সিলেটতা অহানবা মেয়র কাপ ইন্টার মণিপুরী কাং টূর্নামেন্ট ২০২২ হৌদোকখ্রে
সিলেট, এপ্রিল ২৯ : মৈতৈগী য়েলহৌঙদগী মশান্না কাং অসিবু য়োকখৎপগী পান্দমদা লৈচোম্বম লৈকাই (লামাবাজার মণিপুরী পাড়া) না শিল্লাংদুনা সিলেট মণিপুরী কাং এসোসিয়েশনগী মতেং অমসুং মিৎয়েং মখাদা, সিলেট সিটি কর্পোরেশননা স্পোন্সর তৌদুনা অহানবা ওইনা মেয়র কাপ ইন্টার মণিপুরী কাং টূর্ণামেন্ট ২০২২ ঙসি এপ্রিল ২৯, নুংথিল পুং ৩.৩০ মতমদা সিলেট সিটি কর্পোরেশনগী মেয়র আরিফুল হক চৌধুরী আরিফনা হৌনবি মতুং ইন্না ফিতা কক্তুনা হৌদোকখ্রে।
মেয়র আরিফুল হক চৌধুরী আরিফনা চীফ গেষ্ট, অমসুং শকনাইরবা ব্যাংকার অমসুং টূর্ণামেন্ট ষ্টিয়ারিং কমিটিগী কনভেনার এল. প্রশান্ত কুমার সিংহনা প্রেসিডেন্ট ওইনা শরুক য়াখিবা ঙসিগী হৌদোকপগী থৌরম অদুদা গেষ্ট ওফ ওনার ওইনা বাংলাদেশ প্রতিদিন পত্রিকাগী ব্যুরো চীফ মমিং লৈরবা জর্নালিষ্ট শাহ দিদার আলম চৌধুরী অমদি সিলেট মণিপুরী কাং এসোসিয়েশনগী প্রসিদেন্ট য়ুম্নাম নৃপেন্দ্র সিংহনা শরুক য়াখি। চীফ গেষ্টকী ৱারোল পীবদা মেয়র আরিফুল হক চৌধুরী আরিফনা হায়, লৈবাক অসিগী আর্ট এন্ড কালচার অমসুং স্পোর্টসকী চাওখৎ খোংথাংদা মণিপুরীশিংগী চাওরবা থৌদাং লৈরিবনি, মদুবু ঐখোয়না ইকায়খুম্নজৈ অমসুং কৈদৌনুংদসু কাউদে। অদুনা মণিপুরীশিংগী কালচার অমসুং ট্রাডিশন য়োকখৎপদা ঐখোয়না অঙম্বা তেংবাংগনি হাইদুনাসু মহাক্না ফোংদোকপিরম্মি। গেষ্ট ওফ ওনারগী ফমদা লৈতেংবিখিবা জর্নালিষ্ট শাহ দিদার আলম চৌধুরীনা হায়, কাং শান্নবা অসি মণিপুরীশিংগী মৈহৌরোনদগী শাগোন্নরকলবা মশান্না অমনি, অদুনা স্পোর্টস অসি মণিপুরীনা লৈবা মফম পুম্নমক্তা শিনলাংদুনা শান্নবা হৌরবদি কৈদৌনুংদসু মুৎলোই। অদুনা ময়াম্না অসিগুম্বা টূর্ণামেন্ট অসি শৌগৎকদবনি।
সিলেট মণিপুরী কাং এসোসিয়েশগী এক্সিকিউটিভ ম্যাম্বর সমরেন্দ্র সিংহনা কন্ডাক্ট তৌখিবা থৌরম অসিদা অতৈসু শরুক য়াখি শিবগঞ্জ মণিপুরী পাড়া মন্দির পরিচালনা কমিটিগী প্রেসিডেন্ট এম. সুরজিৎ সিংহ সুর, শক্নাইরবা থিয়েটর এক্টিভিষ্ট এম. উত্তম সিংহ রতন, কবি অমসুং অইবা রবি কিরণ সিংহ রাজেশ, মণিপুরী যুব কল্যাণ সংস্থাগী প্রসেদেন্ট ফ. নরেন সিংহ ও আমসফা’গী সেক্রেটারি সজল সিনহানা চিংবা অতৈ অতৈ।
থা অনি চুপ্না শানগদবা অসি নুপাগীনা ইরাই নুমিৎ নুপীগীনা থাংজ নুমিৎ খুদিংগী শান্নগনি। টূর্ণামেন্ট অসিদা বাংলাদেশতা নত্তনা ইন্দিয়াগী আসাম অমসুং মণিপুরদগী কাংখুৎ অনি লাক্তুনা শরুক য়াগনি হায়রি।
অহানবা নুমীৎকী ওইনা শান্নখিবা অসি নয়াবাজার নহারোল কাংখুৎনা ১৭-০৭ পয়েন্টতা লামাবাজার কৃষ্ণ বলরাম কাংখুৎপু মায়থিবা পীখি। অনিশুবা শান্নবদনা আম্বরখানা ইপুধৌ কাংখুৎনা ৯-৪ পয়েন্টতা নোংমাইথেম কাংখুৎপু মায়থিবা পীখি, অহুমশুবা শান্নবদনা কাংলাশা বাংলাদেশ কাংখুৎনা ১৫-৬ পয়েন্টতা শিবগঞ্জ নংলৈ কাংখুৎপু মায়থিবা পীখি।
0 কমেন্ট:
কমেন্ট তৌবিয়ু