ওজাশিংবু খুরুমজবগী থৌরম পাঙথোকখ্রে
ইম্ফাল, অক্টোবর ৯ : সগোলবন্দ খম্নাম বাজারদা লৈবা মডেল হায়ার সেকেন্ডারি স্কুলদা ঙসি মডেল হায় স্কুল মেট্রেক বেটচ ১৯৭৬ না শীন্দুনা ওজাশিংবু খুরুমজবগী থৌরম অমা পাঙথোকখ্রে। ঙসিদগী চহী ৪৬ কী মমাঙদা স্কুল অসিদগী ১৯৭৬ তা মেট্রিক পরিক্ষা থাখিবা মহৈরোয়শিংনা পুনশিন্নদুনা মতমদুদা মহৈ তম্বীরকখিবা ওজাশিংগী মফমদা অচম্বা খুদোলপোৎ কয়া পীবগা লোয়ননা মেমেন্টো অমমমসু পীখি। লোয়ননা লৈখিদ্রবা ওজাশিংগী মফমদসু ইকায়খুম্নবা উৎপা ওইনা অৱাবা ফোঙদোকখি।
থৌরম অসিগী মতাংদা অশিন অরাং তৌরিবশিংগী কনভেনর সরতচান্দ থিয়ামনা হায়, পুন্সিদা খ্বাইদগী মরু ওইবসি ওজা গুরু মশক খঙবনি। ওজাশিংগা মহৈরোয়শিংগা লৈনরিবা নুংশি মরি অসিনা অসুক্কী মতিক চেৎলমখি। লমদম অসিদা শান্তি লাক্কনি। ওজা গুরু মশক খঙলক্তবা মতমদা পামদবা থৌদোক কয়া থোরক্কনি। মরম অসিনা ওজাগা মহৈরোয়শিংগা য়াম্না নুংশিননা হিংমিন্নবা অমা মথৌ তারে। ওজাগা মহৈরোয়শিংগা লৈনরিবা নুংশি মরী অসিদি সনানা লুপানা লৈবসু য়ারোই। মসিদি থম্মোয়গী ওইবা অচেৎপা মরীনি। অসিগুম্বা মরী অসি হৌজিকসু লৈরি হায়বদু উৎননবা ঙসিগী থৌরম অসি শিনবনি।
ঙসিগী থৌরম অসিদা শরুক য়াখিবা মশাগী চহী ৮৬ হেল্লবা মতমদুদা ওজা অমা ওইখিবা পোৎশংবম মঙ্গিনা হায়, ঐখোয়না মতম শাংনা ওজা অমা ওইনা মহৈরোয় কয়া পুথোক্তুনা লাকখিবা খোঙচৎসিদা ঙসিমুক নুংঙাইবা নুমিৎ অমা লৈখিদ্রি। ঐখৈায়বু নৌহৌননা চহী ৪৬ কী মতুংদা অমুক উনবা ফংবসি য়াম্না নুংঙাই। মসিগুম্বা থৌরম অসি য়াম্না তমজনিংঙাইনি হায়নসু খল্লি।
তোঙান তোঙানবা শিনফমদা মরুওইবা থৌদাং কয়া লৌরম্বগা লোয়ননা হৌজিক্তি থবক্তগী পোত্থারবশিং অমদি দালমিয়া ভারত গ্রুপ নিউ দিল্লীগী সিনিয়র এগজিক্যুটিব ডাইরেক্তর ওইরম্বা তিঐচ ব্রজকুমার অমসুং হৌজিক হৌজিক মণিপুর ষ্টেট ভেটরিনারি কাউন্সিলগী রেজিষ্ট্রার ওইরিবা ডা: পি খম্বা, থম্বাল মরিক কলেজগী প্রিন্সিপাল ওইরিবা কেঐচ মোহোন, বীরমঙ্গল কলেজদা এসিষ্টেন্ট প্রোফেসার ওইরিবা ৱাই দেবেন্দ্রোনচিংবসু মখোয়না থেংনরকপা স্কুলগী এক্সপরিয়েন্স অদু পাউদমখি।
থৌরমগী অরোইবদা ওজাশিংগা পুন্না চাক্লেন অমসুং চামিন্নখি। ঙসিগী থৌরম অসিদা স্কুল অসিগী হৌজিক হৌজিক প্রিন্সিপাল ওইরিবা পি নিপেন্দ্রো অমসুং অতৈ ওজাশিংসু শরুক য়াখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু