এডভাইজরী কমিটি অব মণিপুরী ল্যাঙ্গুয়েজকী মীফম মণিপুর লৈঙাক্কা তান্নরগা ত্রিপুরাদা মীতৈ ময়েক
আগরতলা, নভেম্বর ২ : ত্রিপুরা সরকারগী শিক্ষা দপ্তর মখাদা লৈবা ডিরেক্টরেট অব ককবরক এ্যন্ড আদার মাইনোরিটি ল্যাঙ্গুয়েজনা হন্দক্তা নৌনা শেম্বা মণিপুরী ল্যাঙ্গুয়েজ ডেভেলপমেন্ট এডভাইসরি কমিটিগী অহানবা মীটিংদা ত্রিপুরাদা প্রাইমারী থাক্তা মীতৈ ময়েক চৎনহনবগী মতাংদা নৈনখ্রে।
চৎখিবা অক্টোবর ৩১, অফিস লেন শিক্ষা ভবনদা কমিটি অসিগী মেম্বার সেক্রেটারী ডেপুটি ডিরেক্ট সব্যসাচী সিং, কমিটিগী ভাইস চেয়ারম্যান টিএইচ নীলকুমার, অতৈ অফিসিয়েলশিং য়াওনা মিটিং অদু হৌবগী মমাংদা কমিটি মেম্বার অইবা এন দিলীপ কুমারনা লৈখিদবগী মিনিট অমা তুমিন্না লেপ্তুনা অৱাবা ফোঙদোকখিখি। মথংদা মীফম অদুদা মরু ওইনা ত্রিপুরাদা মণিপুরী তম্বী তাকপীরি হায়রিবা স্কুলশিংদা মণিপুরী নোইং ওজা লৈতবগী অৱাবসি মতৌ করম্না কোক্কদগে অমসুং মীতৈ ময়েক করম্না চৎনহনবা য়াগদবগে অসি নচিংবা হীরমদা নৈনখি। ক্লাস ৱান-টু দগী মৈতৈ ময়েক তম্বীবা, আগস্ট ২০ ‘ল্যাঙ্গুয়েজ ডে’ পাঙথোকপা হায়বা ৱাফম পল্লদুনা এল বীরমঙ্গলনা ৱা ঙাংখি। প্রাইমারীদগী মৈতৈ স্ক্রীপ্ট হৌগৎপগী ৱাফম কেএইচ জীতেন্দ্রজিৎনা পনখি।
স্কুল অথোরিটিশিংনা থম্মোয় শেংনা হোৎনরবদি লোল অসি ফজনা তম্বা য়াই হায়না কে অতুলনা হায়খি। টি যোগেন্দ্রনা চাদা ৫০ মণিপুরী তম্বী তাকপীরিব্রা য়েংবগী মথৌনি হায়খি। এম মৃনালনা ওজা লৈতবগী অৱাবা থুনা কোকহনবগী দরকারনি হায়খি। আরকে তরুনজিৎনা স্কুল খরা ভিজিট তৌরুবদা মণিপুরী লোল তম্মী হায়বসি স্কুল অমগী হেড মাস্টার ফাওবা খঙলমদে, লোল অসি তশেংনা তম্বীরিব্রা তম্বীদবরা হায়বসিদা খঙদোক্নবা মনিটোরিং কমিটি অমা শেম্বগী দরকারনি হায়খি। প্রাইমারী থাক্তা লোল অসি হৌদোকখিবা ঐতিহাসিক ওইবা এপ্রিল ১৩ শীংথারবা নুমিৎ অসি ওবজার্ভ তৌবগী প্রস্তাব থমখি।
এন বিভাসনা ফাউন্ডেশন চেৎতবা য়াদে হায়খি। য়াম্না ৱানা তাল্লগা মণিপুরী লোল তম্বীবা হৌগৎখিবা নুমিৎ স্কুল স্কুলদা ওবজার্ব তৌহনবগা লোয়ননা মীতৈ ময়েক তম্বগী ৱাফমদা মণিপুর লৈঙাক্কী মতেং লৌবগী ৱাফমসু পনখি। ৱাংখেম বীরমঙ্গলনা ইং ২০০৭ দা ফার্ষ্ট ল্যাঙ্গুয়েজ ওইনা মণিপুরী লোল করম করম্বা স্কুলদা আপার ক্লাশতা তম্বা হৌগনি হায়বসি ময়েক শেংনা ময়াম্দা খংহনফম থোকই হায়খি। নুরুল হকনা মনিটোরিং কমিটি অমা লৈফম থোকই হায়খি।
এল কুমারনা মণিপুরী ডিপ্লোমা কোর্স তম্বগী মতাংদা ইউনিভার্সিটিগা তান্নবগী ৱাফম পনখি। শ্রীমতি নিরুপমা সিংহনা ওজা লৈতবগী অৱাবগী ৱাফম পনখি। এন প্রফুল্ল বিজয়না মণিপুরী নোইং ওজা লৈত্রদি লোকেলগী মীনা তম্বী তাকপীবা য়াব্রা হায়বসি খন্নবা য়াই হায়খি। মীফম অদুদা কমিটিগী মেম্বার ৱাই অঙ্কুরসু শরুক য়াখি। মীফম অদুগী অরোইবদা টেক্সবুক অমসুং ম্যাগাজিনগী তোঙান তোঙানবা কমিটি অনী শেমখি। লাক্লিবা নভেম্বর তাং ১৫ দা সাব কমিটি অনীগী মিটিং তৌগনি হায়রি।
সোর্স: মরূপ
0 কমেন্ট:
কমেন্ট তৌবিয়ু