বাংলাদেশতা খুন্দারিবা মীতৈশিং মুংখিদনবা লোন, নাৎ, চৎনবী ঙাক্তুনা হিংলি: এসসি সিংহ
ইম্ফাল, সেপ্টেম্ব ১৫ : মীওই ক্রোর ১৮ হেন্না লৈরিবা বাংলাদেশতা মীতৈ ফুরূপ অসি শুপ্নগী মীওই লিশিং ২৫/৩০ রোম খুন্দারিবা ঐখোয়গী অপিকপা ফুরূপ মুংখিদনবা, মাংখিদনবা ঐখোয়গী লোন, নাৎ, চৎনবী ঙাক্তুনা হিংলি হায়না সুপ্রিম কোর্ট অফ বাংলাদেশকী সিনিয়র এদভোকেট লাইরেঞ্জম সুরচন্দ্র সিংহ (এসসি সিংহ) না ফোংদোকখ্রে।
ৱাফম অসি ইপাক ফিল্মস প্রদক্সন মণিপুরগী বেন্নর মখাদা জয়দীপ মেমোরিয়েল ইম্ফালনা প্রজেণ্ট তৌবা ডা. আরকে নায়নসানা দেবীন পুথোকপা রাকেশ নাওরেমনা দাইরেকশন পিবা মণিপুরী ফিচার ফিল্ম 'য়াহৌথেংবা খোইমু' বাংলাদেশকী মীতৈ ইচিন ইনাংশিংদা য়েংহনবগী থৌরমদা ফোংদোকখিবনি হায়রি। লিবরেসন ৱার মিউজিয়াম, ঢাকা, বাংলাদেশকী অদিতোরিয়মদা ফিল্ম উৎপগী থৌরম অদুদা সুপ্রিম কোর্ট বাংলাদেশকী সেনিয়র এদভোকেট এসসি সিংহনা থৌরম মপু ওইনা শরুক য়াখি। ফিল্ম অসিগী দাইরেক্টর রাকেশ নাওরেম অমদি মীলালগী লুচিংপুরেল লাঙ্গোলজম নোংমাইলেঙ্গী লৈমা, থৌবুরেল পাওনম থাকাবা, এডুকেশন সেক্রেটরি মাইবম ইন্দ্রজিৎপু হরাও তরাম্না ওকপগা লোয়ননা খুদোলপোৎশিং তমদুনা ইকায় খুম্নবা উৎখি। থৌরম অদুদা ঢাকাবাসি মণিপুরগী প্রসিদেন্ট কোংথাম নিলমনি, সেক্রেটরি চন্দ্রজিং সিংহ অমদি শশিকুমার সিংহ রিটায়ার্ড এদিসনেল সেক্রেটরি রেলৱে, বাংলাদেশনচিংবনা ৱা ঙাংখি। লোয়ননা বাংলাদেশকী শক্নাইরবা মীওই কয়াসু শরুক য়াখি হায়রি।
থৌরম অদুগা মরি লৈননা থৌরম মপু ওইনা শরুক য়াখিবা সুপ্রিম কোর্ট অফ বাংলাদেশকী সেনিয়র এদভোকেট এসসি সিংহনা হায়, চহি ৭ খুন্তাকপা অমদি মশীগী মমাংদগী বাংলাদেশ লৈপাকতা মীতৈশিংনা খুন্দা লৈতারকখি। বাংলাদেশতা খুন্দারিবা মীতৈশিংনা ঐখোয়গী নাৎ, চৎনবী, শক্তম ঙাক্তুনা থম্বা অদুমক হোৎনরি। মণিপুর অসি বাংলাদেশ লৈপাকতা খুন্দারিবা মণিপুরীশিংগী ওইনদি হৌরকফম লমদম ওইবনা য়াম্না তোয়না কলচর লিটরেচর, সোসিও ইকোনোমিগী মতাংদা অফবা মরী থম্বগী ৱাখল্লোন্দা য়াম্না তোয়না উন্নদুনা থবক থৌরম কয়া পাংথোকমিন্নবা মথৌ তায়। মণিপুর লৈঙাক্না ইন্দিয়া হায়কমিস্নরগা য়াম্না তোয়না অফবা মরী থমদুনা বাংলাদেশকী মণিপুরীশিং, মীতৈশিংগী চাউখৎ থৌরাংদা পাংবা য়াবা মতেংশিং পাংহন্নবা হোৎনফম থোকই। মীওই ক্রোর ১৮ খরা হেন্না লৈরিবা লৈপাক অসিদা শুপ্নগী মীওই লিশিং ২৫/৩০ রোমতমক খুন্দারিবা ঐখোয়গী অপিকপা ফুরূপ অসি মুংখিদনবা, মাংখিদনবা ঐখোয়গী লোন, নাৎ, চৎনবীশিং ঙাক্তুনা হিংলি হায়না ফোংদোকখি হায়রি।
সোর্স : পান্দম
0 কমেন্ট:
কমেন্ট তৌবিয়ু