• 88
• ১লা এপ্রিল ২০২৬ ইং
• Share on:

বাংলাদেশতা ইমা লাইরেম্বী মকোং লৈমা নুমিৎ হুম্নি চুপ্পা হরাওরগনি

ইম্ফাল, মার্চ ৩০: লাক্লিবা এপ্রিল ৮ দগী নুমিৎ হুম্নি চুপ্ন বাংলাদেশতা লৈবা ইমা লাইরেম্বী মকোং লৈমা হরাওগদৌরি, মসিগীদমক মুতুৱা ম্যুজিয়মগী থৌমীশিং এপ্রিল ৫ দগী ইম্ফাল থাদোক্লগনি হায়না মুতুৱা ম্যুজিয়মগী দিরেক্তর মুতুৱা বহাদুরনা ফোঙদোরক্লি।

                বাংলাদেশকী হৌরক্লিবা নহারোলশিংনা পেনা খোংবা, জগোই ঈশৈ তম্বা (২০২৫)

হীরমসিগা মরি লৈননা ঙসি মণিপুর প্রেস ক্লবতা পাঙথোকখিবা পাউমীশিংগা উন্নবা অমদা মুতুৱা বহাদুরনা মখা তারদুনা হায়, মুতুৱা ম্যুজিয়মনা তাশিন খোমজিল্লগা বাংলাদেশতা অনিরক শুবা ওইনা পাঙথোক্কদৌরিবা লাই হরাওবা অসিগী ফন্দিং য়ুনেসকো ঢাকানা তৌবনি। মাইবা, মাইবী, পেনা শকপা, চত্থোক-চৎশিন, লৈফম চাকমগী অচঙবা শেনফম পুম্নমক য়ুনেসকোনা তৌবনি। বাংলাদেশতা খুন্দাদুনা উমং লাই হরাওরিবা অসি মদোম লেপচনবা পান্দমদা য়ুনেসকোনা মতেং অসি পীবনি।

হরাওবা অসি কুমজা ২০২৫ কী এপ্রিল থাদা অহানবা ওইনা হরাওবা হৌখিবনি। পাঙথোক্কদৌরিবা অনিরক শুবরা লাই হরাওবা অসি হেক লোয়বগী নোংঙানবগা সিলেটতা লৈবা মহারাজ গম্ভির সিংহনা লাৎলম্বা পাখঙবা, য়ুমজাও লাইরেম্বী অমসুং নোংশাবা চেং হৈদুনা নুংঙাই য়াইফনবা থৌনিগনি হায়খি।
মহাক্না মখা তারদুনা হায়, বাংলাদেশতা লৈরিবা মৈতৈশিং অসি মখোয়গী লাই হরাওবদা চঙ্গদবা মচাক মরল অমত্তা লৈজদবনা মরম ওইরগা, লাই হরাওবদা খুদোংচাবা ফংনবগীদমক য়ুনেসকোনা পেনা খোংবা, জগোই ঈশৈ তম্বা পুম্নমক অসি থা খরা চঙনা তন্বীরগা বাংলাদেশতা লৈবা মৈতৈশিং অসি মরোমদোম লেপচরগা লাই হরাওবা ঙম্নবগী পন্দমদা য়ুনেসকোনা শিনবনি।

লোয়ননা উমং লাই হরাওবদা মাইবা, মাইবী, পেনা শকপশিংনা শেৎলিবা চারিবা খুদিংমক থাইনদগী চৎনরকপা চৎনা কাংলোন হোংদনা অদুমক ইন্না হরাওনবা পান্দমসু অমনি। মরমদি ঙসি মণিপুরগী মফম অয়াম্বদা মসিগী কাংলোন অসি কায়থরকপা অসি উবদগী খরতং ওইরবসু কলহৌবা ঙম্নবগী পান্দমদা লাই হরাওবা অসি পাঙথোকপনি।

                              চৎখিবা চহি ২০২৫ এপ্রিলদা বাংলাদেশতা পাংথোকপখিবা লাই হরাওবা

মহাক্না মখা তানা হায়, হৌখিবা চহি খরগী মমাংদগী নট সঙ্কীর্ত্তন অসি ইন্টাঞ্জিবল  ৱার্ল্ড হেরিটেজতা চল্লি, মসিগী মনুং চন্না উমংলাই হরাওবা অসিসু ইন্টাঞ্জিবল হেরিটেজতা চন্নবা হোৎনরি। মসিগা ইরোইননা বাংলাদেশতা লৈরিবা য়ুনেসকোগী ব্রাঞ্চ ওফিসনসু থৱায় য়াওশিল্পগা লাই হরাওবা অসিসু ইনটাঞ্জিবল হেরিটেজতা  চন্নবা হোৎনবনি হায়খি।

সোর্স - সঙাই এক্সপ্রেস