• 849
• ১লা ডিসেম্বর ২০২২ ইং
• Share on:

মণিপুরসি অনীশুবা য়ূমগুম্না খল্লি-সুস্মিতা সেন

ইম্ফাল, নভেম্বর ৩০ : মণিপুর অসি মহাক্কী অনীশুC য়ূমগুম্না খল্লি। লমদম অসিগী ফিজেৎ চাকচা তমজনিংঙাইনি হায়না মিস য়ুনিভার্সকী মিংথোল ফংখ্রবী শক্নাইরবী সুস্মিতা সেন্না ফোঙদোকখ্রে। ৱাফম অসি ঙসি ইম্ফাল হোতেলদা পাঙথোকখিবা পাউগী মীফম অমদা মহাক্না ফোঙদোকখিবনি।

সঙাই ফেস্তিবেলগা মরী লৈননা বোত্তা পাঙথোকপা ফেসন শো প্রোগ্রামদা শো স্তোপ্পর ওইখিবী সুস্মিতানা হায়খি, লমদম অসিদা লৈরিবা হৈথোই শিংথোইবা মী কয়াশিং অসিবু পূক্নিং থৌগৎপীবা চঙই। কালচার অমসুং শান্ন-খোৎনবগী লমদা মশক নাইরবা লমদম অসিগী মীশিংবু শৌগৎলিবমখৈ মালেমগী মীয়াম্না লমদম অসিবু হেন্না মশক খঙনরক্কনি। ফেসনগী লমদা লমদম অসিগী শক্নাইরবা ফেসন দিজাইনার রোবার্ট নাওরেমনা লৌরিবা থৌদাং শীংথানিংঙাইনি। লমদম অসিগী ইয়োংদা শাবা হেন্দলুমগী পোত্থাক অমসুং খুৎনা শাবা হেন্দিক্রাফট্কী পোৎলমশিংবু মালেমগী মফম শিন্না থুংনা খঙহন্নবা হোৎনবাদা রোবার্ট নাওরেমনা অচৌবা থৌদাং লৌরি।

মহাক্না মখা তানা হায়খি, ফেসন হায়বসিদি মতমগী মতুংইন্না অহোংবা লৈ। তৌবতবু লমদম অসিগী ত্রেদিসনগী ওইবা ফিজেৎশিং অসিদি অহোংবা লৈরোই। কোভিদ লাইচৎনা মরম ওইরগা চহী অনী লেপ্লুরবা মতুংদা পাঙথোকপা সঙাই ফেস্তিবেল অসিদা শরুক য়াবা ফংবদা অদুক্কী মতিক নুংঙাইবা ফাওই। লমদম অসিগী ফিজেৎ মরুওইনা ফনেক অমসুং রাণী ফি অসি মহাক্কী ওইনদি শেৎপদা নুংঙাইবদা নত্তনা তোপ তোপ্পা মহাও অমা পীরি। হন্দক্কী ইম্ফাল খোঙচৎ অসি মহাক্কী ওইনদি অহানবা খোঙচৎ নত্তে। মখা তানসু ফেসনগী লমদা মণিপুরবু মালেমদা মশক তাক্নবা হোৎনবদা মহাক্কী মায়কৈদগীসু অঙম্বা মতেঙ পাংগনি।

সোর্স: পোক্নফম