• 582
• ৩০শে নভেম্বর ২০২২ ইং
• Share on:

ইন্টারনেশনেল শুমাং লীলা ফেষ্টিবেল-২০২২ লোইশিনখ্রে

ইম্ফাল, নভেম্বর ২৯ : থা অসিগী ২১দগী চত্থরক্লিবা ১১শুবা মণিপুর সঙাই ফেষ্টিবেল ২০২২ গী শরুক অমা ওইনা কোনুং লম্পাক্কী থোকচোম ইবোয়াইমা শুমাং লীলা শঙলেন্দা নুমিৎ ৮নি চত্থরকখিবা ইন্টারনেশনেল শুমাং লীলা ফেষ্টিবেল-২০২২ লোইশিনখ্রে। লোইশিনবগী থৌরমদা ফেষ্টিবেল অসিদা শরুক য়াখিবা নুপী অমসুং নুপা কাঙলূপকী শুমাং লীলা কাঙলূপ ১৫গী আর্টিষ্টশিংদা শকখঙ চেশিং মণিপুর ষ্টেট শুমাং লীলা কাউন্সিলগী এদভাইজর কে রঞ্জিৎ এম এল এনা য়েন্থোকখি অদুগা ঙসি লোইশনবা নুমিৎতা সঙাই আর্টিষ্ট এসোসিয়েসনগী ‘লাক্লরোই অমুক য়েনিংথা’ উৎখি।

থৌরমগী অথোইবা মীথুংলেন ওইখিবা পদ্মশ্রী ৱারেপ্পা নবনা ফোঙদোকখিবদা খুন্নাই অমগী লোল অমসুং ফিজেৎ য়াওনা খুন্নাই অদুগী শা-ঙাগী ওইবা লমদসু ফজবা মশকশিং লৈনবা ঙাক্তনি। মণিপুরগী ‘সঙাই’ গী ফজবা অসিসু মালেমদা লৈত্রবা মণিপুর খক্তগী ওইবা ফজবা শা অমনি। শা অসিবু মালেমগী মীয়ামদা হেন্না মশক খঙহন্নবগী পান্দমদা সঙাই ফেষ্টিবেল পাঙথোরক্লিবনি হায়খি।

অমরোমদনা মণিপুরগী শুমাং লীলা হায়বসিসু মসিগী আর্ট ফোর্ম মখল অসি মালেমদা অনী শুদ্রবা আর্ট ফোর্ম অমনি। হন্দক্কী ফেষ্টিবেল অসিগী মনুং চন্না চীফ মিনিষ্টারগী লুচিং মখাদা শুমাং লীলাশিং উৎপা ফংহনবীবগীদমক্তা নুঙাইবা পোকই হায়খি। শুমাং লীলানা নুংদা পীরিবা ৱাহন্থোকশিংগী মনুংদা অয়েংবশিংবু নুংঙাইহনবা হোৎনবনি। ৱারবা, চোকথরবা অমসুং পল্লেপফম খঙদ্রবা মীওইববু ঙাইহাক্তং পোত্থাহল্লিবা শুমাং লীলানি। মসিগী মশক অসি শেমগৎলকপদা ষ্টেট অসিগী কালচারেল হেরিটেজনা পীরকপা খুদোলশিংসু য়াওরি হায়খি।

লোইশিনবগী থৌরমদা অখন্নবা মীথুং ওইখিবা আর্ট এন্দ কালচার লোয়শঙগী দেপ্যুটি দিরেক্টর জি ধর্মদাসনা ফোঙদোকখিবদা শুমাং লীলাগী ফেষ্টিবেল অসিদি মণিপুর ষ্টেট কলা একাদেমিনা শীনবনি অদুগা কাউন্সিলনা শীনবা অমগা থারগা সঙাই ফেষ্টিবেলগীদমক পাঙথোক্লিবা অসিগা অহুম খক্তনি। অদুবু মধ্য প্রদেশকী চীফ মিনিষ্টার লাকপদা মখোয়গী ষ্টেট অদুগী জগোয় অমসুং কালচারগী দিরেক্টর বান্দা জ্যেনসু য়াওরকখি। মহাক্না মণিপুরগী শুমাং লীলা য়েংলবা মতুংদা তোঙানবা ষ্টেজগী পার্ফোর্মেন্স অমা ফংলে হায়রি।

মধ্য প্রদেশতসু অসিগুম্বা তোঙানবা ষ্টেজগী পার্ফোমের্ন্স অমা পুথোক্নবা হোৎননীংবগী ৱাখল পোকখ্রে হায়রি। শুমাং লীলা অসি ট্যুরিষ্টশিংনা লাক্লগা য়েংনবগীদমক খরা তেনবা মওংদা উৎপা য়াননবা হোৎনবীরবদি য়েংবা ফংনবগী খুদোংচাবা লৈগনি। মরমদি শুমাং লীলা হায়বসি মীয়াম্না পাম্নবা মরম্না টিকেট কক্লগা য়েংবদা শেল পাম্মুদবা লীলানি। অতোপ্পা পার্ফোর্মেন্সশিংদি লেম্না য়েংবী হায়বদা য়াদবা মীয়ামসু য়াওরিবনি। মরম অসিনা নেসনেলগী থাক্তসু মণিপুরগী লৈরিবা সিনিয়র লিলারোয়শিং পুথোকপা চঙই হায়খি। ঙসিগী ইন্টারনেশনেল মণিপুর শুমাং লীলা ফেষ্টিবেল লোইশিনবগী থৌরমদা মণিপুর স্টেট শুমাং লীলা কাউন্সিলগী প্রেসিদেন্ট এম পুর্ণিমাসি লৈমনা ময়ায় তাংবল লৌখি।

সোর্স: হুইয়েন লানপাউ