• 476
• ৩০শে এপ্রিল ২০২২ ইং
• Share on:

তুংগী পুন্সিদা হেন্না মায় পাক্নবা থকশি-খাশি খঙবা অমদি অখাঙ কনবা চঙই: এম এল এ রঘুমনি

ইম্ফাল, এপ্রিল ২৭ : লমদম অসিদা লৈরিবা শান্নরোয়শিংনা তুংগী পূন্সিদা হেন্না মায় পাক্না চঙশিনবা ঙম্নবা থকশি-খাশি ঙাক্না চৎপা অখাঙ কনবা চঙই হায়না উরিপোক এসেমব্লি কন্সটিট্যুয়েন্সিগী এমএলএ, কেঐচ রঘুমনিনা ফোঙদোকখ্রে। ৱাফম অসি ঙসি প্রোগ্রেসিভ য়ুথ ওর্গানাইজেসন উরিপোক সোর্বোন থিংঙেলনা শীন্দুনা শ্রী শ্রী মদন মোহনজি মান্দপ্তা পাঙথোকখিবা হন্দক্তা দেভিস কাপ জুনিয়র এসিয়া ওসিনিয়া চেম্পিয়নশিপকী উইনার ওইখিবা ভূষন হাওবমবু ওকপগী থৌরম অমদা ফোঙদোকখিবনি।

এম এল এ রঘুমনিনা ফোঙদোকখিবদা, ভুষন হাওবমগী তুংগী লম্বী য়াম্না লৈরিবা মরম্না থকশি-খাশি লৈনা হোৎনবা চঙই। কোচনা তাকপদা হেন্না লৌশিন্দুনা কোচকা মরী ফনবা অমদি হেন্না খঙনবা হোৎনগদবনি হায়খি।

মহাক্না মখা তারদুনা হোৎনবা কনবগী মথক্তা অখাঙ কনবা ঙম্বা ওইগবনি। থকশি-খাশি হায়বসি হেন্না মরু ওইবা মরম্না মীথোই-মীহেনবা ওইনবা হোৎনবদা চঙবা অমসুনি হায়খি।

ওকপগী থৌরম অদুদা শরুক য়াখিবা মহুদকী কমিশনার এম জয়না ফোঙদোকখিবদা, শান্নবা হায়বসি থাকশি-খাশি ঙাক্না চৎপা, হোৎনবা কনবা, খাঙবা কনবা অমসুং নোল্লুকপা হায়বসি য়াওদ্রবদি মায় পাকপা পুরক্লোই। অদুনা শান্নরোয়শিংদা থকশি-খাশি ঙাক্না চৎপা হায়বসি য়াম্না মরু ওই হায়খি।

থৌরম মপূগী ৱারোল পীরদুনা প্রোগ্রেসিভ য়ুথ ওর্গানাইজেসনগী প্রেসিডেন্ট এদভোকেট কে ঐচ তরুনকুমারনা হায়খিবদা, শান্ন-খোৎনবা খক নৎতনা তোঙান-তোঙানবা হীরমশিংদা প্রোফেশনেল ওইনা চঙশিনগে হায়রবদি হোৎনবা খক নৎতনা নোল্লুকপা অমদি থম্মোয় শেংনা থকশি-খাশি খঙনা চঙশিনবা মথৌ তাই হায়খি। থৌরমগা মরী লৈননা ভুষণ হাওবমদা অচম্বা খুদোলশিং পীদুনা ইকাই খুম্নবগা লোয়ননা শান্নরোয় অসিনা তুংগী লম্বীদা হেন্না মায় পাকপা অমদি ষ্টেট অসিগী মিংচৎ পুরকপা ঙম্নবা পূক্নিং থৌগৎখি।

সোর্স: হুইয়েন লানপাউ