইদোমতা। খুৎতা হিদাক কাপলি, ইদোমতা। থবাকতা মখন মথেনগা মেশিনগী মরি মরাংগা, ইদোমতা। ইদোমতা, ঐ'তা।
ইদোমতা নুংশিবগী মনম, পুন্সিগী মচু য়েংলি।
আহ! পুন্সি, আহ! নুংশিবা!
অশংবা, অঙাংবা, হিগোক, শালুঙাং।
ঐখোয়গী থংনবা খুঙ্গংদো মীতৈপাঙলগী খুন অমনি। কোনাগাঁও কৌই, ঐখোয় ময়াম্না। তুরেল মচা অমা লান্থোক্পগা ফংঙি। ঐ নুংতিগী অঙাং ওইরিঙৈদগী চৎলি, য়েরুম লৌবগী, ঙা ফাবগী, শান্নবগী, ঙানু হুরানবগী, হৈনৌ হেকপগী, তেলিভিশন য়েংবগী, পোৎ চৈ লৈবগী, ফৌ তকপগী, নুংথিন পোবোপতা ইচে জাহানারাদগী ফী লৌবগী, তা নিজামদগী শেন পুবগী। মরক মরক্তা ফী য়োনবি ইনে রাবেয়া লাকই। মণিপুরগী ফনেক, ফিদুপ পুদুনা। লাকপা খুদিংগী ঐগী অচাপোৎ পুরকই, ইমা, ইন্দোন, ইনেশিংনা ফী লৈরী, ঐনা ঙমোক । ইনে রাবেয়াগী পাঙল ফনেককী মচুদো হীগোকনি। অঙৌবা অমসুং হীগোক, স্ট্রাইপ। পিকনা লাংবা, মরাংবা। অঙৌবা অমসুং হীগোক। ফনেক। মপান নাইবা। ঐখোয় মীতৈগী ইমা, ইনে,ইচে, ইচনশিংনা শেৎলিবা ফনেক অদুগা মান্নদে। তোঙাল্লি। পাঙনগী ফনেকনি। ফজৈ। ঐঙোন্দা ইনৌ নৌই। কয়াতা ফজখ্রবা। ইনে রাবেয়াগী হীগোক মচুদো। মপান নায়বা ফনেকতো। হীগোক মচুদো।
ইনে রাবেয়া লাকখিদবা কুইরে। মণিপুরগী ফীদুপ পুদুনা লাকত্রে। ফনেক পুদুনা লাকত্রে। ঐগী ঙমোক পুদুনা লাকত্রে। মতমদো ঐ হাইস্কুল চৎলে। ক্লাশ সিক্স। স্কুলদগী হল্লকপদা ময়াম কোনাগাঁওদা কোয়চেন চেন্নরম্মী। ঐসু ময়ামগা চৎকে তৌই। ইমানা ফাজননা থম্মি। অখোয় অঙাং অমতা চৎখিদে। ইনে রাবেয়াগী মচানুপী নুরজাহানদো হু থক্তুনা শিরে হাইয়ে। মচানুপী অমতং পোকচবনি। ইনে রাবেয়াগী পুন্সীদি, নুরজাহাননি। লাকপা খুদিংগী মচানুপীগী ৱারি লিজৈ ঐখোয়দা । লাইরিক ফৈ। ক্লাশতা নম্বার ৱান ওইরিবনি। মেট্রিকতসু ফার্স্ত দিভিজন ফংখিবনি। কলেজ তম্মি। য়াম্না ইং তপ্পি। অতৈ নুপি মচাগা মান্নদে। ঙসিদি অদু তৌই। ঙরাংদি অদু তৌই। নুরজাহাননা অসি হায়। অদু হায়। ইনে রাবেয়ানা শ্বোর হোনবা খুদিংগী নুরজাহানগী মরমদা ৱাহৈ অমমম চোংথোরকই।
- সুইসাইড! হু চাদুনা!
- মাগী নুংশিনবা নিপাদুগা শাওনদুনা...। কনবা ঙমদ্রে হাইয়ে।
- মচীনদগী কোংগোন, পিত্রিক পিত্রিক। সাপোন পিজৈ য়াদে, শন্থী পিজৈ য়াদে, য়াদ্রে। কনবা ঙমদ্রে হাইয়ে।
- শিরে হাইয়ে। নুংশিনবা নিপাদো ইনাক কৈরাক খুনবগী মচানি হাইয়ে, মপাদো অফিসারনি, ইমুংদো খুক্কন পাঙনবনি হাইয়ে।
- করিগী কায়নখিবা খংদে, করিগী শাওনরিবা খংদে, করিগী ...। খংবা হায়ববু নুংশিবগী তমক শিখ্রিবনি হাইয়ে।
সুইসাইড!
ঐনা খংনিংখি, ইচে নুরজাহানগী নুংশীবদো করম্বা মচুগীনো, করম্বা মচুগী করম্বা মনমনো। অদুক ময়াই কল্লিবা। অশংবা, অঙাংবা, হিগোক, শালুঙাং। করম্বা মচুগী নুংশিবা। করম্বা মচুগী মনম।
ঐ ঙসিসু থিরি, ইচে নুরজাহানগী নুংশিবগী মচুদো, করম্বা মচুগী মনম।
ঐ থিরি, ঐ থিরি।
কোভিদ অমসুং ঐগী ৱারী - ০৪
ক্যামেলিয়া, হাইড্রেঞ্জা, লেভেন্দার, রোদাদ্রেনদ্রান মরক মরক্ত সিঙ্গারৈ, লৈহাও অমসুং চীকোংলৈ পাম্বি। ল্যাম্পপোষ্ট অমদগী ল্যাম্পপোষ্ট অমা, পার্ক অমদগী পার্ক অমা। হাইৱে অমদগী হাইৱে অমা। মোন্ত্রিয়লগী লৈরক লৈরক খুদিংদা, কানাদাগী লৈকায় লৈকায়দা, নাকনদা, চিদাইদা, থোঙান্দা, য়েন্নখাদা হাইড্রেঞ্জা, রোদাদ্রেনদ্রান, ক্যামেলিয়া মঙক হাইগৎতুনা শাৎলি, মচু মচুগী, অচৌবা, অপিকপা, ইকাই খঙদঙৈ। তৌববুদি, নখোয়দা করিমতা পেনদবা লৈতেকো ক্যামেলিয়া ইবেম্মা, করিমতা নুঙাইতবা লৈতেকো পুকচেনফবি ইচে হাইড্রেঞ্জা, লম্বেলদা নাইতোম শাৎলিবি রোদাদ্রেনদ্রান, চীংদোন চীংদোনদা শাৎলিবী লেভেন্দার, নখোয়দা ৱারৌবসু লৈজদে, শাউনিংবসু লৈজদে। ইকায়জবগী ৱাতনি। ইদোমতা পুক্নিং নুংশিবগী ৱাতনি। ইদোমতা পেনজদবনি। নখোয়গী ইকায়খংদবদু উরগা ইদোমতা নুঙাইজদবা, নখোয়গী পোংজবদু উরগা ইদোমতা খোইশাউনখিবগী ৱাতনি। ঐনা মাউন্টরোয়েলগী লৈখোং লৈরক পুম্নমক কোয়থি থি-খি, লা-ফোন্তেন পার্ককী মায়কৈ মরীদা কোয়চৎ চৎতুনা য়েংখি, চাওখ্রবা জেরী পার্ককী মায়কৈ অমদগী মায়কৈ অমদা কোয়চেন চেনখি। অহিংদা, নুংথিলদা, নোঙাল্লকপদা, নুংথিন পোবোপতা, ইদোমতা, মরূপ মপাংগা, ইচাশিংগা। নোংজু থাগী নোং মরক্তা, কালেনগী নুংশা মরক্তা, ইংথম থাগী ঊন মরক্তা। সিঙ্গারৈ অমতং, লৈহাও পাম্বী অমতং, চীকোংলৈগী চারা অমতং। টরন্তোগী অকাসিয়া পার্ককি খা-ৱাং, নোংপোক-নোংচুপ কোইথুং থুংনা য়েংলুবনি, সিঙ্গারৈ পাম্বি অমতং । নায়াগ্রা ফোলস তোর্ব্বানগী ফজরবা লৈকোন পুম্নমক চং চংদুনা য়েংজবনি- লৈহাও পাম্বি অনিতং। আ! আ! লাপখ্রবা কালগেরিগী স্তেনলি পার্কতা, রোকি মাউন্টেনদা, মোংশোংদা, লেক মপানদা, নুঙাল্লকপা খুদিংগী চৎতুনা য়েংখি চীকোংলৈ চরোং অমতং শাৎপরা হাইদুনা।
অসুম অসুম চৎখি, বোস্তোন, ফিলাদেলফিয়া, ফ্লোরিদা, লোস এঞ্জেলস মথং মথং ভার্জিনিয়া, ৱাশিংতোন, টেক্সাসকী লৈকোল পুম্নমক। লৈহাও পাম্বি অমতং। পার্ক পুম্নমক । চিকোংলৈ পাম্বি অমতং। মোংশোং পুম্নমক। সিঙ্গারৈ পাম্বী অমতং । চীংদোন। চীং। লেক । কোন্নথংদা ন্যু য়োর্ককি টাইম স্কোয়ার। ফিফ্ট এভেনিউ গী মায়কৈ মরিদা লৈরিবা পার্ক। ব্রোদৱেগী নাকনদা, চিদাই চিদাইদা লৈরিবা পোত্থাফম। বাইরান্ট পার্ক। রিভারসাইত পার্ক। ইশাম পার্ক। ফোরটি সেকেন্দ ষ্ট্রিট। মেদিসোন এভেনিউ। পার্ক এভেনিউ। চুমত্রিং চুম্না। মথং মথং সেকেন্দ এভেনিউ। ফার্স্ট এভেনিউ। য়্যুনাইটেদ নেশন প্লাজা। তপ্না তপ্না চংশল্লি। য়্যুএনগী হেড ক্বাতর। মায়কৈ মরি মক্তা মচু কয়াগী লৈরাং, মখন কয়াগী লৈ পাম্বি, অচৌবা, মচা, অপিকপা। ক্যামেলিয়া, হাইড্রেঞ্জা, লেভেন্দার, রোদাদ্রেনদ্রান । ঙৌরুনরবা। শংবানরবা। ঙঙ্রানরবা। অদুবু কদাই সিঙ্গারৈ, কদাই লৈহাও পাম্বি, কদাই চীকোংলৈগী মশা অমতং। ভিজিটরস বুক। মীয়ামগী ৱাকৎফমগী নোটবুক। ঐগী, মাগী, নংগী অপাম্বা, পেন্দবা, নুঙাইতবা। ইবিরম্মু । হাইবিরমমু। খংহনবিরম্মু। ঙৌশোক ঙৌরবা চেবাংদুদা ঐনা ইজরম্মি- সিঙ্গারৈ পাম্বি অমতং, লৈহাও চরোং অমতং, চীকোংলৈ অনিতং । নখোয়গী লিশিং লিশিং লিশিং লিশিং স্কোয়ার কিলোমিটারগী পাক্ল-চাউরবা-লবুক-লমহাং-মোংশোং মরকসিদা। অমতং। অনিতং। চরোং অমতং। অনিতং। অমতং।
- ফিলিং বেটার?
- ইয়েস।
- হাউ ৱাজ নাইট?
- গুড।
- এনি পেইন?
- নো।
- হেদেক?
- নো।
দাক্তর লাকই। নার্স চঙকলি। দাক্তর লাপ্তকনা লেপ্পি। নার্সনা ইনাক্তা। হিদাক কাপ্পি। ওক্সিজেন পাইপ য়েংলি। ব্লাদ প্রেসার। ব্লাদ টেষ্ট। মরি মরাং থবাকতা। পাম্বোমদা। নাতোনদা। ফম্বা ঙম্লে, ফমুংদা। ফমুংগী কোকথংবা মায়কৈদা ৱাংখৎহল্লি। ৩৫ দিগ্রি, ৪৫ দিগ্রি এঙ্গেল। খরা নুঙাই। ইঞ্জেকশন কাপ্পি। তেবলেত পিরকই । ঙরাং নুমিদাং ফাওবা করিমতা চাবা ঙমদে। তেবলেতসু। ঙসিদি ঙম্মে। লাইট ব্রেকফার্স্ত। সোফ্ট। মহিগুম্বা। য়োগার্ট। স্যুপ। পোদিন। হকচাংদি ৱারি। করিমতা হৈনিংদে। ৱা ঙাংবা ৱারি। ৱাহৈ অমা, অনি। তপ্না তপ্না। থোংনাউগী পর্দা হাইগৎপিরম্মি। শেংলবা নুংশা মঙাল মিৎচিনা য়েংঙক্লি। ফ্লোর নিপান। আই সি ইউ ইউনিট। ইদোমতা। কা অমদা, ইদোমতা। ফমুং অমদা, ইদোমতা। খুৎতা হিদাক কাপলি, ইদোমতা। থবাকতা মখন মথেনগা মেশিনগী মরি মরাংগা, ইদোমতা। ইদোমতা, ঐ তা।
মখাদা হোসপিতালগী কার পার্কিং। মখল মথেলগী কার। অঙৌবা, অঙাংবা, অমুবা, অশংবা, হিগোক, খোয়ারী, ঈমচু, শালুঙাং। হোন্দা, টয়োটা, ফোর্দ, হিয়্যুন্দাই, জিপ, বি এম দব্লিয়ু, নিশান, কাদিলাক, সুবারু, মাজদা ..। লোয়না হেক সুরম্মি। জ্যাক কার্তেয়ি সোরোক। থাপতক্না লম্বিগী সিগনালগী য়ুম্বী। গ্রিন, ইয়েলো, রেদ। মথং মথং, মরি মরি, মখন মথেলগী কার, অচৌবা - মচা, অঙৌবা, অঙাংবা, অমুবা, অশংবা। নিংথমথা লোয়রবসু উপাম্বীশিংগী ঊনা কয়া পান্দ্রি। মখন মথেনগী স্প্রুস পাম্বী , কোলোরাদো স্প্রুস, গ্রীন স্প্রুস কুম্বা নত্তনা অতৈ ঊপাম্বি শিংদি ইকোক কোকই। মশা মরোং খক্তনি। পরেং পরেং ম্যাপল পাম্বি, নোরৱে ম্যাপল, সিলভর ম্যাপল, মাউন্টেন অ্যাস, রেড অ্যাস , লিতল্লিফ লিনদেন, স্কাইলাইন হানি-লোকাস, কোমোন হাকবেরি, থ্রোনি হানি-লোকাস, ঊপাম্বি পুম্নমক ইকোক কোকই, পরেং পরেং, পার্কতা, লম্বেলগী চিদাইদা, সোরোক মপানদা, লৈরক্তা, নাকনদা।
তুমিন-তুমিন, মদোম মদোমতা লেপ্পি।
মদোম মদোমতা, তুমিন তুমিন।
ঊনা ৱানা য়াওদনা। মদোম মদোমতা। তুমিন তুমিন।
তোংলদে উচেক অমত্তা। খোংলদে চেক্লা অমত্তা।
ঊপাম্বিশিংদো লেপ্লি। মদোম মদোমতা।
তুমিন তুমিন।
স্কুলদগী হল্লকপগা, নুংতিগী ষন ইরোই পুদুনা চৎলম্মি, মমাংগী চিংখোংদা, লবুক লমহাংদা। অয়াম্বা মতমদা, ঐনা ঐখোয়গী ইরোই লাবা অমা লৈরম্মী, অদু পুদুনা চৎলম্মি। মথক্তা তোংলগা। ইশৈ শক্ন শক্না। শাজৈ অমগা। ইরোই মথক্তা। ঐখোয় ইমান্নবা ময়াম। শজিক পিজবা। শঙ্গু শঙ্গু। ঐখোয় ময়াম। লৈকায়গী, খুঙ্গংগী ঐখোয় ময়াম, ইয়াম্বা খরসু্ য়াওরম্মি। তাদো, মামো, কাকা লোয়না য়াওরম্মি। ষন, ইরোই পুদুনা, চিংখোংদা, লবুক লমহাংদা, পাৎয়াদা। চিংদোন অমদগী চিংদোন অমা। পাৎ অমদগী পাৎ অমা। লবুক অমদগী লবুক অমা। ইরোই শিংদো থাদোকলগা, ষন শিংদো থাদোকলগা, ঐখোয় মশেনতা শান্নরম্মি। ফুতবোল, দান্দা, কাবাদি -- মখল মথেনগী মশান্না। কনাগুম্বনা ৱারি লিরম্মি, ময়াম্না তারম্মি, অহল অমা অনিসু য়াওরম্মি। ৱারি লিবা ফৈ, মখল মথেনগী। হিংচাবগী, হিংচাবিগী, হেলোয়গী, অঙম্বা নিংথৌশিংগী, নুংশি নুংওনগী, ওইদা পাদবা ৱারী কয়াসু য়াওরম্মি। নোংমনা অমা, ঙসিনা অমা, হয়েংনা অমা। নুমিৎ তাখিবা খংহৌরমদে।
ষন ইরোই থাদোকলগা ঐদি অয়াম্বা ৱারী তাগল্লম্মি। অহনশিংগী। ইমান্নবা শিংগী। মরক মরক্তা শান্নরমলবসু, ফমদুনা লৈথোকলম্মি। অয়াম্বা মতমদা ৱারি তারম্মি। মওং মওংগী ৱারী, অহনগী, নহাগী, হিংচাবগী, হেলোয়গী, নিংথৌশিংগী, যুবরাজ শিংগী, মহারাণীশিংগী। নোংমনা অমা, ঙসিনা অমা, হয়েংনা অমা। ঐখোয়গী ষন ইরোই শেন্বা মরক্তা মণিপুরদগী হল্লকপা তা'খম্বসু য়াওরম্মি। করম্বা মতমদা মণিপুর চৎখিবা খংদে। ঐখোয়না খংলকপদা মণিপুরদা লৈখিরম্মি। ঐখোয় মমাংগী ইপন কেশবকী মচানিপা অহলনি। চহিমুক ফারে মণিপুরদগী হল্লকতুনা লাকপা। করিগীনো খংদে ময়ুমদা হল্লকতুনা লৈরম্মি। অমুক গাড়ী থৌরম্মি -- হেক হায়। কারবার মচা অমা তৌরম্মি -- হেক হায়। চহী তরামুক হেন্না লৈরুবনি। শান্নবা কয়া য়াওরমদে তা'খম্বা। ঐখোয়গা অসুম ফমদুনা ৱারী শাদুনা লৈথোকলম্মি, অয়াম্বা মতমদা। ঙাংবসু ফরম্মি, মরৈ লোনতক লোনতক তৌদুনা। মণিপুরগী ৱারী, ইম্ফালগী ৱারী, বাশীঁখোংগী, নাগামপালগী, থাঙ্গালবজারগী, পাওনাবজারগী, শিংজমৈগী, বাবুপাড়াগী, মোয়রাংগী, অন্দ্রোগী, লিলোংগী, পাঙনতাবিদা অহনশিংগা লৌউ-শিংয়ুবগী ৱারি। মাগী ৱারী লোয়বা নায়রমদে। মরক মরক্তা দিল্লীগী দাকুশিংগী ৱারী। কাপ্নবগী ৱারী, কোম্বীং ওপারেশনগী ৱারী। খোংজোম লানগী ৱারী । কোদোমপোকপীগী ৱারী। ঙরাংনা অমা, ঙসিনা অমা, হয়েংনা অমা। চিংখোংদা, লবুক লমহাংদা, পাৎয়াদা। চিংদোন অমদগী চিংদোন অমা। পাৎ অমদগী পাৎ অমা। লবুক অমদগী লবুক অমা। ৱারী অমদগী ৱারী অমা, মণিপুরগী ৱারী, ইম্ফালগী ৱারী, লৈকায়শিংগী ৱারী।
কলেজ তম্বা ঐ ঢাকা চৎলম্মি। মরক মরক্তা য়ুমদা লাকলম্মি। লাক্পা খুদিংগী ঐ তা'খম্বা উনরম্মি। মাগী ৱারী লোয়রমদে। নোংমনা অমা, হয়েংনা অমা। মরৈ লোনতক লোনতক। কংলাগী ৱারী। অথৌবশিংগী ৱারী, মার্জার এগ্রিমেন্টকী ৱারী। দিল্লীগী দাকু শিংগী ৱারী। মরক মরক্তা গাড়ী থৌবগী ৱারীসু লিরম্মি। হেন্দমেন ওইরিঙৈগী। মণিপুরগী মফম অমদগী মফম অমা, শহর অমদগী শহর অমা। ৱারী লোয়দে। ঐসু নুঙাইরম্মি। মংদা ইম্ফাল চৎলম্মি, মরক মরক্তা কোইচৎ চৎলম্মি মণিপুরদা, ইম্ফালদা I শহর অমদগী শহর অমদা, মফম অমদগী মফম অমদা, বাশীঁখোংদা, ত্রোংলাউবিদা, নাগামপালদা, থাঙ্গালবজারদা, পাওনাবজারদা, শিংজমৈদা, বাবুপাড়াদা, মোয়রাংদা, অন্দ্রোদা, লিলোংদা তা'খম্বাগী গাড়ী তোংদুনা, তা'খম্বনা দ্রাইভর ওইদুনা ঐবু কোয়পু পুবিরম্মি, মণিপুরগী লৈরক লৈকায়দা। ইম্ফালদা I নোংমনা মফম অমদা, নোংমনা লৈকায় অমদা, নোংমনা লৈরক অমদা।
মংফাওনরকপদা ফমুংদা ইদোমতা, থাওমৈ অমা মুশি মুশি, চিক্নবা অহিং, চীংখোংদা লমহুই খোংবগী মখোন তায়। মকু অমসু খোংবগুম তৌই।
ফমুংদা ইদোমতা।
অহিং কয়া।
মং কয়া।
কোভিদ অমসুং ঐগী ৱারী - ০৫
অহল ময়াম অমা, পরেং পরেং, চাওরবা শঙ্গা্য় অদুদা, লাপ্তক্না I মখোয় অহুম মরীদি মশক ফজনা খংঙি ঐনা -- চাওবা, কমল, অঙাংহল, শীতলজীৎ মথং মথং ...।
অসোমদনা মায়কৈ মরিমক্তা বঙ্কিমগী, শরৎচন্দ্রগী 'নায়ক' 'নায়িকা' ময়াম শঙ্গু শঙ্গু, ঐবু কোয়থৎ থৎলি, অমনা খোংদা কোনগনি, অমনা খ্বাংদা হেক কোনগনি, অমনা লেংবানদা হেক ফমগনি। অদুবু ঐ চংশিনবদি লেপ্তে, লাপ্তক্না ফম্লিবা অহলশিংদো য়ৌনবা; ফৈজোম অমমম শেৎলি, হকচাংদা ফুরিৎ অমত্তা য়াওদে। মমায়শিংদো নোংচুপ লোমদা, ঐনা অৱাং লোমদগী I 'নায়ক' 'নায়িকা' শিংদো ইন্থোক ইন্থোক্না, ঐগী `ইচ্ছা'দি মৈতৈ অহলশিংনা ফমলিবদু য়ৌবা। দূর্গেশ নন্দিনীগী আয়েশা, জগৎসিংহ, কদোমদগীনো শ্রীকান্ত, রাজলক্ষী, সতীশ, সাবিত্রী, বড়দিদি'গী মাধবী, চরিত্রহীন'গী কিরণময়ী ঐগী খুৎ পায়দুনা থৎলি, শঙ্গু শঙ্গু, ফিস ফিস ঐগী নাকোংদা, চংখিনু, কান্নরোয়- আ! আ! দা লৈরিবা অহলসিংগী চরিত্র পুম্নমক ঐখোয়গুম্বনি, ঐখোয়গী মমীনি ... ঐখোয়গী ...। ঐ মৱা লৌদে, তাশিন্নদে, নমখায়, খোং খুৎ, ব্রং ব্রং, ফৎ ফৎ ... I
নৱা লৌদে, নৱা লৌদে ... ঐ চংশিনবা লেপ্তে, লেপ্তে, তপ্না তপ্না, মথং মথং, খোংকাপ অমমম, নৱা লৌদে, নৱা লৌদে ...।
অমনমুক ফাজিল্লি, অমনমুক কোনথুই অদুবু ঐ চংশিন্বা লেপ্তে, খোংকাপ অমমম, নৱা লৌদে, নৱা লৌদে ...।
খুরমই খুরু খুদক কুন্না, ইপু, ঐসু লাক্লে, ঐসু লাক্লে, আশির্বাদ তৌবিয়ূ, কোকতা নান্থবি ... ইপু ... ঐগী `ইচ্ছা পুরণ' ...।
- সোরি, লাঞ্চ রেদি ।
মংফাউনরকপদা। নার্স অমা।
ওহ!
- ট্যাগ:
- শৈরেং
0 কমেন্ট:
কমেন্ট তৌবিয়ু