‘মণিপুর কনগে হায়রবদি লমদম অসিদা লৈরিবা জাতি খুদিংমক্কী থৌদাং লৈ’ - ৱাংখৈ এসিগী এমএলএ অরুনকুমার
ইম্ফাল, সেপ্টেম্বর ১২: জাতিফুরূপ অমা খক্না নৎত্রগা অনিখক্না মণিপুর কনবা ঙমলোই। মণিপুর কনগে হায়রবদি লমদম অসিদা লৈরিবা জাতি খুদিংমক্কী থৌদাং লৈ হায়না ৱাংখৈ এসিগী এমএলএ অরুনকুমারনা ফোংদোকখ্রে।
ৱাফম অসি লৈকোল (লৈমারোল খোর্জৈকোল) ইম্ফাল মণিপুরনা শীনদুনা ''হৌজিক্কী মণিপুরী খোরিরোল: মনুং অমসুং মপান'' (কনটেম্পোরারি মণিপুরি লিটরেচর ৱিথিন এন্ড বিয়োন্দ বোর্দরস) হায়বা থৌরম অসিদা নুমিৎ নিনি চুপ্না চৎথগদবা ইন্টারনেসনেল সেমিনার অমা ঙসি হৌদোকপগী থৌরমদা ফোংদোকখিবনি।
লম্ফেলপাৎতা লৈবা ইন্স্তিত্যুট অফ কোওপরেতিব মেনেজমেন্ট (আইসিএম)গী কনফরেন্স হোলদা পাংথোকখিবা থৌরম অদুদা ৱাংখৈ এসিগী এমএলএ থাংজম অরুনকুমারনা মহাক্কী চিফ গেষ্টকী ৱারোলদা মখা তারদুনা হায়, ইরমদম অসি কনবগী ৱাফম অসি লাকপা মতমদা লমদম অসিদা লৈরিবা মহৈরোয় ময়ামসু পুন্না পুনশিল্লগা অমত্তা ওইবগী ৱাখল্লোনদা পুন্না থেংনবগী তঙাইফদবা লৈ। সুমাইনা তৌদুনা ঐখোয়গী অইবা অইবীশিংসু ঐখোয়গী খুনাই অসিদা মেসেজ পীবা য়াবা লাইরিক কয়া ইবীদুনা থৌদাং লৌবীয়ু। ঐখোয়গী খ্বায়দগী লাইবা মেসেজ পীবা য়াবা মেদিয়াম হায়রবদি লাইরিকসু অমনি হায়খি।
মহাক্না হায়, মতম অমদদি নূপীশিংগী লাইরিক ইবদি লায়রদনা লাইরিক ফাওবা তম্লমদে। নূপীনা লাইরিক তম্লগা কৈদৌদোইনো হায়বগী অখুবা মীৎয়েং অমদা য়েংলম্মী। ঙসিদি নূপী অইবী ময়াম অমা থোক্লক্তুনা অচৌবা কন্ট্রিব্যুসন অমা খুনাই অসিদা পীরি। লাইওইখ্রবা শক্নাইরবী অইবা ময়ামদুনা য়াৎলম্লিবা লম্বীদুনা ঙসিগী থাকসিদা য়ৌরকপা ঙম্লিবনি। ঙসিদি নূপী অইবীশিংগী ওর্গনাইজেসন ওইরিবা লৈকোলনা পীরিবা কন্ট্রিব্যুসন অসি অদুক্কী মতিক চাওখ্রে। মসি য়াম্না শিংথানিংঙাইনি হায়খি।
অমরোমদা, মহাক্না হায়, পথিবীদা চাওখৎলবা জাতি ময়াম অমা, কন্ত্রি কয়া অমা লৈ। মসিদা মশাগী মরোল লৈরগা ময়েক লৈজদবা য়াওরি। অদুবু ঐখোয়গী মণিপুরিদী পীকচরবসু ইশাগী ইরোল ইয়েক লৈজবা লমদম অমনি। ঐখোয়গী ইপা ইপু শিংনা ইরোল ইয়েক কলচর, লাইনিং লাইশোন ফজনা থম্বীরম্মী। অসুক য়াম্না মপুং ফানা হিরম খুদিংদা অৱাৎপা লৈতনা থম্বীরম্লিবা অসি ঐখোয়না মাংহনঞ্জবদৌনা তৌবসি নুংঙাইতে।
ঐখোয়গী তুংগী মীরোলশিংনা ঐখোয়গী লোল অসি হেক হেক লাইথোকপদৈনা তৌই। অতোপ্পা জাতিগী লোলনা মহুৎ শিঞ্জিল্লকপা অসিনা ঐখোয়গী লোল অসি মাংথরকপদৌনা তৌই। মীঙ্গৌদা ফাওবা মীতৌ তম্লকপা অসি য়াম্না নুংঙাইতে। ইশাগী লোল ঙাংবদা ইকায়নিংঙাই লৈতে। ইশাগী ইরোল ইয়েক লৈরিবসি চাওথোকচগদবনি। ঐখোয়গী মণিপুরী লোল অসি য়াম্না লুরবা লোল অমনি। মসি ক্লাসিকেল লেঙ্গুয়েজকী থাক্তা পুখৎনবা ময়াম পুন্না হোৎনমিন্নসি হায়খি।
নাকল অমরোমদা, লৈকোলগী সেক্রেটরি জিএইচ ঘনাপ্রিয়ানা থৌরম অদুগা মরী লৈননা ফোংদোক্লদুনা হায়, লৈকোলগী সিলভর জুবিলিগী শরুক অমা ওইনা ঙসিগী সেমিনার অসি পাংথোকপনি। মসিদা মপান লমদা লৈখিবা মণিপুরীশিংগী খোরিরোলগী খোংচৎনা করম্না তৌরি। মণিপুর মনুংদা লৈরিবা মণিপুরীশিংগী খোরিরোল খোংচৎনা করম্না তৌরি হায়বসিগী খন্না নৈনবনি। ঐখোয় পুল্লগা খন্ন নৈনদুনা ঐখোয়গী খোরিরোল অসি চাওখৎনবা, ঐখোয়গী ফুরূপ অসি মপাঙ্গল কলহন্নবা হোৎনমিন্নবনি। মপান লমদা লৈরিবা মণিপুরীশিং অসি অমগা অমগা পুনশিন্নবা ঐখোয়গী অপুনবা শাগৎনবা পান্দমদা সেমিনার অসি তৌবনি।
সেমিনার অসিদা বাংলাদেশগী এ কে শেরাম মশাদি লাকপা খুদোংচাদবদগী লাকত্রে অদুবু পেপরদি থাবীরকই। কানাদাগীসু হামােম প্রমোদনসু অইবা পেপর ওইনা পিবীরকই। হৌজিক অয়াম্বা লাক্লিবসি মেঘালয়া, ত্রিপুরা, বরাক তম্পাক, সিলচর হোজাই য়াওনা তোঙান- তোঙানবা মফমদগী দেলিগেট কয়া লাকই হায়না ফোংদোকখি।
থৌরম অদুদা লৈকোলগী প্রসিদেন্ট সি ঐচ সুবদনি দেবীনা থৌরম মপু অমসুং জোনেল দাইরেক্টর আইসিসিআর, নোর্থ ইষ্টন রিজন, মিনিষ্ট্রি অফ এক্সটার্নেল এফিয়ার্স গভর্মেন্ট অফ ইন্ডিয়া, ডাক্তর মুনিশ নিংথৌজম অমসুং দাইরেক্টর ইন্সটিটিউট অফ কোওপরেতিব মেনেজমেন্ট (আইসিএম), ডাক্তর কে ঐচ রামানন্দ ভাগ্যচন্দ্রনা গেষ্ট অফ ওনর ওইনা শরুক য়াখি।
ঙসিগী অহৌবা নুমিৎকী সেমিনারদা লোংজম জয়চন্দ্রনা মোদরেটর ওইখি। লোয়ননা এ কে শেরামনা ''হৌজিক্কী মণিপুরী খোরিরোল: বাংলাদেশ'', হামোম প্রমোদনা ''হৌজিক্কী মণিপুরী খোরিরোল: কানাডা'', লাঙ্গোলজম বীরমঙ্গলনা ''হৌজিক্কী মণিপুরী খোরিরোল: ত্রিপুরা'', নাওরেম বিদ্যাসাগরনা ''হৌজিক্কী মণিপুরী খোরিরোল: বরাক তম্পাক'' অমসুং লাইরেল্লাকপম শ্রতিকুমারনা ''হৌজিক্কী মণিপুরী খোরিরোল: ব্রহ্মপুত্র তম্পাক'' হায়বসিদা পেপর পাথোকখি।
সোর্স - সঙাই এক্সপ্রেস
0 কমেন্ট:
কমেন্ট তৌবিয়ু