সিলেটতা খুন্দারিবা মৈতৈশিংগী কাং চিংবগী থৌরম পাঙথোকখ্রে
সিলেট, ২০ জুন : চহি খুদিংগী ওইনা পাংথোক্তুনা লাকখিবগুমনা হন্দক্কী চহিদসু বাংলাদেশকি সিলেট সিটিদা খুন্দাদুনা লৈবা মৈতৈশিংনা কাং (রথযাত্রা) চীংবগী থৌরম রিকাবিবাজারদা লৈবা কাঙলেনদা পাঙথোকখ্রে।
থাইনা ইপা-ইপু হাক্তকতগী চৎনরকপগুম হন্দকসু মফম অসিদা খুন্দারিবা মৈতৈশিংগী তোঙান তোঙান্বা লৈকায়দগী চিংদুনা লাকপা কাং ১৩না পুল্লগা হায়রিবা রিকাবিবাজারদা লৈবা কাঙলেন তম্পাক্কী কাংফমদা চহিগী ওইনা ঈরাৎ থৌরম পাঙথোকপনি হায়রি।
কাংফম অদুদা ময়াম পুল্লগা জয়দেবগী থৌগল অমসুং জগন্নাথ আরতি তৌরবা মতুংদা অমুক লৈকাই লৈকাইদা হন্নখি। কাংফম অদুদা সিলেট সিটি কর্পোরেশনগী মেয়র আরিফুল হক আরিফনা কাংফম অসি মৈতৈগী কাংফমনি হায়বা নুঙদা হকপা নেমপ্লেট অমা থেৎলগা মায়খুম হাংদোকপিখিবনি।
মেয়র আরিফুল হক আরিফনা কাং চীংবগী থৌরমদা লাকপদা ময়াম্না ওকপগী মতাং অমা
মেয়র আরিফুল হক আরিফনা হায়, মৈতৈশিংগী চাওখৎ খোঙথাংদা মহাক্না মতম খুদিংমক্তা মতেং পাঙদুনা লাকখি, ঙসিগী অসিনা মহাক্কী মেয়র ওইনা থৌরম অসিদা অরোইবা লাকপনি। মহাক্না মেয়র ওইদ্রবসু মতম খুদিংদা মৈতৈগী অৱা অনা অমদি চাওখৎ খোঙথাংদা শরুক য়াগনি হায়না মহাক্না মীয়ামদা ফোংদোকলমখি।
সিলেট দেবালয় রথযাত্রা উদযাপন কমিটিনা শিল্লাংবা অমসুং সিলেট লৈবাক পঞ্চায়েতকী মিৎয়েং মখাদা চহি খুদিংগী অসুম্না কাং চীংবা থৌরম অসি পাঙথোক্তুনা লাকপনি । লাক্লিবা ২৮ জুন অরোইবা কাং (ফিরা রথযাত্রা) পাঙথোক্লগনি হায়রি।
0 কমেন্ট:
কমেন্ট তৌবিয়ু