• 842
• ১৭ই এপ্রিল ২০২২ ইং
• Share on:

আর.এ. মৈনাম গী শৈরেং অহুম

 য়াউশং থাবল

লাকলে লাকলে হো য়াউশং থা,

শবি শনৌশিংগী থম্মোয়

ইরাং হৌনা থা,

য়ৌরকলে ঙশিশু লমতাগী পুর্ণিমা

করম্নবু কাওশিগে য়াউশং থাবল্।

পুর্ণিমা থাজনা য়ৌরক্লবদা

মীংমাননবি ঐগি পুর্ণিমা

করম্নবু নিংশিংলোয়,

ঐগি থৱায় ওইবি নংবু।

পলেম্ ইমানা নাকতা ফম্,

পন্থৌ ইপাসু অহিং মিশেল্ খাংদুনা,

পরিক্ষাগী লাইরিকপু পারিঙৈ,

বেন-বজাই, ধোনগী খোন্জেলক্তা

থৱায় য়াওনা পারম্বা "য়াউশং কাংহৌ"

ফাওরকখি খংহৌদে থবলগী ইনোৎ,

নিঙশিংলক্ই ঐগী পুর্ণিমাগী প্রোগাম্।

ৱাদনা ৱাবা শাদুনা,

তুমনিংবগী মায়থোং উৎতুনা

পলেম্ ইমাদগী অয়াবা লৌ,

ফমুং ঙনতা চংদুনা,

পলেম-পন্থৌ তুম্বা ঙাই,

থোংগী পোরোল্ লোৎনা হাং,

খঙহৌদে থাবল্ মফম্ য়ৌখিবা

য়েংলুই ইমিৎশিনা নুংশি মাতবু,

উরকখি খঙহৌদনা, খুৎকা-খুৎকা খুজেং পলোয়না,

য়াউশং থাবল্ চোংলম্বা,

চংশিল্লুই খুজেং পাইগে খন্না,

পায়বা ফংদা - নিংবা কায়না মচি অমদা,

অমুকতং থোকলকপা ঙাইজখি,

খনবিগদবা মহাক্না খনবিদ্রবদা,

ধোনগী খোন্জেলক্তা,

থম্মোয় কায়না হল্লকখি,

ইয়ুম্ মাইগৈ পাংলকখি,

মসিবু কৌব্রা য়াউশং থাবল্

খনজখি ইদোম্ তুমিন।

ইনুং শোরা তৈরকপা

ক্বাক্কি লানবাউ চেল্লকপা,

ঐগী পুর্ণিমানা কৌরকলিবোয় খললুই,

অশী পাউজেল্ ওইরম্লে।

পুন্সি বিদায় পিরমদা

হল্লকলরোইদবা খোংচৎতা,

ওহ! ঐগী পুর্ণিমাদি চৎখ্রেদো

থম্মোয় খুদুম শূহৌই,

ওন্না থোয়না খাংহৌই,

থম্মোয় মচেৎ তাহৌই,

করম্নবু কাওশিগে

য়াউশং থাবলনা লাকপশিদা

য়াউশং থাবলনা লাকপশিদা।

মসিবু ঐতগী ইরাল্লা

খাংবা তমলোরা পুন্সিশিমগী

নোংমতা উহৌদবদা উইশিল্লু য়াদ্রবা ইমিৎশে ।

ফম্লরবদা নহাক্না ইনাক্তা

ৱাদি অমতা ঙাংদা

নোকমি -নোকমি তৌবি মায়থোংদু

য়েংজবতনা ইথৌদাংনি মিৎচীশিনা।

ফোংদোকপদি ঙমদে চিনবানশিনা,

থম্মোয়গী অনিংবা অপাম্বদু,

নিঙাইতনি তৌজবা লোৎনা থুপ্না।

থেমজিনজবদি ঙমদা নিঙাইসে,

নোংমতং উহৌদবদা উইশিল্লু য়াদ্রবা ইমিৎশে

খাংবা তমলোরা পুন্সিশিমগী।

লোৎকে খন্না লোৎলব্রা,

থম্মোয় কনবি অমগুম্,

নিংথমগী উলেনগী গুলাপকুম্

চৈনা ফাওদা শাদুনা

অখাং কনবি অমগুম্,

করিগী অদুক্ খোইরাংহনবনো

শজিবুগী লৈহাউ লৈরেনগুম্।

চৈরোদনা নচিনদু পেন্-নবা

নথমোয় শেংনা নূংশিদ্রবদি

অদুসু মঙমদে নহাক্না।

উরে খোয়শাওনৈ, উদ্রবসু অদুমঙাই,

ঐগি থম্মোয়গী নিঙাইশে

থেমজিন্নবা হোৎনবদা,

শৈরেং ওইনা শৈথাবা নত্তনা,

করিবু অমুক্ তৌগনি

খংবিগদবা নহাক্না খংবিদ্রবদা।

তুমদবা মী হৌদোকপা লুবগুম্,

মিকপ্ থোরক্লবা করীগুম্বদা,

উগনি শোয়দনা অশেংবা

থম্মোয়গী মমিদো মায়থোংদা।

উরি ঐনা নংগী মায়থোংগী মমিদি,

চিনবান্ থোক্না হায়ঙমদ্রবশু

মদুদনি ঐনা ঙাওরিবশু,

মদুদনি ঐনা ফোংদোকপা ঙমদ্রিবশু,

ওইখ্রে থম্মোয় অনীদি লিপুন অমতা,

চিনবান্দী য়ৌঙমদ্রে মসিবু করি মতৌনো,

ঐবু খাংবা তমলোরা পুন্সিশিমগী,

আহিং কয়ানী মিশেল খাঙখিবা

নিংথিরবি নংগী শক্তমদো য়েংনবা

খাংলিবনি অহিং কয়াসু নংগিদমক্

খংলোয় নংদি ফাইরেন থাগি

অঙাওবা লৈচিনগূম

মশিবু ঐতগী ইরাল্লা?

নুংশি নঙগী মুর্তি

লিরম্লরোয় হৌখ্রবা পুন্সি ৱারীশে

লোৎতুনা পুখ্রগে থম্মোয়নুংদা

ফোংলম্লরোয় চিনবানসিনা কনাদসু

মৈরিথোক্তা চাক্লবা থম্মোয়শে

ৱাইমৈগুম্ চাক্লাসনু মদোম্ তুমিন্

খাংলগে ঐদি মিৎলু পিরাং শিন্থনা

ওইরক্লবসু ইপান্থাগি ঈচেলগুম্

তাওথাখ্রসনু পুন্সি ৱারীশে

ফোংলম্লারোয় কনাদসু মা- ঐগি ৱারীশে

য়েংহৌরশনু ঙাওচৎনরবা ঐগি ইতৌশে

মন্জুনরবা ফিজোলনা লৈতেংলবা

চোকথরবা হকচাং পোলাংশে

নোকহৌরশনু ইতৌশে উরগা

ঐগি পুন্সিগী খোংচৎতা

মাগী থম্মোয়দুনা পেন্-ননবা

খঙলকপা মিকুপ্তা ঐগী থম্মোয় মশক্

শিন্থরক্কনু নুংশি হৈত্রবা নংগী পীরাং

কপলক্কনু নথম্মোয় শোক্না

ওইরক্কনু লৈনাগুম্ থোৎলা থম্মোয়

মাংখ্রাবশু ঐগী হকচাং পোলাংনা

অঙৌবা লশিং মফোলগুম্

ওইখ্রশনু নিংথমগী উলেন্না কংখ্রবা গুলাপকুম্

ওইখ্রসনু ঐগি পুন্সি মরভুমিগী লৈঙোইগুম্

মীমান্নদা মপোক্ ওইরুবনা ফংজহৌরসনু চৈফম্ লৈত্রবা চৈনাশে

ইরালনি খন্না লেপহৌরগে পুন্সিসিমগী

নুংশি নঙগী মুর্তিশে য়েংদুনা।।