সাহিত্য সেবা সমিতি ককচীংগী মপোক কুমওন থৌরম পাঙথোকপগা লোয়ননা খোরিরোলগী মনাশিং লান্থোকখ্রে
ইম্ফাল, জানুয়ারি ১৫ : মণিপুরগী য়াম্না লিরবা খোরিলোলগী লূপ অমা ওইরিবা সাহিত্য সেবা সমিতি ককচীং (মণিপুর) গী ৫৮ শুবা মপোক কুমওন থৌরম ঙসি ককচীং ফৌশুপাৎ লৈকায়দা লৈবা লাইব্রেরি এন্দ ইনফোর্মেসন সেন্তর ককচীংগী ওদিতোরিয়ামদা পাঙথোকখ্রে। সমিতি অসিনা পীবা তোঙান তোঙানবা খোরিলোলগী মনাশিংসু লান্থোকখ্রে।
ঙসিগী থৌরম অদুদা জৱাহরলাল নেহেরু মণিপুর দান্স একাদেমি ইম্ফালগী ভাইস চেয়ারমেন লোংজম জয়চন্দ্রনা অথোইবা মীথুংলেন, সাহিত্য সেবা সমিতি ককচীংগী প্রেসিদেন্ত সাহিত্য একাদেমি এৱার্দি য়ুম্লেম্বম ইবোমচানা অখন্নবা মীথুং ওইখি।
থৌরম অদুদা সমিতি অসিগী খোরিলোলগী চেফোঙ ‘চুমথাং’ গী ৬৭ শুবা মশিং ফোঙখি। চেফোঙ অদুগী মরমদা ইদিতর দাঃ নোংমাইথেম প্রমোদিনিনা ৱা ঙাঙখি। লোয়ননা সমিতি অসিনা পীবা তোঙান তোঙানবা খোরিলোলগী মনাশিংসু লান্থোকখি।
ককচীং ফৌশুপাৎ লৈকায়দগী য়াম্বেম সত্য সিংহনা কৎপা নৈন-ৱারেং (ক্রিতিসিজম) গী লাইরিক্তা পীবা য়াম্বেম মনি সাহিত্য মনা ২০২৪ ককচীং মখা লৈকায় নাওদম পরেংদগী দাঃ ক্ষেত্রিময়ূম শান্ত সিংহদা মহাক্কী নৈনা ৱারেং লাইরিক ‘অঙনবা খূন্নাইদা নুপীগী শক্তম হায়বসিগীদমক লান্থোকখি। ককচীং বাজার (খুনয়াই লৈকায়) দগী য়েন্দ্রেম্বম ওংবী তাবোপনিা কৎপা নোবেল/সোর্ত স্তোরি লাইরিক্তা পীবা য়ান্দেম্বম সুরলতা পুরস্কার ২০২৪ না হিয়াংলম ময়াই লৈকায়দগী ই এস সুন্দর (এলাংবম শ্যামসুন্দর) দা মহাক্কী ৱারী লীশাংগী লাইরিক (নোবেল) ’৭১ গী ঙানু থোঙ্গোং’ অসিগীদমক পীখি।
ককচীং তুরেল ৱাংমদগী কেংবা য়েংখোমনা কৎপা শৈরেং লাইরিক্তা পীবা চিংখু মোইরাংলৈমা কাবির্দাস মনা ২০২৪ না থাঙ্গ তোংব্রম লৈকায়দগী তোংব্রম অমর্জিৎতা মহাক্কী শৈরেং লাইরিক ‘ইমাগী কৈথেল’ হায়বসিগীদমক লান্থোকখি। ককচীং ময়াই লৈকায়দগী ক্ষেত্রিময়ূম চাওবা সিংহনা কৎপা অতোপ্পা লোলদগী মণিপুরদা হন্দোকপা লাইরিকশিংদা পীবা ক্ষেত্রিময়ুম চাওবা ত্রান্সলেসন এৱার্দ ২০২৪ না য়াইস্কুল চিংঙাখম লৈরক্তগী নোংমাইথেম কিরনকুমারদা মহাক্না এন্নি ফ্রেঙ্ককী দাইরি’ হায়না হন্দোকপগীদমক পীখি।
ককচীং শুমাক লৈকায়, কৈথেল পরেংদগী সাহিত্য একাদেমি এৱার্দি ক্ষেত্রি বিরনা কৎপা মণিপুরগী মপান্দা খুন্দা লৈতাদুনা লৈখ্রবা মণিপুরী অইবশিংখক্তদা পীবা ক্ষেত্রি ওংবী নলিনি দেবী নিংশিং মনা ২০২৪ না অসামগী লক্ষিপুর লাবোক পার্ত ২ দগী থোকচোম অঞ্জানাদা মহাক্কী শৈরেং লাইরিক ‘হিংলমগে নাশুংলাংগী’ হায়বসিগীদমক পীখি।
য়ুনাইতেদ স্তেতস ওব আমেরিকা (য়ু এস এ) গী মিনেসোতদা লৈবী দাঃ য়েন্দ্রেম্বম সঙ্গিতা দেবীনা কৎপা দ্রাম/লমকোই ৱারী/বাইওগ্রাফি/ওতো-বাইওগ্রাফি লাইরিক্ত পীবা য়েন্দ্রেম্বম গোদাধর নিংশিং মনা ২০২৪ না সগোলবন্দ লুক্রাম লৈরক্তগী সরতচান্দ থিয়ামদা মহাক্কী লমকোই ৱারী লাইরিক ‘নুংশিবী জাপান’ হায়বসিগীদমক লান্থোকখি মনাশিং অসিদা শেল ওইনা লুপা ১০,০০০/- সাইতেসন অমা অমসুং সাল অমমমম য়াওখি। ঙসি লান্থোকখিবা মনাশিং অসিবু কৎপীরিবশিংদা সাহিত্য সেবা সমিতিগী মায়কৈদগী অচম্বা খূদোল তমদুনা ইকায়খুম্নবা ঊৎখি।
ঙসিগী থৌরম অদুগী অহৌবদা সমিতি অসিগী লৈখিদ্রবা অহন-লমনশিং অমদি নিংশিং মনাশিংগী মমীং ওইরিবা লৈখিদ্রবশিংগী মফমদা হৈকৎ-লৈকৎ তমদুনা ইকায় খূম্নবা ঊৎখি। ইমা লৈবাক মণিপুরগী ঙমখৈ ঙাক্নবগী লানফমদা থৱায়না পোন্থা পীখ্রবশিংগী মফমদা ইকায় খূম্নবা উত্তুনা মিনিত ২ তুমিন্না লেপ্তুনা অৱাবা ফোঙদোকখি।
হন্দক্তা লৈখিদবা অইবা অনী হিয়াংলম ময়াই লৈকায়দগী মাইবম নবকিশ্বর অমসুং ককচীং পাজি লৈকায়দগী পুখ্রম্বম কুঞ্জো অনীগী মফমদসু ইকায় খূম্নবা ঊৎখি। অদুগা মাইবম নবকিশ্বরগী মরমদা মণিপুর য়ুনিবর্সিতিগী এসোসিএত প্রোফেসর দাঃ চিরোম রাজকেতননা অদুগা পুখ্রম্বম কুঞ্জোগী মরমদা ককচীং সামর্জিৎ (নাওরেম সামর্জিৎ) না ৱা ঙাংখি হায়রি।
সোর্স: পোক্নফম
0 কমেন্ট:
কমেন্ট তৌবিয়ু