image

হোকি অমসুং ৱুশুগী শান্নরোয় সুসিলা চনু অমদি নাওরেম রোসিবিনাদা প্রেসিদেন্টনা অর্জুন এৱার্দ খূৎশিন্নখ্রে

 

নিউ দিল্লী, জানুয়ারি ০৯ : পীকখ্রবা মণিপুরদগী তোঙান-তোঙানবা মশান্নশিংদা থোইদোক হেন্দোক্না মতিং লৈবা নুপা অমসুং নুপী শান্নরোয়শিং থোরক্তুনা লৈবাক অসিগী চাংদম্নবগী ফম্বাক্তা খক্তা নত্তনা লৈবাক অসিবু মহুৎ শিন্দুনা মালেমদা মশক তাক্লকপদগী ষ্টেট অসিবু স্পোর্টসকী পাৱর হাউসনি হায়নরকখিবদু ঙসি প্রেসিদেন্ট দ্রৌপদি মুরমুনা শান্নরোয় ২৬ তা অর্জুন এৱার্দ খূৎশিন্নখিবদা মণিপুরগী হোকি শান্নরোয় পুখ্রম্বম সুসিলা চনু অমসুং ৱুশুগী শান্নরোয় নাওরেম রোসিবিনাদসু খূৎশিন্নরকখিবনা অমুক্কা হন্না নীংশিংহনখ্রে।

লৈবাক অসিগী শান্নরোয়শিংদা পীবা লেমজনীংঙাই ওইরবা অর্জুন এৱর্দ, ২০২৩ খূৎশিন্নবগী থৌরম অদু ঙসি দেল্লীদা পাঙথোকখিবনি। নেসনেল স্পোর্ট এৱার্দ অসিবু তোঙান-তোঙানবা মশান্নাশিংদগী খনগৎলবা মীথোই-মীহেল্লবা শান্নরোয় ২৬ তা প্রেসিদেন্টনা হকথেংননা খূৎশিন্নখিবনি। 

         হোকি শান্নরোয় পুখ্রম্বম সুসিলা চনু

অর্জুন এৱার্দ পীদুনা ইকায়খুম্নরক্লবা পুখ্রম্বম সুসিলা চনু মমাঙগী কুমজা ২০২৩ দা চাইনাগী হাংজৌদা পাঙথোকখিবা ১৯ শুবা এসিয়ান গেমসতা লৈবাক অসিগী টিম্না ব্রোঞ্জ মেদল ফংবদা অচৌবা থৌদাং লৌখিবীনি। মহাক য়াওবা টিম্না হৌখিবা কুমজা ২০২২ দা য়ুনাইটেদ কিংদমগী বিরমিংহামদা পাঙথোকখিবা ২২ শুবা কম্মনওয়েল্ঠ গেমসতসু ব্রোঞ্জ মেদল ফংলকখি। অদুগা চহীদুমক্তদা স্পেনগী ভালেন্সিয়াদা পাঙথোকখিবা এফ আই ঐচ নেসন্স কাপ্তনা গোল্ড মেদেল ফংলকখিবনি।

 

        ৱুশু শান্নরোয় নাওরেম রোসিবিনা

অমরোমদা ঙসি প্রেসিদেন্টনা অর্জুন এৱার্দ পীদুনা ইকায়খুম্নরক্লবা মণিপুরগী ৱুশু মশান্নগী শঅন্নরোয় নাওরেম রোসিবিনাসু মমাঙগী গেমসতা সিলভার মেদল ফংলকখিবীনি। মমাঙগী চহীদা য়ুএসএগী টেক্সাসতা পাঙথোকখিবা ৱার্ল্ড ৱুশু চেম্পিয়নশিপ্তসু মহাক্না সিলভার মেদল ফংলকখি অদুগা চহীসিমক্তদা রুসিয়াগী মোস্কোদা পাঙথোকখিবা মোস্কো ৱুশু ষ্টারস চেম্পিয়নশিপ্তনা গোল্ড মেদল ফংলকখিবীনি।
শান্নরোয় ২৬ তা অর্জুন এৱার্দ খূৎশিন্নখিবদা মখোয় অনী য়াওরকপদা চীফ মিনিস্টার এন বিরেননা মহাক্কী সোসল মীদিয়াগী প্লেটফোর্মদা হরাওবা ফোঙদোরকখিবগা লোয়ননা মখোয় অনীনা তুংদসু কত্থোকপগা লোয়ননা কন্না হোৎনদুনা অহেনবা মীংচৎশিং পুরকপা ওইরসনু হায়না ফোঙদোরক্লি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু