য়ুনিয়ন ত্রাইবেল এফিয়ার্স মিনিস্তরনা লিসিপ্রিয়া কাঙুজমবু ইকায়খূম্নবা ঊৎখ্রে
ইম্ফাল, জানুয়ারি ১৩ : নিউ দিল্লিদা য়ুনিয়ন ত্রাইবেল এফেয়ার্স মিনিস্তর জুএল ওরামনা লিসিপ্রিয়া কাঙুজমনা মালেমগী অমদি ইন্দিয়াগী লৌরিবা থৌদাং অসিবু শকখঙবা ওইনা নেসনেল য়ুথ দে এৱার্দ ২০২৫ পীদুনা ইকায়খূম্নবা ঊৎখ্রে। লিসিপ্রিয়ানা অঙাং ওইরবসু মৈতৈ নুপী অমগী থৌনাগা লোয়ননা মণিপুরদা তংদু-লৈতাবা, ঈং-তপ্পা ফীবমদা হঞ্জিল্লক্লবা হোৎনরিবা থৌদাং অসি অপেনবা পোকই হায়না মিনিস্তরনা ফোঙদোকখ্রে।
লিসিপ্রিয়ানসু য়ুনিয়ন ত্রাইবেল এফিয়ার্স মিনিস্তরদা মৈতৈবু এস তি লিস্ততা চলহন্দুনা থোক্লিবা লান অসি থুনা লোইশিন্নবা হোৎনবীয়ূ হায়জখি অমদি মিনিস্তরনসু অঙম্বা থাক্তা হোৎনগে হায়দুনা লিসিপ্রিয়াদা থাজবা পীখি হায়রি।
ঙরাং লৈবাক শীনবা থুংনা পাঙথোকখিবা স্বামি বিবেকানন্দগী ১৬২ শুবা মপোক কুমওন নুমিৎকা মরী লৈননা শীনবা নেসনেল য়ুথ দেগী মপূং ওইবা থৌরম নিউ দিল্লিগী কনস্তিত্যুসন ক্লব ওফ ইন্দিয়াদা পাঙথোকখি। হায়রিবা থৌরম অদুদা বিজেপিগী এম পি মনোজ তিৱারী অমদি অতৈ মশক নাইবা মী কয়ানা শরুক য়াখি। তোঙানবা স্তেত কয়াদগী লাকপা হীরম কয়াদা থবক তৌরিবা নহা ৩০ দা য়ুনিয়ন মিনিস্তর জুএল ওরামনা লেমজনিংঙাই ওইরবা মনা পীদুনা ইকায় খূম্নবা ঊৎখি।
এৱার্দ ফংখিবশিংগী মনুংদা নাগালেন্দদগী গিতরিস্ত ইমনেলা জামির, হন্দক্কী অনৌবা ৱার্ল্ড চেস চেম্পিয়ন গুকেস, মারৈমগী কন্তিনেন্ত ৫গী অৱাংবা চীংদোদা ইন্দিয়াগী ফিরাল পায়হনখিবী মহারাস্ত্রাদগী মাউন্তেনর কম্যা কার্থিকেয়ন লদাখ বাস্কেতকী থিনলে নোর্বুনচিংবা মশক্নাইবা কয়াসু য়াওরি।
জুএল ওরামনা ফোঙদোকখিবদা, লিসিপ্রিয়ানা লৌরিবা থৌদাং অসি ইচম চম্বা মীওই অমনা হেক্তা ঙমগদবা নত্তে। মখোয়গুম্বা অঙাং অমদি নহা কয়া থোরকপনা ইন্দিয়া অসি ঙসিদি মালৈমগী মকোক্তা লৈবা ঙম্লিবনি। ঐখৈায়না মখোয়দগী তমজফম কয়া লৈরি। স্বামি বিবেকানন্দগী মীনা থিনা চৈরবসু শাওদবা, অচুম্বা চৎপা অমদি ইন্দিয়াবু মালেমগী থাক্তা পুখত্তুনা থম্লম্বা অসিনা মহাক হিন্দু মোঙ্ক ওইজরবসু ধর্ম্ম খূদিংমক্না ঙসিদি ইকায় খূম্নরি। অসুম্না নহাশিংনা মহাক্কী ফিদম ইনগদবনি হায়না ফোঙদোকখি।
মহাক্না মখা তানা হায়খিবদা, লিসিপ্রিয়ানা মণিপুরগী থোক্লিবা লান অসিদা অৱাবা তারবা অমদি রিলিফ কেম্পতা লৈরিবা অঙাং কয়াবু হাইতেক মেদিকেল কোলেজনচিংবদা তোঙান তোঙানবা মেদিকেলগী হীরম কয়াদা স্কোলরসিপ পীদুনা লেম্না মহৈ মশিং তমহনবা অসি উবদা লেম্না মহৈ মশিং তমহনবা অসি উবদা য়াম্না নুং ঙাইবা ফাওই। মহাক্না মিনিস্তর অমা ওইরবসু মদু হেক্তা তৌবা ঙম্লোই হায়না মিনিস্তর জুএল ওরামনা লিসিপ্রিয়াবু থাগৎপা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু