মণিপুরগী জি আই তেগ ফংলবা চাকহাও ছতিসগরগী চেঙ শারগা মহারাস্ত্রদা য়োল্লম্লে
ইম্ফাল, জুন ১২ : মণিপুরগী জি আই তেগ ফংলবা ‘চাকহাও’ অসি ছতিসগরদা মহৌশাদগী ফংবা চেঙনি হায়রগা মহারাস্ত্রগী মফম খরদা য়োনবা থেংনরে।
চাবদা হকচাং য়াম্না কান্নবা, য়াম্নসু হাওবা লমদম অসিদগী ঙল্লিঙৈ মতমদগী পুথোক্তুনা লাক্লবা চাকহাও হৌজিক্তি মালেম শিনবা থুংনা খঙনদুনা মালেমগী লৈবাক কয়াদগী দিমান্দ তৌরিবনি।
লমদম অসিগী লৌমীশিংনা পুথোকচবা চাকহাওশিং তকথোক্লবা চেঙ ওইনা অমসুং ফৌ ওইনা পেকেজিং তৌরগা মপানগী এজেন্সি কয়াদা হৌখিবা চহী খরা অসিদা য়োনবগী থবক চত্থরি। অসিগুম্বা লমদম অসিগী তাংলবা মালেম্না শকখঙনরবা ইন্তেলেকচুএল প্রোপার্তি ইন্দিয়াগী মখাদা জিওগ্রাফিকেল ইন্দিকেসন্স রেজিস্ত্রিদা রেজিস্তার তৌদুনা জি আই তেগ ফংলবা চাকহাও অসি ছতিসগরগী মহৌশাদগী ফংবা চেঙনি হায়দুনা মহারাস্ত্রগী মফম খরদা নিংথিনা পেকেজিং তৌরগা য়োল্লম্বসি অঙকপনি।
মহারাস্ত্রগী মফম খরদা মণিপুরগী চাকহাওবু পেকেজিং তৌরগা ছতিসগরগী চেঙনি হায়না য়োল্লে হায়বগী পাউ অমদি চেঙগী পেকেতকী ফোতো অদু সোসিয়েল মিদিয়াদা ভাইরেল ওইরকখ্রে। নিংথিনা পেকেজিং তৌরবা চাকহাও অদু নেতিব এগে ফুদস এল এল পি হায়বা মুম্বাইগী গমদেবী ঐচ জি রোদ, জে কে তৱার হায়বা কম্পনি অমনা পেকেজিং অমসুং মার্কেতিং তৌরগা য়োনবনি। অদুগা য়োল্লিবা ফসাইগী লাইসেন্স নম্বরনা ১১৫২২০০২০০০২৭৬ নি।
কোম্পানি অসিনা চাকহাও অসিবু ‘ইম্পরিএল ব্লেক রাইস’ হায়বা ব্রান্দ মমিংদা পেকেজিং তৌরগা য়েনবনি। নেতিব এগেন ফুদস এল এল পিনা য়োল্লিবা চাকহাওগী পেকেত অদুদা ‘চাকহাও’ নৎত্রগা ‘কালা ভাত’ অসি ছতিসগরদা মহৌশাদগী ফংবা মশক থোকপগা অদুগা নাৎকী ওইবা মনুং হঞ্জিন্না মরী লৈনবা অমদি চাবদসু হকচাংদা কান্নৈ হায়না ইরি।
লমদম অসিগী পোত্থোক ওইরিবা চাকহাও অসি চাবদা মসিগী কান্নবা অমদি মহাও অসি খঙবদগী মালেমগী লৈবাক কয়ানা য়াম্না পাম্না অমদি তাঙলবসু তাঙনা লৈরগা চান্নবা চেঙ ওইরকপদগী অতোপ্পা স্তেত অমসুং মপান লৈবাকশিংদা থারগা লাক্লি। গ্লুতেন য়াওদবা, প্রোতিনগী চাং য়াম্না ৱাংনা য়াওবা, ফাইবা, মিনরেলদা আইরন, মেঙ্গানিজ, মেগ্নেসিয়াম, সেলেনিয়ম অমসুং ফোস্ফোরসসু য়াওবা চেঙ অসি এন্তি-ওক্সিদেন্তসু ওইবা ফুদ ভেল্যু য়াম্না লৈবা চেঙ অসি খঙনরকপদগী মীয়াম্না পাম্নবা হেনগৎলকখি। মসি য়েংলগা লমদম অসিগী চেঙনি হায়বদু মশক তাক্তুনা অতোপ্পশিংনা মসিবু লান্না শীজিন্নবা য়াদনবা হায়দুনা হৌখিবা ২০১৭ কী দিসেম্বর ২৬ তা কন্সোর্তিয়ম ওব প্রদ্যুসর্স ওব চাকহাও (ব্লেক রাইস), মণিপুরনা ইন্তেলেকচুয়েল প্রোপার্তি ওব ইন্দিয়াগী জিওগ্রাফিকেল ইন্দিকেসন্স রেজিস্ত্রিদা রেজিস্তার তৌখি। জি আই এপ্লিকেসন নম্বরনা ৬০২ নি। অদুগা হৌখিবা ইং ২০২০ গী এপ্রিল ২০ দা সার্তিফিকেত নম্বর ৩৬৪ অসি পীরক্তুনা চাকহাওগী জি আই তেগ অসি ফংখি। অদুগা রেজিস্ত্রেসন অসিগী ভেলিদনা লাক্লিবা ইং ২০২৭ কী দিসেম্বর ২৫ ফাওবা মতম লৈরি।
অসিগুম্বা জিওগ্রাফিকেল ইন্দিকেসন্স রেজিস্ত্রিদা রেজিস্তার তৌদুনা জি আই তেগ ফংলবা পোৎলম অমবু অতোপ্পা মীশিংনা নৎত্রগা কম্পনি অমনি মখোয়গী ওইবা পোত্থোক্নি হায়দুন য়োনবা অসি জিওগ্রাফিকেল ইন্দিকেসন্স এক্তকী মখাদা আইনগী ওইবা চৈরাক ফংনিংঙাই ওই। মরম অদুনা মতৌ করম্না মহারাস্ত্রদা লৈবা কম্পনি অমনা মণিপুরাগী পোত্থোক ওইজরিবা চাকহাওবু মখোয়না ‘চাকহাও’ হায়বা ৱাহৈ অসিমক শীজিন্নরগা ছতিসগরহগী মহৌশাদগী পুথোক্লকপা চেঙনি হায়না মতৌ করম্না য়োল্লিবনো হায়বসি অচৌবা ৱাহংনি।
অমরোমদা, মণিপুরগী এগ্রিকলচর অমসুং হোর্তিকলচরগী মশাগী ওইজবা পোত্থোকশিং অমদি জি আই তেগ ফংলবা তমেংলোংগী কোম্লা, কচাইগী চম্প্রা, সিরারখোংগী মোরোক ‘হাথৈ চিল্লি’ অসিসু মপান লমদা লৈবা কনাগুম্বা খরনা মখোয়গী ওইবা পোত্থোক্নি হায়না য়োল্লকপা য়াবগী অকিবা লৈতবা নত্তে।
অদুবু হৌজিক নেতিব এগেন ফুদস এল এল পিনা মখোয়গী ওয়েবসাইট অমদি পোৎ য়োন্ননবগী লৈরিবা ইন্তরনেতকী দোমেনশিংদা নেতিব এগেনগী পোতলম কয়া য়োন্ননবগী প্রদক্তশিংগী ফোতোশিং থাগলগা লৈরি। অদুবু ইম্পরিয়েল ব্লেক রাইস হায়রিবা চাকহাওগী পেকেতশিং অদুদা হৌজিক্তি ব্রহ্মপুত্রা ভেল্লি, আসামগী পোত্থোক্নি হায়না অমুক থাগৎলগা লৈরি। অদুগা হায়রিবা পোৎলমশিং অদু হৌজিক য়োন্ননবা লৈত্রে ‘সোল্ড আউত’ হায়রগা মখোয়গী ওয়েবসাইত পেজ দা থারগা থম্লি।
মখোয়না ওয়েবসাইত পেজ দা থাগৎলিবা চাকহাওগী পেকেট অদুদা অমুক পোত্থোক অসি আসামগী ব্রহ্মপুত্রা ভেল্লিদা চহী লীশিং অমগী মমাঙদগী মহৌশাগী ওইবা ক্লাইমেতিক কন্দিসন্দা পুথোকপা মহৌশাগী চেঙনি হায়না অমুক ইরক্লি।
সোর্স: পোক্নফম
0 কমেন্ট:
কমেন্ট তৌবিয়ু