লমদম অসিগী নুপী অইবীশিংগী শৈরেংদা লৈবাক নীংবগী সেমিনার পাঙথোকপগা লোয়ননা বাংলাদেশকী দেলিগেটশিং হরাও তয়াম্না ওকখ্রে
ইম্ফাল, নভেম্বর ২৮ : মণিপুরগী নুপী অইবীশিংগী খুৎইদা লৈবাক নীংবা হায়বা হীরমদা ষ্টেট লেভেল সেমিনার অমা ঙসি পিপলস রিপাব্লিক ওব বাংলাদেশকী সুপ্রীম কোর্টকী এডভোকেট এস সী সিনহানা সঙাকফম কৈথেলদা লৈবা হোটেল লনচেনবদা হৌদেকখ্রে হায়না পি এ দব্লিয়ু এফকী এসিষ্টেন্ট সেক্রেটারী এ কে গ্যানেশ্বরিগী চেরোল অমনা ফোঙদোরক্লি।
পেট্রিওটিক রাইটার্স ফোরাম (পি এ দব্লিয়ু এফ) মণিপুরনা শীন্দুনা পাঙথোকখিবা মণিপুরী নুপী অইবীশিংগী শৈরৈংদা তারিবা লৈবাক নীংবগী মশক্তা নৈনখিবা ঙসিগী সেমিনারগী থৌরম হৌদোকপগী মনুং চন্না মণিপুর সঙাই ফেষ্টিভেল ২০২২ দা শরুক য়াবা লাক্লিবা মণিপুরী কালচারেল কমপ্লেক্স বাংলাদেশকী আর্টিষ্টশিং অমদি দেলিগেট ৩৭ সু হরাও তয়াম্না ওকখি। সেমিনার হৌদোকপগী থৌরম অদুদা ইম্ফাল ওয়েষ্টকী উপ-অধক্ষ্য এল বোবিনা অথোইবা মীথুংলেন, ফোরামগী পেত্রোন মেম্বারশিং ডা. এস মনাওতোন অমদি কোঞ্জেং দিলিপনা অখন্নবা মীথুংলেনশিং ওইনা শরুক য়াখি।
ঙসি পাঙথোকখিবা নেসনেল লেভেল সেমিনার অদু শক্নাইরবা অইবা সাহিত্য একাদেমী এৱার্দি ডা. এস লনচেনবা মীতৈনা মোদারেটর ওইখি। সেমিনার অদুদা ডা. ৱাহেংবম কুমারীনা মেমেচৗবীগী শৈরেংদা তারিবা লৈবাক নীংবগী মশক, ডা. সনসম নবদ্বিপনা য়েংখোম ইন্দিরাগী শৈরেংদা তারিবা লৈবাক নীংবগী মশক, ডা. মায়া নেপ্রমনা বর-কন্যাগী শৈরেংদা তারিবা লৈবাক নীংবগী মশখ, লাইশ্রম লেনিননা ইবেমপিশক্কী শৈরেংদা তারিবা লৈবাক নীংবগী মশক, ডা. অথোকপম উমাবতিনা খাঙেম্বম ইবেতোনগী শৈরেংদা তারিবা লৈবাক নীংবগী মশক, ডা. হাওবিজম চনু প্রেমানা খ্বাইরাকপম আনন্দিনিগী শৈরেংদা তারিবা লৈবাক নীংবগী মশক অমদি ডা. সালাম শান্তিবালানা চোংথাম ওংবী সুবদনিগী শৈরেংদা তারিবা লৈবাক নীংবগী মশক হায়বা হীরমসিদা চে পাথোকখি।
সেমিনার হৌদোকপা থৌরম অদুগী অথোইবা মীথুংলেনগী ৱারোল পীরদুনা ইম্ফাল ওয়েষ্ট দিষ্ট্রিক্টকী উপ-অধক্ষ্য এল বোবিনা ফোঙদোকখিবদা, মণিপুরগী নুপী অইবীশিংগী শৈরেংদা লৈবাক নীংবা হায়বা সেমিনার অমা শীল্লকপা অসিমক্না লমদমসিগী অইবীশিংনা মরৈবাক মরমদমবু কয়াম নুংশিবগে হায়বদু খঙবা ঙম্লগনি। ঐখোয়না ঐখোয়গী ইমা ওইবীশিংবু ঈকায় খুম্নবা তঙাইফদে। ইমা হায়বসি নুপী ওইবীশিংনি। নুপী ওইবীশিংবু অৱাংবা থাক্তা থম্লবা মতমদতা খুন্নাই অসি মাঙলোমদা চঙশিনবা ঙমগনি হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু