মণিপুরী সাহিত্য পরিষদনা মহৈরোইশিং তরাম্না ওকখে
আগরতলা, ওক্তোবর ২৮: মণিপুরী সাহিত্য পরিষদ, ত্রিপুরা অমসুং আগরতলা ম্যুনিসিপাল কর্পোরেশন (এ.এম.সি) অনীনা খুৎশম্নরগা চৎখিবা অক্টোবর তাং ২৬, ত্রিপুরা স্টুডেন্ট হেলথ হোমদা হিজম ইরাবতকী মপোক কুমওনগা মরী লৈননা সিম্পোজিয়াম পাঙথোকথিবগা লোয়ননা হন্দক চহী মেত্রিক অমসুং হায়ার সেকেন্ডারীদা ফার্স্ট ডিভিশন্দা পাশ তৌখ্রবা ত্রিপুরাগী মণিপুরী মহৈরোই ৪৬ তরাম্না ওকখ্রে।
চীংলেম্না পাঙথোকথিবা থৌরম অদুদা এ.এম.সিগী কর্পোরেটর ইষ্ট জোনগী চেয়ারম্যান সুখময় সাহা, টি.এম.সি প্রিন্সিপাল ডাঃ অরিন্দম দত্ত, জে. এন. এম. ডান্স একাডেমিগী হান্নগী ডিরেক্টর এল উপেন্দ্র শর্মা, পিএমশ্রী বাইদ্যারদীঘি এইচ.এস স্কুলগী হেড মিস্ট্রেস উত্তরা চাকমা অমসুং পরিষদকী প্রেসিডেন্ট এল বীরমঙ্গলনা ফম্বাক্তা লেংশিনখি। এ.এম.সি কর্পোরেটর সুখময় সাহানা মৈরা চুখত্তুনা থৌরমদু হৌদোকপীখি। হিজম ইরাবতকী ফটোদা হৈকৎ-লৈকৎ তম্লবা মতুং ক্ষেত্রিময়ুম মাধবীনা শৈহৌ ঈশৈ শকখি। ইরাবত সিম্পোজিয়ামদা সাহিত্য পরিষদকী এডভাইজর ৱাংখেম বীরমঙ্গলনা পেপার পাথোকথি।
মহৈরোই তরাম্না ওকপা থৌরমগী মতাং অমা
ত্রিপুরাগী তোঙান তোঙানবা মৈতৈনা তাবা ডিস্ট্রিক্টতগী হন্দক চহী ত্রিপুরা বোর্ড অমসুং অতৈ বোর্ডকী মখাদা মেত্রিক অমসুং হায়ার সেকেন্ডারীদা মণিপুরী মহৈরোই ১৩৪ রোম ফার্স্ট ডিভিশন্দা পাশ তৌখি। মদুদা ত্রিপুরা বোর্ডকী মখাদা মেত্রিকতা ১০গী মনুংদা ৮ শুবা পোজিশন তাখিবা বাদ্যাদীঘিগী মৈতৈ নিঙোল এল বিথি সিংহ য়াওনা তোঙান তোঙানবা বোর্ডকী মখাদা ফার্স্ট ডিভিশন্দা পাশ তৌবা মহৈরোই ৪৬ বু পরিষদনা আগরতলাদা ওকখি। লোয়ননা পিএইচডি ফংখ্রবী নিঙোল অহুমবুসু পরিষদকী মাইকৈদগী তরাম্না ওকখি। পনবা য়াবদি মথং থা নভেম্বর ৮ অমসুং ৯ দা পরিষদকী ধলাই অমসুং নর্থ ডিস্ট্রিক্ট ব্রাঞ্চ অনীনা তোঙান তোঙানবা থৌরম অমদা ফার্স্ট ডিভিশন্দা পাশ তৌখ্রবা অতৈ মহৈরোইশিং অমসুং আসাম ইউনিভার্সিটিদগী গোল্ড মেডেল ফংলবী নিঙোল অমবু ওক্কনি।
সোর্স : মরূপ
0 কমেন্ট:
কমেন্ট তৌবিয়ু