• 995
• ১২ই অক্টোবর ২০২২ ইং
• Share on:

লাইফমদা খেন্নবা থম্মোয়সি --ওইনাম চনা লুখোই

মালেমদা লৈরিবা লাইনিং লিচৎ কয়াগী লুচিংবশিংনা হায়রি-তাইবং মপু, ঈশ্বরবু হায়রবসু, অল্লাহবু হায়রবসু ঈশ্বরদি মমিংদা তোঙানবনি পূম্নমক্কী মপু ওইবা মহাক্তি অমখক্তনি। লোল কয়ানা শক্লি। শোল্লি। থৌজা হৈবা মপুনি। তোল্লবগী চংজফমনি। ইবুংঙো মাগী মফমদদি খেন্নবা লৈতে। শকপগী ৱানি। শোনবগী ৱানি।

ওইনাম চনা লুখোই

খেন্নবা হায়বসি মফম খূদিংমক্তা, মতম পূম্নমক্তা অদুম্মক অদুম লৈ। মীগা মীগা থোং মান্নহনসি মান্নবা খুন্নাই শেমসি হায়না মহাক্না অদুম্মক খেন্নহল্লি। মীরমদসু খেন্নৈ। লইফমদসু খেন্নৈ। অয়ূক অঙনবদগী ইরাইলৈমা, ইলৈমা খুরুমজদুনা চেঙহি শম্বাল লাংলগা, চরৈ ফিশেং শেৎতুনা চৎচিখিবী ইবেম্মদো কোরৌ নোংজা অদুগী অয়ূক্কী ৱাংলেন পূংফমদা লাইরেম্বী ইমাগী মশায়কোল খূভমদা চংবা য়াখিদে। লৈবাক্কী অঙম্বা লৈঙাকপুরেল লাক্ত্রি। লৈঙাকপুরেলনা লাইফমদা হান্না চংদ্রিবমখৈ কনাসু চংবা য়াখিরোই। লৈঙাকপুরেল য়ৌরক্ত্রি ফমদুনা মীয়াম্না পরেং লেপ্পগা লৈনখি।

ঐহাক্না হান্না লাইরেম্বী ইমা খুরমদ্রিবমখৈ মীচম কনামত্তা চংবা য়ারোইকো অদু ওইরবদি ঐহাক খোঙহৌ খজিক ঙন্না লাইফমদা চৎকে হায়বগী ৱাখল লৈঙাকপুরেল অমদি অঙম অথৌশিংনা খংবিদবগুম তৌই। দোলাই তোংবা অঙম্বনা মনাই শজিক লোয়শিংগী করিমত্তা খনবিদে। মরম অসিনা লাইফমদসু খেন্নবগী মমি অদুম তাই। লাইনা চানবসিসু সনা, লুপা লফোই লফাং ফজবা, চেঙগী মচং নীংথিবা কৎলবা ঙম্বা মীদা ওইরমগদ্রা খল্লক্লে।

মসি ঐখোয় খ্বাইগী লাইফমদসু নত্তে। তিরুপতি লাইফমদা ঐহাক চৎচরুই। চীংথক্তা লৈবা ফজবা লাইফমনি। বিশাখাপট্টনমদগী কিমি: ১৮ লোম কারগা লৈ। নোংমদা লাকপা মীগী মশীং য়ামখ্রে। লাইফমদো মীনা কৃক-কৃক ইন্নৈ। ইচম-চম্না খুরুম্বা চংজগে হায়রবদি লম্বীদা পরেং লেপ্পা তাই। খরা থুনা খুরুমজগে হায়রবদি য়ুবিআই বেঙ্কতগী লুপা ৩০ পীবা চে অমা লৌরগা লম্বী অমরোমদা চংবা তাই। শেলবু থোইদোক্না লূনা খন্দবা লুপা মঙা তারবু শেল ওইনা খন্দবসি মণিপুরদা লৈবা ঐখোয় ওইরমগদ্র হায়না খল্লি।

ঐখোয়না মখায় শিকি শীজিন্নবগী ৱা লৈতে। চান্দিগী শেল অচোইবা লমদমসিদা মী অয়াম্বনা শীজিন্নদে। পোৎ অমা লৈবদা লুপা অনী হনগদবনি অদু শেল অচোইবা হন্নিংঙাই লৈতে হায়বদি হল্লক্ত্রবসু য়ারেদা হায়বা পুকচেল চাওবা মীগী মশীংনা হেনবা মণিপুর ষ্টেটনি। অসিগুম্বসি ইন্দিয়াগী মফম অতৈদদি উবা ফংদে। পোৎ অমা লৈরুবদা হল্লকপা মকায় শিকিনা ফুরিৎখাও থল্লি। মসি আসামদগী অসুম্মক হৌখ্রে। লাকচনীংলিবা ৱাফমদি লাইফমদসু খেন্নবসি অদুম লৈ। মসি লৈহনবিগসু হায়দুনা করম্বা লাইদনো মীয়ামগা ৱাকৎমিন্নসি।

হায়...হায়... লৈঙাকপুরেলনা হান্না চংলগা খুরুমদ্রিবমখৈ কনাসু চংবা য়ারোই হায়দুনা য়াকখ্রবা নুংশাগী মৈচাক খাংদুনা মীচম মীয়াম্না পরেং লৈপ্পদো লাইরেম্বী ইমানদি শোয়দনা খঙৎবরমগনি। ইমাগী থৌজালদগী মথংগী চহীদদি ইমা ইবেম্মনা অনৌবা চৎন-কাঙলোন অমা শেম্বীরকপুস য়াই।

মালেমদা লৈরিবা লাইনিং লিচৎ কয়াগী লুচিংবশিংনা হায়রি-তাইবং মপু, ঈশ্বরবু হায়রবসু, অল্লাহবু হায়রবসু ঈশ্বরদি মমিংদা তোঙানবনি পূম্নমক্কী মপু ওইবা মহাক্তি অমখক্তনি। লোল কয়ানা শক্লি। শোল্লি। থৌজা হৈবা মপুনি। তোল্লবগী চংজফমনি। ইবুংঙো মাগী মফমদদি খেন্নবা লৈতে। শকপগী ৱানি। শোনবগী ৱানি। লাইফম কয়াদসু খেন্নবা অদুম লৈ। লৈঙাকপুরেল লেংলক্ত্রিবমখৈ কনাগুম্বা অমত্তা চংবা য়াখিরোই হায়বসিমক খেন্নবা অদুম ওইরবনি।

ঙসিদি মালেমদা লৈরিবা লাইফম পূম্নমকসে শেন্দানফম ওইরকে। উরিষাগী জগন্নাথ ক্ষেত্রদনি ফজখ্রে। চাউখ্রে। লাইগী লাইশঙদো। লাইগী শক্তম মূর্ত্তি অদুসু চাউই। লাইগী থৌগল্লোয় মরায়বক্তা শিন্দুর নম্বা, শিখা চাউনা খাকপা মীওইশিং অদুদা লাইগী মখোঙ শোক্না অমুক্তং খুরমজগে হায়রুবদা লুপা মঙা পীয়ু অদু ওইরবদি লাইগী মখোঙ শোক্না খুরুম্বা য়অগনি অদু পীদ্রবদি য়ারোই হায়রকই মাগীদু ঐসি খরা পঙনা মাগী মমিত্তা উবদগী হায়রম্বসু য়াই।

কনাগুম্বশিংগী মফমদগী ঐনা তাজখিবদি জগন্নাথ কুম্বা নত্তে। মখোঙ শোক্না হেক্তা খুরুম্বা য়াবনি। মসি অচুম্বসু ওইরমগনি। অদুবু ঐঙোন্দদি লাই পান্নবদুনা লুপা মঙা পীয়ু হায়রকখি। লাইগী প্রসাদিনি হায়দুনা অচা-অথক য়াম্না য়োল্লি। খুরুম্বা লাকপশিংনা লৈরগা চায়। তিরুপতি লাইফমদদি অরাম-খৌরাং নংলবা মীপূম খূদিংমক চাক পীজৈ। শেল লৌদে। চাক চাবগী পুখম অদু ঐখোয়না ফেংদোক চামথোক্লমগে হায়বদা য়াদে। ঐখোয়সি মীয়ামগী সেবাগীদমক্তা লৈরিবনি হায়দুনা মখোয়না শেংদোকই।

লাইফমদুদা ঐহাক অহিং অনী লৈরকই। লাইফম অদুদসু চানীংবা থক্নীংবা ফংদবা লৈতে। শেলগী ৱারি। শেলগী মমলসি ঐহা তিরুপতিদা খঙলকই। ক্কাসি পৈশা ৩০ পীবদগীনা লুপা মঙা পীবফাও লৈ। নুপা অনী পীবা, মঙা পীবা ক্বা চাবা ইয়াও য়াওদে। মণিপুরদগী চৎমিন্নবা ঐখোয়না লুপা মঙা পীবা ক্বা লৈরগা চাবদা হান্না দুকান মমাঙদা লৈরম্বশিংনা য়েংনৈ। লােইফমদসু খেন্নৈ। মীফমদসু খেন্নৈ। মসি পূম্নমকসে ঐগী ৱাখলদদি লাইদা খেন্নহনবা নত্তে। মী ঐখোয়না খেন্নহনবা ঙাক্তনি। ঐখোয় লমদমসিদা লমকোয়বা লাকপা মীওইশিংগী পূক্নিং চিংশিনবা য়াবা মহৌশা লাইরেম্বীনা পীনবিরকপা ফজখ্রবা মফম কয়া লৈ।

অদুবু লমদমসিদা লৈঙাক্না শেমগৎ শাগৎপিদে। তিরুপতি চীংখোঙদগী লাইফম য়ৌবা ফাওবদি কিমি: ১৮ নি। চীং লম্বীনি। অদুবু লম্বীদু নিংগ্রি শিৎপগুম নাল্লি। ধুপ মেক্রুককী মনমগা অচৎ অওকশিংগী হকচাং তেকখৎহল্লি। চীংখোংদগী লাইফম ফাওবা ষ্টেট অদুগী পেসেঞ্জার বাসনা থিন্দোক থিঞ্জিন তৌই। ঐখোয়গীদি কৌব্রু লাইফম কাবদা অৱাবা ওইরি। ঈশিংগী খুদোংচাদবা কয়া মায়োক্নরি। মফমচাবা পোত্থাশঙ লৈতে। মতাং অসিদা ষ্টেট অসিগী লৈঙাক্না অহকপা মমল লৈবা মীৎয়েং চংবিবা ফৈ।

এখোয়গী ষ্টেট অসিগী লৈঙাক্কী মীৎয়েং পান্মসি কিমি: অহুমলোমনা কোনবা মীনা কৃক কৃ ইন্ন চিনখ্রবা ইম্ফাল ময়োল অসিদগী ইহেন হেন্দবগুম তৌই। খজিক্তং হায়দোক্লগা লৈরিবা অহাংবা চীংমায়শিংদা ওফিস কয়া, লোইশঙ কয়া থম্বা য়াই। লায়না কয়াগী তোঙান-তোঙানবা লায়েংশঙ কয়া শাগৎপা য়াই। মসি পূম্নমক তৌদে। মীদসু লমদসু খেন্নবা অদুম লৈ। মরু ওইনা মমিং লৈবা লাইফমলেনশিংদা লাইগী থৌগল তৌবিরিবা থৌগল্লোয়শিংনদি লাইফমদা অচৌ-পীশক, লাইর-ইনাকখুনবা, শাগৈ-জাৎকী খেন্নবা থম্বিদবা ফৈ।

চিংঙু লাইগী খুভমদা অমুক্তং য়ৌবা ফংজরবদি শিরবুস য়ারে খন্দুনা লাকচরিবা পাঙ্গল শোনবশিংদা মীনুংশি থম্বিবা ফৈ। তাইবং মপুগী মফমদদি অচৌবা মচা, লাইরবা ইনাকখুনবা নিংথৌদগী চাক্নীবদগী হৌনা চপ মান্নবা মীৎয়েংনা য়েংবি হায়বসি মী ঐখোয়না থবক্তা ওন্থোকসি। ইরমদমসিগী মহৌশাদগী লৈরক্লবা লাইফম কয়া মীয়ামগা লৈঙাক্না খূৎশম্নরগা শেমগৎমিন্নসি। লমকোয়বশিংগী পূক্নিং চিংশিনসি। মসিনা ষ্টেট অসিগী শেম্মিৎলোনদসু ময়োল চোংগনি। হৌজিকমক্কী ওইদনি মহৌশা লাইরেম্বী মথৌজালনা থম্বিরম্বদুদা মীৎয়েংফম ওইরি।

কংলা লাইফমলেন্দা শেমগৎ-শাগৎকদবা য়াম্না লৈরি। হৈবোকচীঙ, থাঙ্গা করাংগী অদুঙৈগী হৈকোল-লৈকোল, কৌব্রুগী নীংথিবা ফজবা, সেলোয় নোংমাইচীংগী নীংথি থোইবশিং মপাল্লমদগী লাকপা লমকোয়বশিংনা লাকপদা থোইদোক-হেন্দোক্না পূক্নিং খোইদানবগীদমক্তা শেমগৎপা ফৈ। চিংঙু থাজিং লাইনিংথৌগী মতীক ময়াই লোক্তাক লাইরেম্বী ইমানা হাপ্পি।

লোক্তাক পাৎ য়েংবা লাকপশিংনা চিংঙু থাংজিং অমসুং কোয়রেল লৈমদা হৈকৎ-লৈকৎ তম্লম্মী। তরেৎকী শেঞ্জা কৎলম্মী। মহৌশা লাইরেম্বী ইমানা পীনবিরম্বা নীংথি থোইনা ফজরবা, চীংনা ইকোয় কোয়শিনবা সনা লৈপাক কংলৈপাক ইমাগী মশায়গোল অসি ঙসি মতীক ময়াই লৈবা মচা মশুশিংনা শেমগৎ শাগৎপিদুনা সনা লৈবাক্তা সনা রৈবাক ওইহনসি। লাইফম লাইফম খূদিংমক্তা খেন্নবগী হায়বদি অনেম-অৱাং লাইর-ইনাকখুনবগী খেন্নবা লৈহল্লোইসি। মসিগী পান্দমসি য়ৌনবা হোৎনবদা লেবাক্লোয়শিংদদা ইন্থোকপা নত্তনা মীচম ঐখোয়সু থৌদাং য়ামিন্নসি।

কর্টেসি: সঙাই এক্সপ্রেস