২৭ শুবা নিংতম কাং টুর্নামেন্ট ২০২৪ উজাও লাইরেম্বী কাংখূৎ কোনাগাঁওনা উইন্নার ওইখ্রে
ইম্ফাল, ফেব্রুয়ারি ২৫ : থা অসিগী ২১দগী হৌরগা বাংলাদেশ মণিপুরী কাং ফেদারেসন, বাংলাদেশনা শীন্দুনা বাংলাদেশকী মৌলভিবাজারগী কমলগঞ্জতা লৈবা নয়াপত্তন কাংশঙদা নুপাগী ৪, নুপীগী ৩ পূন্না কাঙখূৎ ৭না শান্নরিবা নোকআউট কাং নিংতম কাং টুর্নামেন্ট ২০২৪ গী ঙসি শান্নখিবা ফাইনেল মেটচতা উজাও লাইরেম্বী কাংখূৎ কোনাগাঁওনা নিত্যানন্দ কাংখূৎ মঙ্গলপুরবু পাঞ্জল৯-৬ তা মায়থীবা পীরম্লগা টুর্নামেন্ট অসিগী উইনার ওইবা ঙমখ্রে।
ঙসি অয়ূক পুং ১১ তাবদগী হৌরগা ইমা পান্থোইবীদা শান্নরোয়শিংনা অথেনপোৎ কাদুনা খুরুম্লবা মতুং উজাও লাইরেম্বী কাংখূৎ কোনাগাঁও অমদি নিত্যানন্দ কাংখূৎ মঙ্গলপুর অনীগী মরক্তা কাং শান্নবা হৌখি। উজাও লাইরেম্বী কাংখূৎ কোনাগাঁওনা টোস ঙমদুনা কাং কাপ্পা হৌখি। অদুগা নিত্যানন্দ কাংখূৎ মঙ্গলপুরনা মায়কৈ কনখি। কাংখূৎ অনীনা অকনবা মওংদা লম্বা তৌনখি। হাফ মমাংদা কাংখূৎ অনীমক্না পাঞ্জল ৪-৪ দা মান্ননা লৈখি। মতুং অপীবা মতমদা উজাও লাইরেম্বী কাংখূৎ কোনাগাঁওনা মখা তানা পাঞ্জল ৫ অদুগা নিত্যানন্দ কাংখূৎ মঙ্গলপুরনা পাঞ্জল ২ ফংদুনা নাকল অনীগী মরক্তা শান্নখিবা মেটচ অদু উজাও লাইরেম্বী কাংখূৎনা পাঞ্জল ৯-৬ তা থোইদুনা টুর্নামেন্ট অসিগী উইন্নার ওইখিবনি। অদুগা নিত্যানন্দ কাংখূৎ মঙ্গলপুরনা রান্নার্স আপ তাখিবনি।
ঙসি শান্নখিবা মেটচ অদুগী জজনা এম অশোক কুমারনা ওইখি। অদুগা টাইম কীপরনা টি ঐচ রুপচান্দনা ওইখি। টুর্নামেন্ট অসিগী ঙসি শান্নখিবা ফাইনেল মেটচকী মেন ওফ দি মেটচনা উজাও লাইরেম্বী কাংখূৎকী সলাম প্রদিপনা তাখি। অদুগা নিত্যানন্দ কাংখূৎকী কাংলোয় কে ঐচ সুধিরনা মেটচ ওফ সেরিজকী টাইটেল লৌখি।
ঙসি পাঙথোকখিবা ফাইনেল মেটচ অমদি লোইশিনবগী থৌরমদা বাংলাদেশ কাং ফেদরেসনগী প্রেসিদেন্ট এল সিমোননা অথোইবা মীথুংলেন, মণিপুরী কালচারেল কমপ্লেক্সকী কনভিনর লাঙ্গোলজম জয়ন্তকুমার, বাংলাদেশ কাং ফেদারেসনগী হান্নগী প্রেসিদেন্ট বিরলা এলিয়েল অরুন নোগোর হুমরজান, বাংলাদেশ কাংগী হান্নগী প্রেসিদেন্ট কে মুনিন্দ্রো অমসুং নয়াপত্তনগী অহল ওজ প্রহ্লাদনা অখন্নবা লেংবীরকপশিং ওইনা শরুক য়াখি। ঙসিগী উইন্নার অমসুং রান্নার্স অপতা শেলগী মনা ওইনা মথংশিৎনা লুপা লিশিং ১০ অমসুং লিশিং ৭ খূৎশিন্নখি।
সোর্স: হুয়েন লানপাউ
0 কমেন্ট:
কমেন্ট তৌবিয়ু