মাখোনমনি মোংসাবগী ইংলিসতা হন্দোকপা ‘পেনা ম্যুজিক ইন মণিপুরী কলচর’ ফোঙখ্রে
ইম্ফাল, জুলাই ৩১ : ঐখোয়গী ইপা-ইপুশিংনসু ঐখোয়গীদমক পেনা থম্বীরম্লিবা অসি য়াম্না চাওথোকচনীংঙাই ওই। পেনা হায়রিবা ইন্সট্রুমেন্ট অসি ঐখোয়গী লমদম অসিগী পুৱারী কয়াগা শাগোন্নদুনা লাক্লবা, লাইশোন তিনশোন কয়াগা লোয়নরগা লাকপা ইন্সট্রুমেন্ট অমখকনি হায়না মণিপুর য়ুনিভার্সিটি ওফ কলচরগী ভাইস চাঞ্চেল্লর প্রোফেসর পাওনম গুনিন্দ্রোনা ফোঙদোকখ্রে।
ৱাফম অসি ঙসি য়ুনিভার্সিটি অসিমক্কী এসিষ্টেন্ট প্রোফেসর ওইরিবা মাখোনমনি মোংসাবনা মণিপুরীদা ইরগা ডা. পুখ্রম্বম রাজেননা ইংলিসতা হন্দোক্লগা থাঙ্গাল কৈথেলদা লৈবা পি সী জ্যেন এন্দ কোনা পাব্লিশার ওইদুনা পুথোকপা লাইরিক ‘পেনা ম্যুজিক ইন মণিপুরী কলচর’ ফোঙদোকপগী থৌরমদা অথোইবা মীথুংলেন ওইরদুনা ভিসি প্রোফেসর পাওনম গুনিন্দ্রোনা ফোঙদোকখিবনি।
থৌরমগা মরী লৈননা অথোইবা মীথুংলেননা মখা তানা হায়, পেনা অসি মৈহৌরোলদগী ঐখোয়গা থাগোন্নরক্লবা অমসুং তৎন-থানবা য়াদ্রবা ইন্সট্রুমেন্ট অমনি। হৌজিক ফাওবদা পেনা অসি লাইগী ওইবা থৌরম কয়াদসু শীজিন্নরি। মসিনা ঐখোয়গী কালচার য়োকখৎনবা হোৎনবদা অচৌবা মতেং অমা ওইরি হায়খি।
লোয়ননা মালেমসিদা লৈরিবা ফুরুপশিংগী চপ চাবা মশা মশাগী নাৎকী ওইবা ফিজেৎ চাকচা, মশাগী চপ চাবা ফিদমনীংঙাই ওইবা চৎনবী লৈরিবনি। অদুনা ঐখোয়গীসু ইপা-ইপুনা থম্বীরম্লিবা নাৎকী ওইবা পোৎশক কয়া ঙাক্তুনা থম্বা মথৌ তাই। লোয়ননা ঐখোয়না লাইরিক অমা ফোঙবদা ঐখোয়গী ইরোরদা খক ইবদা নত্তনা মালেমগী থাক্তা খঙনবা অমদি প্রমোট তৌনবা কম্মন ওইবা লোলদা ফোঙবসু মথৌ তাই হায়খি।
লাইরিক অসিগী অইবা এসিষ্টেন্ট প্রোফেসর মাখোনমনি মোংসাবনা ফোঙদোকখিবদা মহাক্কী লাইরিক অসি ইনাৎকী ওইবা পেনাগা ঐখোয়গা শাগোন্নরকপগী মতাং, নিঙথৌনা ইন্সট্রুমেন্ট অসিবু মশক খঙবা অমদি পেনাগী মতিক ময়াইনচিংবা কয়া লাইরিক অসিদা য়াওরি হায়খি।
পেনাদা লমদম অসিদা লৈরিবা ইন্সট্রুমেন্ট ময়ামদগী মকোকনি। লাই হাক্তক্তগী লৈরমদুনা পেনা শৈশক্তগী খোংজোম পর্ব অমদি মোইরাং সাইনচিংবা কয়া লাকখিবনি। অদুবু হৌজিক্তি মমাঙঙৈগী পেনাগী মতিক ময়াই অসি নোংম-নোংমগী মাঙশিল্লকপগুম তৌরে। মরম অদুনা লৈঙাক্না কালচারেল পোলিসি লাউথোক্লগা পেনাগী মফম থম্বীরবদি তুংগী মীরোলদা য়াম্না কান্নবগী লোয়ননা ঐখোয়গী মৈহৌরোলদগী লৈরম্লিবা মীওইবা খুন্নাইগা তৎন-থানবা য়াদ্রবা ইন্সট্রুমেন্ট মখল অসিবু ঙাক্না থম্বা ঙমগনি হায়খি।
ঙসিগী থৌরম অসিদা মণিপুর য়ুনিভার্সিটি ওফ কালচারগী চীফ লাইব্রেরিয়ান থৌনাওজম খোমদোননা থৌরম মপু ওইরগা কাংজম রাধাকুমার (রিটেয়ার্ড আই এ এস), প্রোফেসর পোলেম নবচন্দ্র (রিটেয়ার্ড) অমদি রিটেয়ার্ড লেকচারার ডা. পুখ্রম্বম রাজেন্দ্রনা অখন্নবা মীথুংলেনশিং ওইনা শরুক য়াখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু