হোজাইদা নৌনা শাবা ইমোইনু মার্কেট অমদি বীর টিকেন্দ্রজিৎকী মীতম মাইখুম হাংদোকখ্রে
ইম্ফাল, আগস্ট ১৩ : হোজাইগী গীতা মন্দিরদা নৌনা শাবা ইমোইনু মার্কেট ঙসি অয়ুক পুং ৮.৩০ দা শঙ্গাখিবগা লোয়ননা হোজাইগী শিবপুর, জুগিজানদা নৌনা শাবা বীর টিকেন্দ্রজিৎকী মীতমসু মাইখুম হাংদোকখ্রে হায়রি।
ইমোইনু মার্কেট শঙ্গাবগী থৌরম অদু আরকে রঞ্জন, য়ুনিয়ন মিনিষ্টার ওফ ষ্টেট ফোর এক্সটার্নেল এফিয়ার্স এন্দ এডুকেশননা ওল মণিপুর য়ুনাইটেদ ক্লাবস ওর্গানাইজেসন (অমুকো) গী প্রেসিদেন্ট ফৈরোইজম নন্দো লুৱাং, রাম কৃষ্ণ ঘোষ, এমএলএ, ৯১-হোজাই লেজিসলেটিব এসেমব্লি কন্সটিট্যুয়েন্সি অমদি লাইশোম গুলাপ, মণিপুর সোর্ট ষ্টোরি সোসাইটি, ইন্দিয়াগী প্রেসিদেন্টগী মমাংদা হাংদোকখিবনি।
লোয়ননা হোজাইগী শিবপুর, জুগিজানদা শিবপুর ভিলেজ দিবেলপমেন্ট কম্মিটি অমদি শিবপুর নবজ্যোতি ক্লাব অনিনা মপুং ওইবা থৌদাং লৌদুনা নৌনা শাবা বীর টিকেন্দ্রজিৎকী মীতম মাইখুম হাংদোকপগা লোয়ননা অথৌবা টিকেন্দ্রজিৎকী মপুং ওইবা নীংশিং থৌরম অমা শিবপুর জুগিজান কালচারেল হোলদা পাঙথোকখি।
থৌরমদুদা য়ুনিয়ন মিনিষ্টার ওফ ষ্টেট, এক্সটার্নেল এফিয়ার্স এন্দ এডুকেসন ওইরিবা ডাঃ আরকে রঞ্জননা অথোইবা মীথুংলেন, অমুকোগী প্রেসিদেন্ট ফৈরোইজম নন্দো লুৱাং অমদি রাম কৃষ্ণ ঘোষ, এমএলএ, ৯১-হোজাই লেজিসলেটিব এসেমব্লি অনিনা ইকাই খুম্নবা মীথুংলেনশিং ওইখি। মসিদা অখন্নবা মীথুংলেন ওইনা তেনশুবম মণিহার, প্রেসিদেন্ট মণিপুরী সাহিত্য পরিষদ, আসাম, হোজাই অমদি কেএসঐচ জিবোন সিংহা, সোসিয়েল ৱার্কর, হোজাইনা ওইখি। অদুগা লাইশোম গুলাপ, প্রেসিদেন্ট, মণিপুরী সোর্ট ষ্টোরি সোসাইটি, ইন্দিয়ানা প্রিসাইদ তৌখি হায়রি।
থৌরমদুগা মরি লৈননা অমুকোগী প্রেসিদেন্ট ফৈরোইজম নন্দো লুৱাংনা হায়, মালেমদা চোইনা খুন্দারিবা মণিপুরীশিংগী লৈবাক লৈবাক্কী ওইবা বাউন্দরি লৈবনা তোঙান-তোঙানবা লৈবাক্তা লৈনরবসু ঐখোয়গী ঈ মরিদা অমদি নাৎকী চৎনবীদদি ঙমখৈ হায়বদু লৈতে। ঐখোয় মণিপুরীশিংগী ঈগী অপুনবা ঈচেল অমা মতম পুম্বদা ঈতিনফম অমা য়ৌনবা অদুম পুন্না চেন্থমিন্নবা মথৌ তাই। ঐখোয়গী অপুনবা ঈতিনফম অদুদি ঐখোয়গী ইপা-ইপুশিংনা থম্বীরম্বা মীখা পোনবা হৈতবা, মীপাল তাংদবা, অতোপ্পনা লাকচবা য়াদবা, য়েক্নবগা লান্থেংনবদা শকমাই লৈদবা অমদি ইশানা থবক শু-নোমদুনা ইশাগী চিঞ্জাক ৱাৎতনবা হোৎনবা অসিনচিংবা অসিনি।
ঐখোয়না ঙসি মণিপুরগী অথৌবশিংবু থেংখাং কয়াদা হৈকৎ-লৈকৎ তমদুনা নীংশিং থৌরম পাঙথোক্লিবসি মখোয়না মণিপুরী খুনাইগীদমক মথ্বায় পাম্মুদনা তৌখিবা থবকশিং অদুগী মরমদা মুন্না নৈনরগা ঙসিগী মীরোলদা হিংলিবা ঐখোয়না ইশাদা থৌনা অমা হাপচদুনা লৈবাক মীয়ামগী থবক তৌবগী ইহুল অমা চেন্নবগীদমক্তনি।
ঙসি ঐখোয়গী য়েলহৌমী ওইরিবা মণিপুরীশিংনা মরুওইনা মৈতৈশিংনা মণিপুর, আসাম, ত্রিপুরা, মায়নমার, বাংলাদেশ অমদি অতৈ মালেমগী লৈবাক কয়াদা খুন্দারিবা মৈতৈশিংগী ফিবম করি ওইরি হায়বদু ঐখোয় পুন্না খন্থমিন্নদুনা ঐখোয়গী পাঙ্গল থৌনাদু হেনগৎহনবা মতম ওইরে। মদুদা মরৈবাক্কীদমক মথ্বায় থাখ্রবা টিকেন্দ্রজিৎ অমদি অতৈ অথৌবা কয়ানা থৌনা পীবীবা ওইরসনু হায়খি।
থৌরম অসিবু প্রিসাইদ তৌখিবা লাইশোম গুলাপ, প্রেসিদেন্ট, মণিপুরী সোর্ট স্টোরি সোসাইটি, ইন্দিয়াগী প্রেসিদেন্টনা হায়খিবদা, মণিপুরগী ৱাংমদা খুন্দারিবা হোজাইগী মৈতৈশিংনা মৈতৈগী নাৎ অমদি চৎনবী খুদিংমক ঙাক্না চৎলি অমদি ইমালোল মৈতৈলোল অসি মৈতৈশিংগী মনুঙদা মৈতৈলোল খরা শেংনা ঙাংবসি হোজাই-লঙ্কাগী মৈতৈনি হায়বদা হেঞ্জিনবা ওইরোই। লমদমসিগী মীয়ামদা হেন্না থৌনা লিংজেল পীনবগী অমদি নৌরিবা মীরোলদা ঐখোয়গী অথৌবশিংবু মশক খঙদুনা মরৈবাক মফুরুপ নুংশিবগী ৱাখল্লোন অমা মতম পুম্বদা পীনবগী পান্দমনি।
থৌরমসিদা অথোইবা মীথুংলেন ওইখিবা আরকে রঞ্জননা লুপা লিশিং ১০ অদুগা অমুকোনা লুপা লিশিং ৭০ মতেং পাংলমখি হায়রি।
সোর্স: সঙাই এক্সপ্রেস
- ট্যাগ:
- ডায়াস্পোরা
- হোজাই
- আসাম
0 কমেন্ট:
কমেন্ট তৌবিয়ু