রিতেশনা গোল্ড, সনাথোইনা সিলভার ফংখ্রে
ইম্ফাল, জুলাই ৭ : মালদ্বিভসতা পাঙথোকপা ১৩ শুবা সাউথ এসিয়ান বোদি বিল্ডিং ফিজিক স্পোর্তস চেম্পিয়নশিপ্তা ইন্দিয়াগী মহুৎ শিন্দুনা শরুক য়াখিবদা থিঙুজম রিতেশনা জুনিয়রগী কেজি ৭৫ গীদা গোল্ড অদুগা সেনিয়রগীদা রাজ কুমার সনাথোইনা কেজি ৭০গীদা সিলভার মেদেল ফংবা ঙমখি।
সাউথ এসিয়ান বোদি বিল্ডিং ফেদারেসনগী মীৎয়েং মখাদা পাঙথোকখিবা সাউথ এসিয়ান বোদি বিল্ডিং এন্দ ফিজিক স্পোর্তস চেম্পিয়নশিপ অসিগী জুনিয়র মেন্স বোদি বিল্ডিং কন্তেন্তকী কেজি ৭৫ মথক্কী কাঙলুপ্তা লৈবাক অসিগী মহুৎ শিন্দুনা শরুক য়াখিবা থিঙুজম রিতেশ সিংহনা গোল্ড মেদল, লৈবাক অসিগী প্রনব কোতয়ালনা সিলভার মেদল অদুগা মালদ্বিভকী অশ্যম মোহমদ শফিকনা ব্রোঞ্জ মেদল ফংখি।
মালদ্বিভসকী চেম্পিয়নশিপ অসিগী সিনিয়র মেন্স বোদি বিল্ডিং কন্তেস্তকী কেজি ৭০ মথক্কী চাংদম্নখিবদা লৈবাক অসিগী মহুৎ শিন্দুনা শরুক য়াখিবা আসিশ রৌতেলানা গোল্ড, রাজকুমার সনাথোই মৈতৈনা সিলভার মেদল অদুগা পাকিস্তানগী সহিদুলানা অহুমশুবা অদুগা ইন্দিয়াগী রবিন মহাদেবনা মরিশুবা পোজিসন তারকখি।
লৈবাক অসিগী মহুৎ শিন্দুনা মণিপুরদগী বোদি বিল্ডর অনীনা শরুক য়াখিবদা অনীমক গোল্ড অমসুং সিলভার মেদেল ফংলকখিবদা ওল মণিপুর বোদি বিল্ডার্স এসোসিয়েসনগী মায়কৈদগী নুংঙাইবা ফোঙদোরক্লি। মেদল ফংলক্লবা বোদি বিল্ডর অনীমক ইম্ফাল ওয়েস্টকী সঙাই জিম খাগেম্পল্লিগী শান্নরোয়শিংনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু