কুকি মিলিটেন্টশিংগী লুৱাংবী লিন্থোইঙম্বী অমসুং হেমনজিৎকী মীহাৎ ‘উই ৱান্ট জাষ্টিস’ হায়দুনা হৌরকখিবা মহৈরোয়শিংদা অতম্ননা টিয়ার গ্যাস, মোক বোমশিং কাপশিনবদা মহৈরোয় কয়া শোকখ্রে
ইম্ফাল, সেপ্টেম্বর ২৬ : ইম্ফালগী তম্ফাস্না গার্লস হায়ার সেকেন্দারি স্কুলদা তম্লম্বী হিজম লুৱাংবী লিন্থোইঙম্বী চনু (১৭) অপোকপা ঐচ কুল্লজিৎ, শগোলবন্দ তেরা তোংব্রম লৈকায় অমসুং তাকয়েলগী কিন্দার গার্দেন মোন্তেশ্বরি স্কুল স্কুলদা তম্লম্বা ফিজম হেমনজিৎ (২০) অপোকপা টি ঐচ ইবুঙোবী, তাকয়েল কোলোম লৈকায়বু শারমচৎ চৎপা কুকি মিলিটেন্টশিংনা মখূৎ চল্লবা মতুংদা তমথীনা ওৎ-নৈরগা হাৎতোকখিবগী ফোটোশিং ঙরাং সোসল মীদিয়াদা ভাইরেল ওইরকপগী পাউ তাবদগী ঙসি নুমিৎয়ুংবা মতুংদগী হৌরদুনা ইম্ফাল অমসুং অকোয়বদা লৈবা হায়ার সেকেন্দারি স্কুলশিংগী নুপামচা অমসুং নুপীমচা মহৈরোয়শিংনা ‘উই ৱান্ট জাষ্টিস’ হায়বা য়াওনা তোঙান তোঙানবা দিমান্দশিং লৈঙাক্তা তাল্লদুনা লম্বীদা থোরকপগা লোয়ননা চীফ মিনিষ্টারগী বঙ্গলো তম্না চঙশিল্লকখিবসু য়াওরকপদগী পুলিস অমসুং আর এ এফনা অতম্না মহৈরোয়শিংদা টিয়ার গ্যাস অমসুং মোক বোম য়াওনা রাবার বুলেটশিং কাপশিনবদগী মহৈরোয় কয়া শোক্তুনা তোঙান তোঙানবা লায়েংশঙশিংদা লায়কন্নখ্রে।
মখোয় অনী জুলাই ৬কী অয়ুক্তগী ময়ূম ময়ূমদগী থোক্নরক্লগা গাড়ী মচা অমদা পূন্না চৎমিন্নখিবদগী মখোয়গী খোঙ্গুল লীরুবদা ফংদনা লৈরকখিবনি। থৌদোক অসিদগী লৈখিদ্রবী লুৱাংবী লিন্থোইঙম্বীগী অপোকপা হিজম কুল্লজিৎনা জুলাই ৮, ২০২৩ দা ইম্ফাল পিএসতা রিপোর্ট তৌখিবনি। রিপোর্ট অদুগী মতুংইন্না পুলিসনা এফ আই আর নম্বর ৫৮৪ (৭) ২০২৩ রেজিষ্টার তৌদুনা কেস লৌখৎখি। অদুম ওইনমক কেস অদু লৌখৎলবসু মসিগী চত্থরকফম থোকপা ইনভেষ্টিগেসন চত্থখিদবদগী অঙাং অনীগী লংলা লংজিন পুথোক্তুনা মখোয় অনীবু ফংবা ঙমখিদে।
অদুম ওইনমক মে ৩দগী হৌরক্রিবা মণিপুরগী তমথীরবা লান অসিগী মনুংদা থোকখিবা থৌদোকশিংগী মতাংদা তোঙান তোঙানবা দিষ্ট্রিক্টশিংগী পুলিস ষ্টেসনশিংনা রেজিস্টর তৌদুনা লৌখৎপা কেস লিশীং ৬ হেনবগী মনুংদগী মরু ওইবা অমসুং অরুবা কেসনি হায়বা খরা সেন্ত্রেল ব্যুরো ওফ ইনভেষ্টিগেসন (সী বি আই) দা খুৎশিন্নবদা অঙাং অনীগা মরী লৈননা ইম্ফাল পি এসনা রেজিস্টর তৌদুনা লৌখৎখিবা কেস অসিসু য়াওখি।
মিনিষ্ট্রি ওফ পার্সোনেল, পাব্লিক গ্রিভান্সেস এন্দ পেন্সন্স (দিপার্টমেন্ট ওফ পার্সনেল এন্দ ট্রেনিং) নিউ দিল্লীগী আন্ডার সেক্রেটারি রাজিবকুমার খারেনা ঝুলাই ২৩ দা থোকখিবা নোটিফিকেসন অমদা মণিপুরদা লৌখৎখিবা কেসশিংগী মনুংদগী অখন্নবা কেস ২০ সিবিআই না ইনভেষ্টিগেসন চত্থরগনি হায়না লাউথোকখি। কেস ২০ অসিগী মনুংদা লৈখিদ্রবা মহৈরোয় অঙাং অনীগা মরী লৈনবা কেস অসি সিএল নম্বর ১ দা য়াওখি। অদুম ওইনমক সী বি আইগী মায়কৈদগীসু মখোয়না ইনভেষ্টিগেসন চত্থনবগীদমক লৌশিল্লম্বা কেসশিং অসিগী মনুংদা ইহান হানবদা য়াওরিবা অঙাং অনীগা মরী লৈনবা কেস অসিগী ইনভেষ্টিগেসন নীংথিজনা চত্থরক্তবদগী মখোয় অনীগী লংলা লংজিন ঙরাং নুংথিল ফাওবদা খঙবা ঙমদনা লৈরকখিবনি।
অঙাং অনীগী মতাংদা লৌখৎখিবা কেসকী ওইরিবা ফীভম অসিগা মরী লৈননা ঙসি লৈখিদ্রবী লুৱাংবী লিন্থোইঙম্বীগী অপোকপা ঐচ কুল্লজিৎকী ময়াম্বা অমগা পাউচে অসিগা শানখিবা ৱারীদা পুলিস অমসুং সী বি আইনা কেস অসিগী মতাংদা চত্থখিবা ইনভেষ্টিগেসন কদাই য়ৌরবগে হংখিবদা মহাক্না হায়, পুলিসকী মায়কৈদগী অঙাং অনীগী খোঙ্গুল লীবদা লোক্তা পুলিস ষ্টেসনগী ও সী ফাওবা য়াওনা কোম কৈরাপ ফাওবদি চৎমিন্নরুরে। অদুবু মদুগী ৱাংমদা চঙশিনবা ঙমদবদগী মখা তাবা মরী মখোঙ খঙদনা হল্লকখি। সী পি আইগী মায়কৈদগীনা অঙাংগী অপোকপা অপোকপী কৌদুনা ৱারী শাখ্রে। মহাক মশামকসু সী বি আইগী ওফিসেলশিংগা ৱারী শানবা লৈখ্রে। অদুবু ঙরাং অঙাং অনীগী ফোটোশিং ভাইরে ওইরক্ত্রিঙৈগী মমাঙ ফাওবদা মখোয় অনীগী মতাংদা তং তাবা অমা খঙদনা লৈরকখিবনি হায়রিকখি।
অমরোমদা, মখোয় অনীবু কুকি মিলিটেন্টশিংনা হাৎপনি হায়বগী থৱায় য়াওদ্রবা হকচাং অনীগী ফোটোনচিংবা সোসল মীদিয়াদা থাগৎনরকপদগী খোইশাওনরবা মহৈরোয়শিংনা পেন্দবা ফোঙদোক্তুনু মখোয় মখোয়গী স্কুলশিংদগী থোক্নরক্তুনা হিউমেন চেইন শেম্বা, রেল্লি চৎপা য়াওনা চীফ মিনিষ্টারগী বাঙ্গলো তম্না থোমজিল্লকপদা পুলিস অমসুং আর এ এফকী মায়কৈদগী মথৌনা পূদোক্তুনা নুপীমচা অমসুং নুপামচা মহৈরোয়শিংদা কন্থি থোক্না টিয়ার গ্যাস অমসুং মোক বোমদগী হেন্দোরক্তুনা রাবার বুলেটনচিংবা কাপ্তুনা তনখায়রগা কন্ট্রোল তৌখি।
0 কমেন্ট:
কমেন্ট তৌবিয়ু