সিলচরগী খোইরেনদা মণিপুরী য়ুনিটি কনভেন্সন পাঙথোকখ্রে
ইম্ফাল, দিসেম্বর ১৭ : চহী কয়াগী মমাঙদগী মীতৈ, বিষ্ণুপ্রিয়া মণিপুরী অমদি মীতৈ পাঙলশিং পূনশিন্নবা হোৎনদুনা লাক্লবসু অদুমক মায় পাকপা ঙমখিদ্রি। অদুবু ঙসিদি ওল আসাম মণিপুরী ষ্টুদেন্টস এসোসিয়েসন (অময়া) অমদি নিখিল বিষ্ণুপ্রিয়া মণিপুরী মহাসভানা শীন্দুনা সিলচরগী মনুং চন্না লৈবা খোইরেনদা মণিপুরী য়ুনিটি কনভেন্সন পাঙথোক্তুনা অপূনবগী শক্তম উৎলিবা অসি পুৱারীগী নুমিৎ অমা ওইনা লৈহৌরগনি হায়না চীফ মিনিষ্টার এন বিরেননা ফোঙদোকখ্রে। ৱাফম অসি থৌরম অসিদা অথোইবা মীথুংলেন ওইনা শরুক য়াখিবা চীফ মিনিষ্টারনা ফোঙদোকখিবনি।
মহাক্না হায়, আসামদা লৈরিবা সি এস ও শিংনা মশা-মশাগী ৱাখল্লোন্দা চৎপগী মহুত্তা অমত্তা ওইনা পূন্না চৎমিন্নরগা অপূনবগী লিংজেল উৎমিন্নসি। মণিপুর অমদি মণিপুরগী মপান্দা লৈবা মণিপুরীশিংনা আসামদা লাকপা মতমদা লৈফম-চাফম্নচিংবগী অচৌবা অৱাবা অমা মায়োক্নরিবা অসি অথুবা মতমদা কোক্নবা গেষ্ট হাওস অমা শারগনি লোয়ননা তুং কোইনা অমত্তা ওইনবা অমসুং পূন্না চৎমিন্ননবা মীতৈ, মীতৈ পাঙল অমদি বিষ্ণুপ্রিয়াগী অপূনবা কম্মিটি অমা শেম্লগনি হায়নসু ফোঙদোকখি।
থৌরম অসিদা অখন্নবা মীথুংলেন ওইখিবা মিনিষ্টার গোবিন্দাস কোন্থৌজম্না ঙসি ঐখোয় মণিপুরগী চীফ মিনিষ্টারনা মপান লমদা খুন্দারিবা মচোই তাখ্রবা ঈগী মরীশিংবু অমত্তা ওইনা পূনশিন্নদুনা হেন্না মপাঙ্গল কনবা ফূরুপ অমা ওইনবা হোৎনরিবা মঙালান অসি কায়দনবা ঐখোয় অমত্তা ওইনা পূনশিন্দুনা লিংজেল মান্নরসি হায়খি।
থৌরম অসিদা শরুক য়ারখিবা চীফ মিনিষ্টারদা তোঙান-তোঙানবা লূপ কয়ানা মেমোরেন্দমশিং পীশিনখি। অয়ূক পুং ১০ তারকপদা অময়াগী এদভাইজর ক্ষেত্রিময়ূম কুন্দল সিংহ অমসুং নিখিল বিষ্ণুপ্রিয়া মণিপুরীগী সেক্রেটারিনা অময়াগী ফিরাল চিংখৎখি। থৌরমগী মনুংচন্না মণিপুরদা হৌজিক থোক্লিবা থৌদোক অমসুং মীতৈ, মীতৈ পাঙল অমদি মণিপুরী বিষ্ণুপ্রিয়াশিং অমত্তা ওইনা পূনশিন্নবগী মতাংদা গ্রুপ দিস্কসন সেসন অমসু অয়ূক্তা পাঙথোকখি। সেসন অসিদা কোকোমিগী ৱাঙাঙলোই খুরাইজম অথৌবনা মোদরেটর ওইখি। অদুগা নুংথিলগী মীফমদনা চীফ মিনিষ্টারনা লুচিংদুনা মিনিষ্টার গোবিন্দাস কোন্থৌজম অমসুং এল সুসিলদ্রো য়াওনা এম এল এ শিংদা টি ঐচ শান্তি, কে ঐচ ইবোমচা অমসুং এম রামেশ্বরনা শরুক য়াখি। থৌরম অসিদা লক্ষিপুরগী উইমেন এক্সন কম্মিটি ফোর ভিলেজ প্রোটেক্সনগী প্রেসিদেন্ট সুনিতা কোন্থৌজম অমদি নিখিল বিষ্ণুপ্রিয়া মহা সভাগী জেনারেল সেক্রেটারী জিসনু সিনহাসু শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু